आइतबार सरकारी विद्यालय बन्द, निजीमा धमाधम पढाइ

A+ A A-

त्रिपुरेश्वरस्थित विश्व निकेतन स्कुलमा ६ कक्षामा अध्ययनरत आयुसी गजुरेल नयाँ शैक्षिकसत्र सुरू भएपछि दुई दिन विद्यालय गइन् । तर, आइतबार उनी विद्यालय जान पाइनन्, घरमै छिन् । आइतबार सार्वजनिक बिदा दिने सरकारी निर्णयले उनी घरमै बस्न बाध्य भएकी हुन् । यता निजी विद्यालयमा पढ्ने आयुसीका साथीहरू भने आइतबार पनि विद्यालय गइरहेका छन् । यसै वर्ष निजीबाट सरकारी विद्यालयमा उत्साहित भएर पढ्न आएकी आयुसीका अभिभावक छोरीको पढाइलाई लिएर चिन्तित छन् ।

सम्बन्धित समाचार

शनिबार र आइतबार सार्वजनिक बिदा दिने सरकारको निर्णय

‘सरकारी विद्यालय पनि राम्रो हुन्छ भनेर भर्ना गरेको हो । सरकारी र निजीको पाठ्यभार एउटै छ । तर, प्राइभेटमा छ दिन सरकारीमा पाँच दिन पढाइ भइरहेको छ,’ आयुसीका बुबा सञ्जीव भन्छन्, ‘सरकारीमा पढ्नेलाई एक दिन घाटा भइरहेको छ ।’

निजीमा धमाधम पढाइ

सरकारी विद्यालयमा आइतबार बिदा भए पनि निजी विद्यालयहरूले भने कक्षा सञ्चालन गरिरहेका छन् । ‘पुरानै क्यालेण्डरअनुसार कक्षा चलिरहेको छ । जिल्ला र प्रदेशमा विद्यालय सञ्चालन गर्न निर्देशन दिएका छौँ,’ एनप्याब्सनका अध्यक्ष पाण्डव हमाल भन्छन्, ‘विद्यार्थीको सिकाइलाई प्रभाव पार्नुहुन्न । शिक्षालाई ठप्प पार्ने निर्णय फिर्ता लिन सरकारलाई भनेका छौँ ।’

तर, प्याब्सनले भने सरकारी निर्णयको विरोध गरे पनि सबै विद्यालयहरू सञ्चालन नभएको बताएको छ । आइतबार पनि विद्यालय सञ्चालन गर्ने बाटो खुलाउन सरकारलाई प्याब्सनले अनुरोध गरेको छ । ‘केही विद्यालय खुले होलान् तर सबै खुलेका छैनन् । निर्णय पुनरावलोकन गर्न सरकारलाई भनेका छौँ,’ प्याब्सनका अध्यक्ष डीके ढुंगाना भन्छन्, ‘सरकारले सकारात्मक वचन दिएको छ, जवाफ कुरिरहेका छौँ ।’

शिक्षा नियमावलीअनुसार एक शैक्षिकसत्रमा २२० दिन विद्यालय खुल्नुपर्ने र १८० दिन पठनपाठन हुनुपर्ने व्यवस्था छ । यसरी आइतबार विद्यालय बन्द हुँदा बालबालिकाको सिकाइमा असर पर्ने अभिभावकहरू गुनासो गर्छन् । यस वर्ष एसईई दिने तयारीमा रहेका विश्व निकेतन स्कुलका सचिन नेपालका अभिभावक (बुबा) वासु नेपाल भन्छन्, ‘सरकारले जे मन लाग्यो, त्यही निर्णय गर्ने भयो । दुई वर्ष कोभिडले विद्यार्थीको सिकाइमा ह्रास आएको छ । आइतबार बन्द हुँदा सिकाइमा असर पर्छ, विद्यालय आइतबार पनि सञ्चालन हुनुपर्छ ।’

सम्बन्धित समाचार

विद्यालयमा पनि हप्तामा दुई दिन बिदा, वर्षे बिदा कटौती

सरकारको निर्णय अवज्ञा गर्न मिल्दैन : मन्त्रालय

शिक्षा विज्ञान तथा प्रविधि मन्त्रालयले निजी विद्यालयहरूले सरकारको निर्णय अवज्ञा गर्न निमल्ने बताएको छ । ‘निजी विद्यालयहरू खुलेको भन्ने सूचना आएको छ । आइतबार बिदा दिने सरकारी निर्णय अवज्ञा गर्न मिल्दैन,’ शिक्षा तथा मानव स्रोत विकास केन्द्रका प्रवक्ता डिल्ली लुइँटेल भन्छन्, ‘सरकारी निर्णय कार्यान्वयन हुन्छ ।’

