चार महिनामा कैलालीका चार पालिका जित्दै सुदूरपश्चिममा उदायो रेशम चौधरीको पार्टी

चार महिनामा कैलालीका चार पालिका जित्दै सुदूरपश्चिममा उदायो रेशम चौधरीको पार्टी

A+ A A-

रेशम चौधरी डिल्लीबजार कारागारमा छन् । तर, उनको अगुवाइमा खुलेको नागरिक उन्मुक्ति पार्टी कैलालीका चार पालिका जित्दै क्षेत्रीय पार्टीका रूपमा उदाएको छ ।

दक्षिणपूर्वी कैलालीका जोशीपुर गाउँपालिका, टिकापुर र भजनी नगरपालिकामा उनको पार्टीले सानदार जित हासिल गरेको छ । जानकी गाउँपालिकामा विपक्षीलाई फराकिलो मतान्तरले पछि पार्दै जित नजिक पुगेको छ ।

पार्टी गठन भएको छोटो समयमै प्राप्त उपलब्धि सन्तोषजनक रहेको नागरिक उन्मुक्ति पार्टीका संगठन विभाग प्रमुख लक्ष्मण चौधरी बताउँछन् । ‘हामीलाई समय पुगेन । त्यसैले चारवटा पालिका मात्र जित्ने स्थितिमा पुग्यौं,’ उनले भने । गत पुसमा गठन भएको सो पार्टीले थारु बाहुल्य रहेका सात पालिका जित्ने लक्ष्य लिएको थियो ।

आफूहरूले सांसद जिताएर पठाए पनि पाँच वर्षसम्म रेशम चौधरीलाई जेलमै राखिएकोप्रति यो भेगमा ठूलो असन्तोष छ । त्यो भावनालाई एकीकृत गर्दै रेशम चौधरीलाई जेल मुक्त गर्न आफूहरूलाई जिताउन आग्रह गर्दै भन्दै सो पार्टीले गाउँगाउँमा अभियान चलाएको थियो ।

‘यो टीकापुर घटनापछि थारु समुदायमाथि भएको दमनविरुद्धको जनमत हो,’ जानकीका अध्यक्ष उम्मेदवार गणेश चौधरीले भने, ‘नयाँ पार्टीलाई जुन ढंगको साथ सहयोग र माया जनताले दिएका छन् । त्यो भावनाको सम्मान गर्दै नागरिक उन्मुक्ति पार्टीबाट जितेका जनप्रतिनिधिले स्थानीय सरकार चलाउने छन् ।’

यी गाउँपालिका रेशम चौधरीले प्रतिनिधिसभा सदस्य जितेको कैलाली १ अन्तर्गतका हुन् । कैलालीलाई ‘अखण्ड’ सुदूरपश्चिममा नराख्न र छुट्टै थरुहट प्रदेशको माग गर्दै ७ भदौ २०७२ मा थारू समुदायले गरेको प्रदर्शनमा हिंसा भड्किएको थियो । त्यस क्रममा सात प्रहरी र एक बालक मारिएपछि राज्यबाट थारु समुदायमाथि चर्को दमन गरियो । टीकापुर घटनाका योजनाकारको आरोप लागेका रेशम चौधरी २०७४ को निर्वाचनमा कैलाली क्षेत्र नम्बर १ बाट प्रतिनिधिसभा सदस्यमा उम्मेदवार भई झण्डै २१ हजार मतको अन्तरले विजयी भए । तर, जिल्ला र उच्च अदालतले उनलाई दोषी करार गरेपछि अहिले पनि डिल्लीबजार कारागारमा छन् ।

टीकापुरमा नागरिक उन्मुक्ति पार्टीका रामलाल डगौरा थारु ३ हजार मतान्तरले जित हासिल गरेका छन् । उनले ९ हजार ६ सय ४२ मत ल्याई विजयी हुँदा उनका निकटतम प्रतिद्वन्द्वी नेपाली कांग्रेसका नवराज रावलले ६ हजार ६ सय ४२ मत ल्याएका छन् । उपमेयरमा भने माओवादी केन्द्रका खडकबहादुर शाह ७ हजार ९ सय ५५ मत ल्याई विजयी भए । नागरिक उन्मुक्ति पार्टीकी उम्मेदवार उल्कादेवी विश्वकर्माले ७ हजार ८ सय २ मत प्राप्त गरेकी छिन् ।

भजनी नगरपालिकामा पनि ३ हजार ७ सयको मतान्तरले नागरिक उन्मुक्ति पार्टीबाट मेयरमा केवल चौधरी विजयी भए । उनले ८ हजार ९ सय ६६ मत प्राप्त गर्दा माओवादी केन्द्रका शेरबहादुर चौधरी ५ हजार १९८ मत ल्याई पराजित भए । उपमेयरमा पनि उन्मुक्ति पार्टीकै राजु तिरुवा निर्वाचित भएकी छिन् । तिरुवाले ७ हजार ६ सय २२ मत प्राप्त गर्दा निकटतम प्रतिद्वन्द्वी कांग्रेसका गोकेन्द्र भण्डारीले ४ हजार ४९० मत पाएका छन् । भजनीका ९ वडामध्ये नागरिक उन्मुक्तिले तीनवटा, माओवादीले तीन, एमालेले दुई र कांग्रेसले एउटा वडा जितेको छ ।

जोशीपुर गाउँपालिका अध्यक्षमा नागरिक उन्मुक्ति पार्टीका चित्रबहादुर चौधरी ४ हजार ९ सय ३ मत ल्याई विजयी भएका छन् । उनले निकटतम प्रतिद्वन्द्वी कांग्रेसका बन्सराम वडायकलाई १ हजार ५ सय ३५ मतान्तरले हराएका हुन् । यस्तै, उपाध्यक्षमा नागरिक उन्मुक्ति पार्टीकै रेखादेवी कठरीया ४ हजार ५ सय ८१ मतसहित विजयी भएकी छन् । उनका निकटतम प्रतिद्वन्द्वी माओवादी केन्द्रका दीर्घराज बिनाडीले ३ हजार ९ सय ६१ मत ल्याएका छन् ।

मतगणना जारी रहेको जानकी गाउँपालिकामा रेशम चौधरीकै पार्टीका उम्मेदवारहरूले अग्रता लिएरहेका छन् । अध्यक्षमा गणेश चौधरी कांग्रेसका परशुराम महतौ कठरियाभन्दा झण्डै १ हजार ५ सयको अन्तरले अघि छन् । उपाध्यक्षमा सोही पार्टीकी लालमतीदेवी कठरिया एमालेकी गीता चौधरीभन्दा ७ सय मतले अगाडि छिन् । नौ वडामध्ये ८ र ९ नम्बर वडामा एमाले विजयी भइसकेको छ । ४, ५, ६ र ७ नम्बर वडामा उन्मुक्ति पार्टी जितिसकेको छ । अरु वडामा पनि आफ्नो पार्टीको पकड रहेको अध्यक्षका उम्मेदवार चौधरी बताउँछन् । ‘यहाँ हाम्रो जित पक्का जस्तै हो,’ उनले भने ।

प्रकाशित मिति: बिहीबार, जेठ ५, २०७९ १८:३३