एमालेले टिकट नदिएपछि स्वतन्त्र उठेर ३५ वर्षे युवाले जिते गाउँपालिका अध्यक्ष, तीन वडामा स्वतन्त्रकै प्यानल

एमालेले टिकट नदिएपछि स्वतन्त्र उठेर ३५ वर्षे युवाले जिते गाउँपालिका अध्यक्ष, तीन वडामा स्वतन्त्रकै प्यानल

A+ A A-

एकातिर नेपाली कांग्रेस, माओवादी केन्द्र र एकीकृत समाजवादीकाे गठबन्धन । अर्कातिर आफूले विद्रोह गरेको पार्टी नेकपा एमाले, जसले अघिल्लाे चुनावमा गाउँपालिका अध्यक्ष, उपाध्यक्षसहित छवटा वडा जितेकाे थियाे ।

विशाल चुनौतीलाई विपक्षी बनाएर चुनावी मैदानमा होमिएका ३५ वर्षे सन्तोषप्रकाश जोशीले स्वतन्त्र उम्मेदवारी दिएर बैतडीको डिलासैनी गाउँपालिका अध्यक्ष जितेका छन् । उनले आफू मात्र होइन, तीन वडामा स्वतन्त्र समूहको प्यानलै निर्वाचित गराए । चुनावअघि उनीहरू एमालेका सक्रिय कार्यकर्ता थिए ।

स्वतन्त्र समूह ।

गाउँपालिकामा सन्ताेषकाे व्यक्तिगत प्रभाव राम्राे छ । खासगरी युवा जमातमा उनी लाेकप्रिय छन् । अघिल्लाे चुनावमा सिफारिस भएर टिकट नपाएका उनी यसपालि पनि एमालेबाट गाउँपालिका अध्यक्षमा सिफारिस भएका थिए । एमालेले उम्मेदवार बनाउने विश्वासमा उनले प्रचारप्रसारसमेत थालिसकेका थिए । तर, अन्तिममा जिल्ला कमिटीले अक्कल रानालाई टिकट दियो ।

स्वतन्त्रबाट वडा नम्बर ५ का अध्यक्ष जितेका २८ वर्षे यज्ञराज भट्टकाे भनाइमा अक्कललाई जिल्ला अध्यक्ष सुरेन्द्र पालले व्यक्तिगत निकटताकै आधारमा उम्मेदवार बनाए । यसपछि एमालेकाे जिल्ला र प्रदेश नेतृत्वसँग असन्तुष्ट सन्ताेषसहितका केही युवाले विद्राेह गरे । उनीहरूले स्वतन्त्र उम्मेदवारी हाले । र, चुनाव चिह्न ‘पुतली’ लिएर प्रचारप्रसारलाई निरन्तरता दिए ।

अन्तिम मतपरिणाम सार्वजनिक हुँदा गठबन्धनबाट माओवादीका अध्यक्ष उम्मेदवार लोकेन्द्रबहादुर राना र एमालेका अक्कल रानालाई उनले पछि पारिदिए । निर्वाचन आयोगका अनुसार ३ हजार १ सय ८९ मतका साथ सन्ताेष निर्वाचित हुँदा तीन दलीय गठबन्धनबाट माओवादीका लाेकन्द्रबहादुरले २ हजार ६ सय ५१ र एमालेका अक्कलले २ हजार ५ सय ५७ मत पाए ।

यति मात्र हाेइन, एमालेमा विद्राेह गरी स्वतन्त्र उम्मेदवारी दिएकाे स्वतन्त्र समूहले वडा नम्बर ४, ५ र ७ मा प्यानल नै जितेकाे छ । वडा नम्बर ४ काे वडाध्यक्षमा हरिदत्त पन्त, सदस्यहरूमा अमरसिंह बाेहरा र विनाेदबहादुर विष्ट, महिला सदस्यमा शारदा बाेहरा र दलित महिला सदस्यमा हरना सार्की विजयी भए ।

वडा नम्बर ५ काे अध्यक्षमा यज्ञराज भट्ट, सदस्यहरूमा नवराज गिरी र गाेपालदत्त जाेशी, महिला सदस्यमा दुर्गा धामी र दलित महिला सदस्यमा नारुली भुल निर्वाचित भएकी छन् । वडा नम्बर ७ काे अध्यक्षमा प्रकाशमणि भट्ट, सदस्यहरूमा गणेश धामी र गणेशसिंह साउद, महिला सदस्यमा तुलसी धामी र दलित महिला सदस्यमा निर्मला लुहार चुनिएका छन् ।

अध्यक्षमा निर्वाचित सन्ताेष जाेशी ।

सन्ताेषसहितकाे टिमले छोडेको एमाले पार्टी दुइटा वडामा सीमित भयो । तीन दलीय गठबन्धनको नेतृत्व गरेको कांग्रेसले उपाध्यक्षसहित दुइटा वडामा चित्त बुझाउनुपर्‍यो ।

राजनीतिशास्त्र र समाजशास्त्रमा स्नातकाेत्तर सन्ताेष स्वास्थ्य सहायक (एचए) पनि हुन् । उनले दार्चुलामा चार वर्षजति जनस्वास्थ्य अधिकृत भएर काम गरेका थिए । एमालेमा विद्राेह गरेसँगै उनले अनेरास्ववियु केन्द्रीय कमिटी र युवा संघ नेपालकाे केन्द्रीय सचिवबाट राजीनामा दिइसकेका छन् ।

कसरी सम्भव भयाे जित ?

तीन दलका संयुक्त उम्मेदवार र पुरानै वर्चस्वधारी एमालेलाई पराजित गर्नु चानचुने कुरा थिएन । यो कसरी सम्भव भयो ? वडा नम्बर ५ का अध्यक्ष निर्वाचित भट्टका अनुसार, उनीहरू केही वर्षदेखि गाउँपालिकावासीका समस्या, निर्वाचित जनप्रतिनिधिका काम नियालेर बसेका थिए । साथै, सडक बनाउने काममा पनि स्वयंसेवकका रूपमा खटिएका थिए । उनीहरूले चुनावका लागि माहौल निकै राम्रो बनाएका थिए । जनताले नै गाउँपालिका अध्यक्षमा सन्तोष जोशीको माग गरिरहेका थिए ।

वडा कमिटी, पालिका कमिटीबाट सन्तोष जोशीको नाम पहिलो सिफारिसमा परेको थियो । 'तर, पार्टीका जिल्ला अध्यक्ष सुरेन्द्र पालले अर्कै नाम प्रदेशमा सिफारिस गरिदिनुभयो । जबकि, जनतामाझ बसेर हामी काम गरिरहेका थियौँ । एमालेबाट अरु जो आए पनि चुनाव जित्ने सम्भावना थिएन', भट्टले भने, 'पार्टीले जतिसुकै बेइमानलाई औँला देखाए पनि त्यसैलाई नेता मानेर हिँड्न हामीलाई स्वीकार्य भएन । त्यसैले विद्रोह गर्‍यौँ ।'

सन्तोष जोशीको टिम आज गाउँमा विजय जुलुसमा व्यस्त छ । एमालेले उम्मेदवार बनाएको हुन्थ्यो भने शायद त्यो जुलुसबाट आज पहिले 'एमाले जिन्दावाद', त्यसपछि 'सन्तोष जोशी' जिन्दावाद भन्ने हुटिङ सुनिन्थ्यो । तर, समर्थकहरू केवल सन्तोष जोशी जिन्दावाद भन्दै उत्सव मनाइरहेका छन् ।

प्रकाशित मिति: मंगलबार, जेठ ३, २०७९ १५:३८