'थारूको बच्चीले कसरी मेयर जित्छे र भन्थे, अब कामले जवाफ दिन्छुु'

A+ A A-

चितवनको माडी नगरपालिकाको मेयर पदमा नेकपा एमालेकी ताराकुमारी काजी महतो निर्वाचित भइन् ।

उनले पाँचदलीय गठबन्धनका उम्मेदवार नेकपा माओवादी केन्द्रका ऋषि काफ्लेलाई २ हजार १ सय ७२ मतान्तरले पराजित गरेकी हुन् । पछिल्लो ५ वर्ष उपमेयर भएर काम गरिसकेकी महतो माडीकी लोकप्रिय नेतृ हुन् ।

अघिल्लो स्थानीय निकायको निर्वाचनमा महतोले माडी नगरपालिकामा उपमेयरमा उठ्छु भन्ने सोचेकै थिइनन् । १२ वर्षदेखिको नगरपालिकाको जागिर र दुई जना छोरीको जिम्मेवारीले उनी राजनीतिमा धेरै सक्रिय हुन पनि पाउँदिनथिन् ।

पार्टीको शुभचिन्तक भए पनि सक्रिय राजनीतिमा आउँछु भनेर कहिल्यै नसोचेको महतो बताउँछिन् । उनले नगर कमिटीमा बसेर भने काम गरेकी थिइन् । उनका श्रीमान् जयराम महतो कर्मचारी संगठनमा काम गरे पनि माथिसम्म पहुँचवाला भने होइनन् ।

‘त्यतिबेला म उपमेयरमा उठ्छु भन्ने सोचेकी पनि थिइनँ । पार्टीले निर्णय गरेछ । मनोनयन दिनुभन्दा दुई दिनअघि मात्र जागिर छोडेको मैले,’ उनले भनिन् ।

उपमेयरको हैसियतले पाएको जिम्मेवारी पूरा गरेका कारण पार्टी र जनताले पत्याएको उनी बताउँछिन् । ‘मैले कुनै राजनीतिक पूर्वाग्रह राखिनँ । कुनै पनि कुरामा विवादित भइनँ । सबै नगरवासीलाई आफ्नै परिवारजस्तो सोचेर काम गरेँ । त्यही भएर पनि जनताले मलाई फेरि सेवा गर्ने मौका दिनुभयो,’ उनले भनिन् ।

उनले मेयरको टिकट पाउँदा आफ्नै पार्टीका साथीहरूले असन्तुष्टि जनाएका थिए । ‘थारूको बच्चीले के गर्न सक्छे, राजनीतिक पहुँच पनि छैन भनेर कुरा काट्थे । तर, म नगरवासीका घर–घरमा पुगेँ । चुनाव जितेँ भने पाँच वर्षमा मैले गर्ने थुप्रै योजनाहरू सुनाएँ । मैले गरेका सबै प्रतिबद्धताहरू पूरा गर्छु भनेँ । जनताले पनि मलाई विश्वास गर्नुभयो । मेरो आलोचना गर्नेहरूलाई कामले जवाफ दिन्छु,’ उनले भनिन् ।

अबको कार्यकालमा सामान्य जनताको आवश्यकतामा धेरै ध्यान दिने उनको सोच छ ।

चारैतिरबाट जंगलले घेरिएका कारण जंगली जनावरले जनधन, बालीनालीको क्षति गरिरहेकाले त्यो समस्या हटाउन केन्द्र सरकारसँग समन्वय गर्ने उनको तयारी छ ।

‘यो हाम्रो सानो नगरपालिकाको बजेटले धान्दैन । त्यसका लागि राज्यसँग सहयोग माग्छु,’ महतोले भनिन् ।

मध्यवर्ती क्षेत्रमा पर्ने माडीमा ठूला उद्योग, कारखाना खोल्न नमिल्ने भएकाले कृषि र पर्यटनमा ध्यान दिने उनको योजना छ । त्यस्तै, कृषिलाई आधुनिकीकरण गर्दै मलबिउमा अनुदान, लघु उद्यममा काम गरेर माडीका जनताको जीवनस्तर उकास्ने उनको योजना छ ।

त्यसैगरी सौराहसँग रुट जोडेर पर्यटक आवागमन बढाउने उनले बताइन् । ‘यहाँ अयोध्यालगायतका धेरै धार्मिकस्थलहरू छन् । हामीले यो ठाउँलाई धार्मिक पर्यटनको रूपमा पनि विकास गर्छौं,’ महतोले भनिन् । त्यस्तै, उनी उपमेयर हुँदा स्थानीयवासीहरूलाई सिकाएको सीपलाई कसरी सदुपयोग गर्ने भन्नेमा आफूले जोड दिने उनले बताइन् ।

प्रकाशित मिति: बिहीबार, जेठ ५, २०७९ १६:५९