उपमेयर उम्मेदवारबिनाकाे रुखमा ललितपुरे कांग्रेसीको भोट, चिरीबाबु चम्किँदा माओवादीका बाबुराजलाई मुस्किल

उपमेयर उम्मेदवारबिनाकाे रुखमा ललितपुरे कांग्रेसीको भोट, चिरीबाबु चम्किँदा माओवादीका बाबुराजलाई मुस्किल

A+ A A-

ललितपुर महानगरपालिकामा कांग्रेसी मतदाताले गठबन्धनप्रतिको अरुचि मतदानबाट प्रकट गरेका छन् । मेयरमा कांग्रेसलाई माओवादी केन्द्रले र उपमेयरमा माओवादी केन्द्रलाई कांग्रेसले सघाउने सहमति गठबन्धनमा भए पनि कांग्रेसी मतदाताले माओवादीलाई भोट नहालेर असन्तुष्टि बोलेका हुन् । उपमेयर नै नभएको रुखमा १३ सय ९३ मत परेको छ । यति भाेट माओवादी केन्द्रका उपमेयर उम्मेदवारले पाएकाे भए गठबन्धन दुवै प्रमुख पदमा अगाडि हुन्थ्याे । तर कांग्रेसीले भाेट नहालेकाले माओवादी केन्द्रका बाबुराज वज्राचार्य ८ सय ९२ मतले एमालेकी मञ्जली शाक्यभन्दा पछाडि छन् । उम्मेदवारबिनाकाे रुखमा गएकाे सबै भाेट बाबुराजले पाएका भए उनी यतिबेला ६ सय १ मतले मञ्जलीभन्दा अगाडि हुन्थे ।

ललितपुर महानगरमा ३० वैशाखमा खसेका मतहरू गन्ने काम जारी छ । यो समाचार तयार पार्दासम्म २९ मध्ये चारवटा वडाका मतपेटिका उघारिएकाे छ ।

वडा नम्बर १ मा स्वतन्त्र उम्मेदवार निर्मल तण्डुकार विजयी भइसकेका छन् । २, ३ र ४ मा मतगणना जारी छ । यीमध्ये २ र ३ मा गठबन्धनमा आबद्ध नेकपा एसले जित्ने सम्भावना छ । मेयर र उपमेयरमा गठबन्धन गरे पनि ललितपुर महानगरका अधिकांश वडामा कांग्रेस-माओवादी-एस एक्लाएक्लै भिडेका छन् ।

मेयरमा गठबन्धनका तर्फबाट कांग्रेसका उम्मेदवार चिरीबाबु महर्जनले सुरुदेखि नै अग्रता लिइराखेका छन् । पछिल्लाे मतपरिणामअनुसार, एमालेका हरिकृष्ण ब्यञ्जनकारभन्दा ३३ सय ५२ मतले चिरीबाबु महर्जन अगाडि छन् । उनले ५४ सय ४७ मत पाउँदा हरिकृष्णले २ हजार ९५ मत ल्याएका छन् । तर, गठबन्धनकै तर्फबाट उपमेयर उम्मेदवार माओवादी केन्द्रका वज्राचार्य भने एमालेकी मञ्जली शाक्यभन्दा झन् झन् पछि पर्दै गएका छन् ।

पछिल्लो मतपरिणामअनुसार एमालेकी मञ्जलीले २५ सय ६३ मत पाउँदा बाबुराजले १७ सय ७१ मत ल्याएका छन् । जबकि, उपमेयर नै नभएको रुखमा १३ सय ९३ मत परेको छ । मेयर र उपमेयर उम्मेदवार नै नभएको नेकपा एसकाे कलम चिह्नमा समेत भोट परेको देखिन्छ ।

अहिले मतगणना भइरहेकाे कुपण्डाेल, सानेपा, जावलाखेल, झम्सीखेल, पुल्चाेक, धाेविघाटकाे आधा भाग पर्ने वडाहरूकाे हाे, जहाँ माओवादीको प्रभाव खासै राम्रो मानिँदैन । यी क्षेत्रबाट कांग्रेस र एसबाट मत पाइने माओवादीको आस थियाे । तर, उसको अपेक्षाविपरीत ललितपुरे कांग्रेसीले उपमेयरमा पनि झ्यापझ्याप रुखमै भोट हालिदिएका छन् ।

वडा नम्बर १ मा आफ्नै बागी उम्मेदवारलाई जिताएका कांग्रेसीले मेयरमा चिरीबाबुलाई नै भोट दिए पनि उपमेयरमा बाबुराजलाई भोट दिन कञ्जुस्याइँ गरेकाे देखियाे । २ र ३ नम्बर वडामा नेकपा एसको राम्रो पकड छ । यी वडाबाट पनि चिरीबाबुलाई जतिले भोट हाले उपमेयरमा बाबुराजलाई त्योभन्दा निकै कम भोट आयो । ‘कांग्रेसका साथीहरूबाट हामीलाई अपेक्षाकृत सहयोग मिलेन’, माओवादी केन्द्रका ललितपुर इञ्चार्ज हरि दाहालले भने । दाहालकै जोडबलमा उपमेयरमा बाबुराजले मौका पाएका हुन् ।

