असारे विकासकाे बहाना : गाेष्ठी र सेमिनारमा कराेडाैं स्वाहा

A+ A A-

प्रदेश- ५ मा असार लागेपछि बजेट सिध्याउने गरी दिनहुँ गोष्ठी, तालिम, सेमिनार र अन्तर्क्रिया कार्यक्रमह भइरहेका छन् । सामाजिक विकास मन्त्रालय, भूमि व्यवस्था कृषि तथा सहकारी मन्त्रालय, आर्थिक मामिला तथा कानुन, उद्योग, पर्यटन, वन तथा वातावरण मन्त्रालय र भौतिक पूर्वाधार तथा विकास मन्त्रालय सबैमा गरी असारको १५ दिनमै १ अर्ब ५५ करोड रुपैयाँ खर्च गरेका छन् ।

प्रदेश लेखा नियन्त्रण कार्यालय बुटवलका अनुसार असार महिनाको १५ दिनमा मात्रै १ अर्ब ५५ करोड भुक्तानी भएको छ । कार्यालयका सूचना अधिकारी रवीन्द्र अर्यालले चालुतर्फ ४६ करोड र पुँजीगत १ अर्ब ८ करोड रुपैयाँ खर्च भएको बताएका छन् । जेठ मसान्तसम्म ४ अर्ब ७५ करोड १३ लाख बजेट खर्च भए पनि असारको १ देखि १६ गते सम्म १ अर्ब ५५ लाख खर्च भएको छ, उनले भने मसान्तसम्ममा अझ बढी खर्च हुने देखिएको छ ।

पाँच नम्बर प्रदेश सरकारले असार २३ सम्म पुँजीगत तर्फ ६ अर्ब ५८ करोड खर्च गरेको छ । प्रदेश ५ ले चाल्र आर्थिक वर्षका लागि २८ अर्ब १० करोडको बजेट ल्याएको थियो । त्यसको बढीमा ६० प्रतिशत खर्च हुने अनुमान गरिएको छ ।

मन्त्रालयहरुले बुटवल र भैरहवाका होटलमा गोष्ठी गरेरै बजेट सक्ने काम गरिरहेका छन् । राष्ट्रिय जनता पार्टीकी सांसद कल्पना पाण्डेले बजेट सक्नकै लागि मन्त्रालयहरुले असारमा कोठे गोष्ठी र छलफलमा करोडौं रुपैयाँ सकेको बताइन् । गोष्ठीबारे संसदको चौथो अधिवेशनमा करोडौं रुपैयाँ खर्च भएको भन्दै सांसदहरुले आवाज उठाएका थिए ।

सांसदहरुले उठाएको जवाफमा सामाजिक विकासमन्त्री सुदर्शन बरालले जनचेतनामूलक कार्यक्रम भएकै कारण गोष्ठी र छलफल गर्नुपरेको बताएका थिए ।

सामाजिक विकास मन्त्रालयले मात्रै असार लागेपछि आधा दर्जन बढी गोष्ठी गरेको छ । ती गोष्ठी उद्देश्य परक भन्दा पनि बढी ‘कर्मकाण्डी’ हुने गरेका छन् । यी कार्यक्रममा प्रदेशले नै जारी गरेको मापदण्ड, कार्यविधि र मितव्ययितासम्बन्धी निर्देशिका–२०७५ कै उल्लंघन गरिएको छ । एउटै गोष्ठीमा प्रतिव्यक्ति २ हजारसम्म भत्ता बाँड्ने गरिएको छ । मन्त्रालयहरुले दैनिक रुपमा कार्यक्रम भइरहेकाले यथार्थ विवरण अझै तयार नभएको बताएका छन् । कर्मचारी समायोजनका कारण ग्याप भयो, थोरै कर्मचारी आए त्यसले असारमा बढी काम भएको हो, सामाजिक विकास मन्त्रालयका सूचना अधिकारी लक्ष्मण भण्डारीले भने ।

प्रकाशित मिति: शनिबार, असार २८, २०७६ २३:०५