मलेसिया कामदार पठाएको आर्थिक विवरण पेस गर्न म्यानपावरलाई विभागको ताकेता

A+ A A-

वैदेशिक रोजगार विभागले नेपाल सरकार र मलेसिया सरकारबीच द्विपक्षीय श्रम सम्झौता भएको मितिदेखि म्यानपावर कम्पनी (इजाजतपत्रवाला संस्था) बाट मलेसिया पठाइएका श्रमिकहरूको रोजगारदातासहितको विवरण माग गरेको छ ।

विभागले म्यानपावर कम्पनीहरूलाई परिपत्र गर्दै म्यानपावर कम्पनीबाट कामदारहरूलाई मलेसिया पठाउँदा रोजगारदाताबाट प्राप्त भएको हवाई टिकट खर्च लगायतका सेवा शुल्कको आम्दानी तथा खर्चको विवरण विभागको वेभसाइटमा राख्न ७ दिन विवरण उपलब्ध गराउन सूचनामार्फत जानकारी गराएको छ ।

नेपाल र मलेसिया सरकारबीच सन् २०१८ मा द्विपक्षीय श्रम सम्झौता सम्पन्न भई हाल कार्यान्वयनको अवस्थामा रहेको छ । द्विपक्षीय सम्झौतामा उल्लेखित प्रावधानहरू बमोजिम मलेसिया जाने नेपाली कामदारहरूलाई आतेजाते हवाई टिकट, भिसा जारी तथा नवीकरण दस्तुर, लेवी लगायतका शुल्कहरू रोजगारदाताले नै व्यहोर्ने व्यवस्था छ ।

गत वैशाख १४ देखि १९ सम्म श्रम, रोजगार तथा सामाजिक सुरक्षामन्त्रीको नेतृत्वमा सम्पन्न मलेसिया भ्रमणको सिलसिलामा रोजगारदाता संस्थाहरूका प्रतिनिधिसमेतको उपस्थितिमा भएको द्विपक्षीय छलफलमा मलेसियाबाट कामदारको मागपत्र प्राप्त गर्न नेपाली व्यवसायीहरूबाट अस्वस्थ प्रतिपस्र्धा हुने गरेको विषयको उठान भएको थियो ।

व्यवसायीहरूले मागपत्र प्राप्त गर्नका लागि ठूलो रकमको चलखेल भएको भन्ने जानकारी प्राप्त भएकोले सो सम्बन्धमा तथ्यको खोजी गरी वैदेशिक रोजगारीमा भएको वा हुन सक्ने अनियमितालाई अन्त्य गरी सुरक्षित, व्यवस्थित र मर्यादित श्रम प्रशासनको व्यवस्थापन गर्ने सन्दर्भमा इजाजतपत्र प्राप्त संस्थाहरूको समेत सहयोग आवश्यक देखिएकोले विवरण माग गरिएको विभागले जनाएको छ ।