युनिभर्सिटी अफ सेन्ट्रल लकांशायरको समूह राष्ट्रिय आविष्कार केन्द्रमा

A+ A A-

युनिभर्सिटी अफ सेन्ट्रल लकांशायर (युक्ल्यान) की डाइरेक्टर अफ इन्टरनेसनल रिक्रुटमेन्ट एलिसन डेन्टन, डाइरेक्टर साउथ एसिया गोविन्दसिंह विष्ट र बिज एजुकेसन यूकेका डाइरेक्टर हरि कार्कीसहितको समूहले राष्ट्रिय आविष्कार केन्द्रको औपचारिक भ्रमण गरेको छ ।

भ्रमणमा राष्ट्रिय आविष्कार केन्द्र र युक्ल्यानबीच हुँदै गरेको अनुसन्धान र विकासका बारेमा जानकारी गराउँदै केन्द्रका कार्यकारी अध्यक्ष हरि न्यौपानेले केन्द्रमा स्वागत गरे ।

सो अवसरमा केन्द्रका कार्यकारी अध्यक्ष न्यौपानेले बिज एजुकेसन यूकेका डाइरेक्टर हरि कार्कीलाई धन्यवाद दिँदै आविष्कार केन्द्रको आवश्यकता र औचित्यमा युक्ल्यानले पुर्‍याएको योगदानको उच्च कदर गर्दै युक्ल्यानकी डाइरेक्टर अफ इन्टरनेसनल रिक्रुटमेन्ट एलिसन डेन्टन, डाइरेक्टर साउथ एसिया गोविन्दसिंह विष्टलाई केन्द्रको भ्रमण गराए ।

केन्द्रको भ्रमणपश्चात् युक्ल्यानकी डाइरेक्टर अफ इन्टरनेसनल रिक्रुटमेन्ट एलिसन डेन्टनले पत्रकार सम्मेलनमार्फत युक्ल्यान र राष्ट्रिय आविष्कार केन्द्रको सहकार्यले नयाँनयाँ प्रविधिको विकासले नेपालको गरिबी निवारण गर्नुपर्ने र यसमा युक्ल्यानले सधैँ साथ दिने प्रतिबद्धता जनाइन् ।

युक्ल्यानका डाइरेक्टर साउथ एसिया गोविन्दसिंह विष्टले राष्ट्रिय आविष्कार केन्द्रका विद्यार्थीहरूले गरेका नयाँनयाँ प्रविधिको विकासको व्यावहारिक र व्यावसायिक प्रवर्द्धनमा युक्ल्यान सधैँ साथ रहने जानकारी गराए ।

बिज एजुकेसन यूकेका डाइरेक्टर हरि कार्कीले आफू नेपाली भएर प्रवासमा रहिरहँदा समग्र नेपालको दिगो विकासमा सोचिरहेको र हरेक प्रवासीहरूले नेपालको दिगो विकासमा लागिपर्नुपर्ने बताए ।

राष्ट्रिय आविष्कार केन्द्रका अध्यक्ष महावीर पुन गत महिना मात्र युनिभर्सिटी अफ सेन्ट्रल लकांशायर (युक्ल्यान) को भ्रमणमा गएका छन् । सो अवसरमा विश्वविद्यालयका उपकुलपति प्राध्यापक ग्राहाम बाल्डविनले पुनलाई विशेष सम्मान गर्दै आफ्नो विश्वविद्यालयमा स्वागत गरेका थिए । अध्यक्ष पुन अझै भ्रमणको सिलसिलामा युरोपमै छन् ।

प्रकाशित मिति: बिहीबार, जेठ ५, २०७९ १४:३३