एकाएक चुलिएको ‘बालेन चस्मा’को क्रेज

A+ A A-

यतिबेला काठमाडौं महानगरपालिकामा मेयरका स्वतन्त्र उम्मेदवार बालेन्द्र साह (बालेन) को चर्चा छ । चिया पसल, पत्रकार, विद्वत्‌वर्ग, कार्यालयदेखि चोक–चोकमा बालेनकै चर्चा छ ।

स्थानीय तहको निर्वाचनअघिसम्म बालेनको परिचय एक र्‍यापरका रूपमा मात्र थियो । तर, मतपरिणाममा उनको पक्षमा देखिएको जनलहरले उनलाई काठमाडौंको भावी मेयरका रूपमा चिनाउँदै लगेको भान हुन्छ ।

स्ट्रक्चरल इन्जिनियरसमेत रहेका बालेनको चर्चासँगै उनले लगाएको चस्मा र कोटले पनि चर्चा पाउन थालेको छ । उनले लगाएको चस्मालाई त ‘बालेन चस्मा’ भनेर नामै राखिएको छ ।

काठमाडौंबाटै एमालेका मेयर उम्मेदवार केशव स्थापित र कांग्रेसकी मेयर उम्मेदवार सिर्जना सिंहलाई पछि पार्दै बालेन यति बेला अग्र स्थानमा छन् । यसै त चर्चित भइरहेका बालेन, उनले लगाएको चस्मा र कोटले झनै उनलाई चर्चाको शिखरमा पुर्‍याउन थालेको छ ।

काठमाडौंको मख्खन टोलस्थित सुरज आर्केडमा ‘बालेन दाइको चस्मा’ नाम दिएर बालेनले लगाउने चस्मा खोज्ने युवायुवतीको घुइँचो लागेको त्यहाँका व्यवसायीहरू बताउँछन् । यस्तै, अनलाइन सपिङ कम्पनीहरूले पनि बालेन चस्माको मिमी बनाएर सामाजिक सञ्जालमा बिक्रीका लागि प्रचारप्रसार गरेको पनि हामीले छ्यापछ्याप्ती देखिरहेका छौँ ।

चर्चित बनेर सबैतिर छाइरहेका बालेनले चस्मा नलगाएको तस्वीर भने कमैले नियाल्नुभएको होला । अहिले चर्चित बनेका बालेनका तस्वीरहरू सामाजिक सञ्जालदेखि मिडियाहरूसम्म भाइरल देखिन्छन् । तर, ती सबै तस्वीरहरू चस्मासहितका नै छन् ।

विगत ६–७ वर्षदेखि न्युरोड, मख्खन टोलस्थित सुरज आर्केडमा चस्मा बेच्दै आएका सुमित खड्का ‘बालेनले लगाएको चस्मा’ भनेर चस्मा खोज्ने ग्राहकको संख्या बढ्दै गएको बताउँछन् । भन्छन्, ‘ग्राहकले यहाँ आएर सोध्ने भनेकै 'बालेन चस्मा' हो । धेरैजसो २० देखि ३० वर्ष उमेर समूहका ग्राहकले 'बालेन चस्मा' सोध्नुहुन्छ ।’

'बालेन चस्मा'को होलसेल मूल्य ५–७ सयदेखि १५–१६ सयसम्म पर्ने व्यवसायी खड्का बताउँछन् । उनका अनुसार चस्माको कुनै आधिकारिक नाम छैन । ‘त्यो चस्माको कुनै नाम पनि छैन । यी चस्मा चाइनिज हुन् । लेडिज जेन्स दुवैले लगाउन मिल्ले फेन्सी चस्मा हो । यसमा धेरै मोडेलहरू आउँछन् । बालेनले लगाएको भएर यो मोडेल चर्चित बनेको हो ।’ खड्काका अनुसार यो चस्मा लेडिज फेन्सी चस्मा हो तर लेडिज जेन्स दुवैले प्रयोग गर्न मिल्छ । उनको पसलमा दिनमा ८/१० जना ग्राहक भने 'बालेन चस्मा' भनेरै खोज्न आउने गरेका छन् ।

यो चस्माको कुनै ब्रान्ड छैन । ‘हामी आफैँले अर्डर गर्दा जुन ब्रान्ड लेख्न लगायो, त्यही लेखिएर आउने हो । चाइनाबाट ल्याउँदा रेवन ब्रान्ड लेखेको चस्मालाई अलि बढी भन्सार लागेको भएर ‘रेवन’ ब्रान्डको चस्मालाई अलि महँगो पर्छ,’ खड्काले भने । यो चस्मा रातो, सेतो, कालो तथा गोल्डेन रङमा पनि पाइने उनले बताए ।

धेरैले बालेनको चस्माको तारिफ गरेका छन् भने चस्माको आलोचना गर्ने पनि उत्तिकै भेटिन्छन् । आममानिसको प्रश्न छ, ‘बालेनले लगाउनुभन्दा अगाडि निस्किएको चस्मा हो । 'बालेन चस्मा' नै किन भन्ने ?’ यो चस्मा बजारमा पहिला नै आइसकेको भए पनि बालेनले लगाएर चर्चित बनेपछि यसको चर्चा अझ बढेको खड्का बताउँछन् ।

त्यस्तै, चाबहिलमा विगत ६ वर्षदेखि सुप्रिम सुट्ल्यान्ड नामक टेलर चलाउँदै आएका सुजन खतिवडाले पनि सामाजिक सञ्जालमा ‘बालेन कोट’ भनेर नीलो कोट लगाएको बालेनको तस्वीर राखेका छन् ।

सामाजिक सञ्जालमा बिहान मात्र राखेको बालेनको तस्वीर हेरेर पाँच–छ जना ग्राहक कोटका बारेमा सोध्न पसलमा आइसकेका पनि छन् । भन्छन्, ‘अब अहिले सबैतिर बालेनको चर्चा छ । जहाँ गयो त्यहीँ बालेनको कुरा हुन्छ । मैले पनि ट्रेन्ड फलो गरेको हुँ । यसो रमाइलोका लागि राखेको नि ।’

बालेनको तस्वीरमा देखिएको नीलो कोट इन्डियन कपडाको रहेको खतिवडाले बताए । उनका अनुसार 'बालेन कोट'को कपडा र ज्याला गरेर सेट (कोट, पेन्ट, सट र वाक्स कोट) को जम्मा मूल्य १३ हजार ५ सय रुपैयाँ पर्छ ।

प्रकाशित मिति: बुधबार, जेठ ४, २०७९ १९:४८