पाँच वर्षअघिको वर्चस्व गुमाउँदै बाँकेमा एमाले ‘क्लिनस्वीप’

A+ A A-

स्थानीय तहको निर्वाचनमा एमाले अघिल्लो निर्वाचनको वर्चस्व गुमाउँदै बाँकेमा क्लिनस्वीप भएको छ ।

२०७४ को निर्वाचनमा बाँकेका आठमध्ये चार तह जित्दै एमाले सबैभन्दा ठूलो दल बनेको थियो । त्यतिबेला जितेका खजुरा, बैजनाथ, कोहलपुर र जानकी गाउँपालिका एमालेले गुमाएको छ । बाँकेका ८१ वडामध्ये अघिल्लो चुनावमा ३१ वडा जितेकोमा यसपटक एमाले २१ वडामा खुम्चिएको छ । नरैनापुर र जानकी गाउँपालिकामा वडासमेत जित्न सकेको छैन ।

२०७४ मा एमालेको जितेको जानकी गाउँपालिका कांग्रेसले जितेको छ । कांग्रेसका छब्बन खाँ अध्यक्ष र रामप्यारी यादव उपाध्यक्ष निर्वाचित भएका छन् । यसैगरी एमालेले जितेको अर्को पालिका बैजनाथमा यसपटक कांग्रेसबाट प्रकाशबहादुर शाही अध्यक्ष र निर्मला रोकाय उपाध्यक्ष विजयी भएका छन् । त्यस्तै, एमालेले बहुमतसहित जितेको खजुरा गाउँपालिका सत्तारुढ गठबन्धनले जितेको छ । खजुरामा माओवादी केन्द्रका डम्बर विक अध्यक्ष र कांग्रेसकी मञ्जु मल्ल उपाध्यक्ष निर्वाचित भएका छन् ।

एमालेको अर्को गढ कोहलपुर पनि भत्किएको छ । २०४९ यताका तीनवटै स्थानीय निर्वाचन एमालेका लुटबहादुर रावतले जितेका थिए । यसपटक भने कांग्रेसका उम्मेदवारहरू विजयी भएका छन् । कोहलपुरको मेयरमा पूर्णबहादुर आचार्य र उपमेयरमा संगिता सुवेदी विजयी भएका हुन् ।

एमाले बाँके इन्चार्ज सूर्य ढकाल पाँच दलीय गठबन्धनलाई हल्का रूपमा लिँदा बाँकेमा नमिठो पराजय ब्यहोर्नुपरेको बताएका छन् । ‘गठबन्धन दलहरू एमालेले जितेका पालिकामा तालमेल गरेर आए’ ढकालले भने, ‘हामीले पाँचदलीय गठबन्धनलाई हल्का रूपमा लियौँ । समग्र मत हाम्रो धेरै भए पनि जित निकाल्न सकेनौँ ।’

उम्मेदवारी चयनमा कमजोरी भएको भने उनी स्वीकार्न तयार छैनन् । बाँकेमा उम्मेदवारी चयन गर्दा पालिका, जिल्लास्तरका नेता मात्र नभई स्थानीय जनमतसमेत बुझेर टिकट दिइएको ढकालको दाबी छ । ‘बैजनाथमा अलिकति अन्तर्घात भयो । अन्यत्र पार्टी र उम्मेदवारका कमजोरीले हारियो’, उनले भने, ‘तर, हामी उठ्नै नसक्ने गरी ढलेका छैनौँ । जनमत उत्साहजनक रहेकाले कमीकमजोरी सच्याएर प्रदेश र संघ जित्ने गरी लाग्छौँ ।’

बघौडा क्षेत्रको नरैनापुर गाउँपालिकामा जसपा दोहोरिएको छ । जसपाबाट अध्यक्षमा इश्तियाक अहमत शाह र उपाध्यक्षमा जयान्तीदेवी श्रीवास्तव पुनः निर्वाचित भएका छन् । नेपालगञ्ज उपमहानगरपालिकामा सत्ता गठबन्धनका तर्फबाट कांग्रेसका प्रशान्त बिष्ट मेयर र जसपाका कमरुद्धिन राई उपमेयरमा विजयी भएका छन् । त्यस्तै, डुडुवा गाउँपालिकामा कांग्रेस दोहोरिएको छ । कांग्रेसका नरेन्द्रकुमार चौधरी र शाहिदा बानो अध्यक्ष तथा उपाध्यक्ष निर्वाचित भएका छन् ।

प्रकाशित मिति: आइतबार, जेठ ८, २०७९ १२:५०