हेटौँडामा अन्तिम पाँच वडाको मतगणना जारी, कुन वडामा कसको पकड ?

A+ A A-

हेटौँडा उपमहानगरपालिकाको मतगणना रोमाञ्चक बनेको छ । ३० वर्षदेखि हेटौँडामा एकछत्र राज गर्दै आइरहेको एमालेलाई गठबन्धनले पछि पार्नु र सानो संगठन भएको राप्रपाले अप्रत्याशित मत ल्याउनुले कडा प्रतिस्पर्धा भइरहेको छ ।

एमालेबाट विभाजन भएर जन्मिएको पार्टी नेकपा एकीकृत समाजवादीकी मेयर उम्मेदवार मिनाकुमारी लामा निरन्तर अग्रता कायम गर्न सफल भएकी छन् । ६६ हजार ६ सय ६९ मतगाणना हुँदा २ हजार ८ सय ५३ मतको अग्रता राखेकी लामालाई एमालेका मेयर उम्मेदवार अनन्त पौडेलले पछ्याइरहेका छन् । लामाले २१ हजार ३ सय ८८ मत ल्याउँदा पौडेलले १८ हजार ५सय ३५ मत प्राप्त गरेका छन् । मेयरका अर्का उम्मेदवार राप्रपाका दिपकबहादुर सिंहले १७ हजार ६ सय ८९ मत ल्याए ।

हेटौँडाको १९ वटा वडाबाट कुल ७३ हजार ४ सय १४ खसेकोमा अब ६ हजार ७ सय ४५ मतगणना हुन बाँकी छ । हेटौँडा–२ सिदार्थ माविमा ९, १०, ११, १२, १३ नम्बर वडाको मत गणना भइरहेको छ । यी पाँच वडामध्ये ९, १० र ११ नम्बर वडा एमालेको पकड रहेको मानिन्छ । गत निर्वाचनमा यी तीनवटै वडा एमालेले जितेको थियो ।

१२ र १३ नम्बर वडा गठबन्धनको पकड रहेको मानिन्छ । मतगणना हुँदै गरेका पाँचमध्ये तीनवटा वडामा एमालेको राम्रो जनमत रहेको आकलन गरिरहँदा पौडेललाई अपेक्षा गरेअनुसारको मत भने नआएको पाइएको छ । हेटौँडा-१० को १ हजार ६ सय ७१ मतगणना गर्दा मेयरमा राप्रपाका सिंहले सबैभन्दा बढी ६ सय २५ मत ल्याएका छन् । लामालाई ३ सय ९४ मत प्राप्त हुँदा पौडेलले ४ सय ५५ मत ल्याए ।

वडाध्यक्षमा भने एमालेका उम्मेदवार सर्वाधिक ६ सय ७१ मत पाएका छन् । कांग्रेसका उम्मेदवारले ४ सय ७३, राप्रपाकाले १ सय ६९ र माओवादी केन्द्रका वडाध्यक्ष उम्मेदवारले २ सय १८ मत प्राप्त गरे । वडाध्यक्षमा एमालेका उम्मेदवारलाई आएको मत हेर्दा मेयरका पौडेललाई मत प्राप्त हुन सकेन । एमालेको मत सिंहलाई क्रम भएको देखिन्छ ।

हेटौँडा-११ को २ हजार ३ सय ८ मतगणना गर्दा राप्रपाका दिपक सिंहले सबैभन्दा बढी ८ सय ५ ल्याएका छन् । दोस्रोमा लामाले ६ सय १ र पौडेलले ५ सय ४१ मत प्राप्त गरे । ११ नम्बर वडा बागमतीका पूर्वमुख्यमन्त्री डोरमणि पौडेल, एमालेका केन्द्रीय सदस्य तथा पार्टी जिल्ला इञ्चार्ज रामेश्वर रानाको वडा हो ।

११ नम्बर वडा एमालेकी उपमेयर उम्मेदवार सुमित्रा काफ्लेको गृह वडा पनि हो । तर, काफ्लेले नै आफ्नो वडामा झिनो मतान्तर बनाउन सकेकी छन् । उनले हालसम्म ८ सय ३३ मत पाइन् भने गठबन्धनका बानियाँले ७ सय ९९ मत ल्याए । राप्रपाकी उपमेयर उम्मेदवार इन्दिरा न्यौपानेले २ सय ५ ल्याउन सफल भइन् ।

११ नम्बर वडामा वडाध्यक्षका उम्मेदवारले ८ सय २३, माओवादीका उम्मेदवारले ६ सय ७ र स्वतन्त्र उम्मेदवारले ४ सय ३३ मत प्राप्त गरे । एमालेकै गढ मानिएको ११ नम्बर वडामा वडाध्यक्षलाई आएको जति मत मेयरका उम्मेदवार पौडेलले पाउन सकेनन् । हेटौँडाको ९ नम्बर वडामा २ हजार २ सय १९ मतगणना गर्दा मेयरतर्फ लामाले सबैभन्दा बढी ६ सय ६६ मत ल्याएकी हुन् । पौडेलले ६ सय ५७ र सिंहले ६ सय २६ मत प्राप्त गरे । ९ नम्बर वडा मेयर उम्मेदवार पौडेलको गृहवडा पनि हो ।

९ नम्बर वडाबाट उपमेयर गठबन्धनलाई ८ सय ९५, एमालेलाई ४ सय ४, राप्रपालाई २ सय ७ मत आएको छ । वडाध्यक्षमा नेकपा एसलाई १ हजार १ सय ५३, एमालेलाई ६ सय ७८ र राप्रपालाई १ सय ६३ मत आएको छ ।

हेटौँडाको १३ नम्बर वडामा ३ हजार ३ सय ४६ मतगणना हुँदा मेयरमा लामाले १ हजार ५ सय ५१ मत पाएकी छन् । एमालेका पौडेलले ६ सय ५१ र राप्रपाका सिंहले ४ सय ४९ मात्रै मत पाएको निर्वाचन कार्यालयले जानकारी दिएको छ । उपमेयरमा गठबन्धनले १ हजार ४ सय २५, एमालेले ८ सय ६८ र राप्रपाले २ सय ९५ मत प्राप्त गरेको छ ।

वडाध्यक्षमा भने एमाले सबैभन्दा अगाडि छ । एमालेले १ हजार ८७ मत ल्याउँदा कांग्रेसले १ हजार ७४ मत प्राप्त गरेको हो । माओवादीका उम्मेदवारले ८ सय ९ मत पाए ।

प्रकाशित मिति: शुक्रबार, जेठ ६, २०७९ १३:४८