विद्यार्थीको सिकाइ पूरा हुनेगरी आइतबार बिदा दिइएको उनी बताउँछन् । मन्त्रालयले हिँउदे र वर्षे बिदा कटौती गरेर आइतबार बिदा दिने निर्णय गरेको छ । हिउँदे, वर्षे र स्थानीय बिदा कटौती गरी वर्षभरि अधिकतम ३० दिनसम्म बिदा दिन सकिने प्रावधान मन्त्रालयले ल्याएको छ । यसअघि हिँउदे र वर्षे गरी ४५ दिन बिदा दिने व्यवस्था थियो ।

अव्यावहारिक निर्णय

विद्यालयका प्रधानाध्यापकहरू पनि सरकारको निर्णय अव्यावहारिक भएको बताउँछन् । ‘माथिको निर्देशन पालना गर्नै पर्‍यो । ११ र १२ को कक्षा चलाएका छौँ । अरु कक्षा आइतबार बन्द छन्,’ विश्व निकेतन स्कुलका प्रधानाध्यापक हेरम्बराज कँडेल भन्छन्, ‘यो अव्यावहारिक र हतारमा गरेको निर्णय हो । सरकारी विद्यालय बन्द हुने र प्राइभेट खुलाउने भन्ने हुँदैन ।’

विद्यालयमा सवारी प्रयोग नै हुँदैन, बिदा किन ?

इन्धनको खपत कम र विदेशी मुद्रा सञ्चिति गर्न दुई दिन बिदा दिने निर्णय सरकारले गरेको हो । तर, देशभर ३७ हजार विद्यालय छन् । जसमा १० हजार निजी विद्यालय छन् । सार्वजनिक विद्यालयमा सवारीसाधनको प्रयोग नै हुँदैन । शहरी क्षेत्रका थोरै निजी विद्यालले मात्र सवारीको प्रयोग गर्ने बताउँछन् प्याब्सनका अध्यक्ष ढुंगाना । ‘शहरी क्षेत्रका ३० प्रतिशत विद्यालयमा एउटा भए पनि गाडी हुन्छ तर ठूलो प्रभाव पार्ने हुँदैन,’ उनी भन्छन् ।

शिक्षाविद् डा. विद्यानाथ कोइराला मन्त्रालयमा कर्मचारीले प्रयोग गर्ने गाडीको व्यवस्थापन गर्नुपर्नेमा जोड दिन्छन् । ‘पेट्रोल, डिजेल बचाउन र डलर बाहिर जान नदिन खोजिएको हो भने मन्त्रालयका सचिव उपसचिवलाई छुट्टै गाडी किन चाहियो ? एउटै बसको व्यवस्था मिलाए गाडीको संख्या घट्छ, पेट्रोल डिजेल जोगिन्छ,’ उनी भन्छन्, ‘शहरी क्षेत्रमा गाडी नचल्ने व्यवस्था गर्न सकिन्छ । निजी विद्यालयमा गाडी चढ्नु नपर्ने जोनमा पढाउन सकिन्छ । हिमाल र पहाडमा गाडी राखेको हुँदैन ।’

नेपाल शिक्षक महासंघ भने आफूहरूको सुझाव सरकारले कार्यान्वयन गरेको बताउँछ । ‘गर्मी र जाडो बिदा कटौती गरेर कोर्स सकिने गरी आइतबार बिदा दिन सुझाव दिएका हौँ,’ अध्यक्ष कमला तुलाधर भन्छिन्, ‘तर यो निर्णय पहिला पनि फेल भएको हो, फेरि ब्याक हुने संकेत छ ।’

सम्बन्धित समाचार

यसअघि असफल हप्तामा दुई दिन बिदा दिने निर्णय अहिले कति व्यावहारिक ?

सरकार ब्याक हुन्छ त ?

आइतबार बिदा दिने निर्णयको चौतर्फी विरोध भइरहेको छ । विद्यालय सञ्चालकदेखि अभिभावकसम्मले विरोध गरेपछि के गर्ने भन्ने विषयमा मन्त्रालयले सबै पक्षसँग छलफल गर्ने भएको छ । ‘निजी विद्यालय लागेको छ । यसमा मन्त्रालयले छलफल गर्छ । नीतिगत निर्णय गर्नुपर्ने हुन्छ,’ मानव स्रोत विकास केन्द्रका प्रवक्ता लुइँटेल भन्छन् ।

प्रकाशित मिति: आइतबार, जेठ ८, २०७९ १७:०२