भैँसेपाटी, खोकना, बुङमती, सुनाकोठी, धापाखेल, हरिसिद्धिमा मत बढ्ने उनकाे विश्वास छ । मतगणनास्थलमै रहेका कांग्रेस नेता चन्द्र महर्जन उपमेयरमा महानगरकाे बाहिरी भेगबाट अपेक्षाकृत भाेट आउन नसके पनि कोर सिटीभित्रका बाँकी वडामा भोट बढ्ने दाबी गर्छन् । 'बाहिरी भेगमा अलिकति पपुलर भएन । काेर सिटीभित्र आइसकेपछि राम्रै हाेला', उनले भने ।

ललितपुर एसका नेता हरिबहादुर थापा गठबन्धनका उपमेयर उम्मेदवारलाई भोट कम आउनुका तीन कारण औँल्याउँछन् । पहिलो, मतदाताले झुक्किएर आफ्नो पार्टीको सबै पदमा छाप हाने । दोस्रो, उम्मेदवार नरुचाएका हुन सक्छन् । तेस्रो, ललितपुर महानगरमा माओवादी केन्द्रको संगठन कमजोर हुनु हो । ‘बाबुराजजीको व्यक्तिगत प्रभाव पनि राम्रो देखिएन’, उनले भने ।

ललितपुर १ का नवनिर्वाचित वडाध्यक्ष निर्मल तण्डुकारको बुझाइमा जनताले गठबन्धन रुचाएनन् । ‘नेताले काँध मिलाएर मात्र कहाँ हुँदो रहेछ र, जनताले आफ्नो अरुची ब्यालेटमा खसालेर देखाइदिए’, उनले भने । तण्डुकार कांग्रेसले टिकट नदिएपछि स्वतन्त्र उम्मेदवारी दिएर कांग्रेसलाई तेब्बर बढी मतले पराजित गरेका उम्मेदवार हुन् ।

माओवादी केन्द्रले उपमेयरमा उठाएका बाबुराजलाई आफूले यसअघि नचिनेको उनको भनाइ छ । ‘ललितपुरे जनतामाझ उहाँको खासै प्रभाव थिएन । हामीजस्ता जनप्रतिनिधिले त चिनेनौँ भने जनताले के चिनेका थिए होलान् त !’

बाबुराजलाई अबको आशा भनेको वडा नम्बर १६ र ८ बाट छ । १६ नम्बर उनको गृहवडा हो । तर, यहाँ उनलाई अर्को अप्ठेरो छ । वडा नम्बर १६ एमालेकी उपमेयर उम्मेदवार मञ्जलीको पनि गृहवडा हो । पहिला यहाँ कांग्रेसले जितेको थियो । कांग्रेसीले उपमेयर उम्मेदवार नै नभएको रुखमा भोट हालेका भए बाबुराज यहाँ पनि पछि पर्नेछन् । अरु वडाको तुलनामा वडा नम्बर ८ मा माओवादीको संगठन राम्रो भएकाले बाबुराजले मञ्जलीसँगको मतान्तर घटाउन सक्छन् । ‘यसबाहेक अन्य वडाको परिणाम खासै सन्तोषजनक आउला भन्ने लाग्दैन’, मेयर, उपमेयरमा कांग्रेस-माओवादीलाई सघाएको एसका नेता थापाले भने ।

हुन पनि, कांग्रेसको प्रभाव रहेको वडाबाट बाबुराजको भोट बढ्ने सम्भावना न्यून रहेको प्रारम्भिक मतपरिणामले देखाएको छ । मेयर, उपमेयरमा सघाएको एसलाई वडामा माओवादी र कांग्रेसले नसघाउनुले पनि केही असर पारेको एसका नेता थापाको अनुमान छ । उनकाे अनुमान सही भए, एसको पकड रहेका अन्य केही वडाबाट पनि बाबुराजलाई कम मत आउनेछ ।

बाबुराज र मञ्जली छिमेकी हुन् । अघिल्लो चुनावताका उनीहरू माओवादी केन्द्रमै थिए । मञ्जली ललितपुर महानगरको इञ्चार्ज हुँदा बाबुराज अध्यक्ष थिए । उनी अहिले पनि महानगरकाे अध्यक्ष नै हुन् । ०७४ सालको चुनावमा माओवादीबाट उपमेयरकाे टिकट पाए पनि मतदाता नामावलीमा सूचीकृत नभएकाले मञ्जलीले चुनाव लड्न पाएकी थिइनन् । पछि माओवादी-एमाले मिलेर नेकपा अनि फेरि नेकपा विघटन भई माओवादी-एमाले ब्युँतिदा मञ्जली एमालेमै बसिन् । एमाले अध्यक्ष केपी ओलीकी पत्नी राधिका शाक्यसँग निकटताका कारण मञ्जलीले माओवादी त्यागेकी थिइन् ।

प्रकाशित मिति: सोमबार, जेठ २, २०७९ १२:५९