प्रसूति गृह र वीर अस्पतालको पुनर्निर्माण सकियो

A+ A A-

काठमाडौंको थापाथलीस्थित परोपकार प्रसूति तथा स्त्री रोग अस्पतालको पुनर्निर्माण सम्पन्न भएको छ । प्रधानमन्त्री केपी शर्मा ओलीले अत्याधुनिक सुविधासहितको भवनको उद्घाटन गरेका हुन् ।

जापानी सहयोग नियोग (जाइका)को सहयोगमा भवनको पुनर्निर्माण गरिएको हो । २०७२ को भूकम्पको कारण भवन भत्किएपछि नयाँ बनाइएको हो । नयाँ भवनमा १ सय ८२ शय्या छन् । ४ सय १५ शय्याकोे अस्पताल भूकम्पपछि ३ सय शय्यामा झरेको थियो ।

नयाँ भवनमा २४ शय्याको आकस्मिक कक्ष, चिकित्सकको निगरानीमा हुने डेलिभरी रुम, नर्सको निगरानीमा हुने बर्थिङ सेन्टर, १२ शय्याको एमआईसीयू (आमाका लागि) र ४० शय्याकाे बच्चाको आईसीयू छन् ।

भवनको उद्घाटन गर्दै प्रधानमन्त्री ओलीले देशभरका अन्य अस्पतालभन्दा परोपकार प्रसूति तथा स्त्री रोग अस्पतालमा अत्याधुनिक सुविधा भएको बताए ।

‘अस्पतालमा भएका केही समस्याको सम्बन्धमा सरकारको ध्यानाकर्षण भएको छ, अस्पतालमा कुनै पनि प्रकारको कमी र कमजोरी हुन नदिन सरकार प्रतिबद्ध छ,’ प्रधानमन्त्री ओलीले भने ।

६ दशकअगाडि ४० शय्याबाट सुरु भएको प्रसूति गृह संसारभर धेरै प्रसूति सेवा दिने अस्पतालमध्येमा पर्नेे अस्पतालका निर्देशक जागेश्वर गौतमले बताए । निर्देशक गौतमका अनुसार गत वर्ष अस्पतालमा २० हजार ६ सय ८० जनाले सेवा लिएका थिए भने अहिले यो संख्या बढ्ने निर्देशक गौतम बताउँछन् ।

निर्देशक गौतमका अनुसार अस्पतालमा आउने गर्भवतीमध्ये ७१ प्रतिशत महिलाको नर्मल डेलिभरी हुन्छ भने २९ प्रतिशत महिलाको अप्रेसन गरी बच्चा जन्माइने गरिएको छ । प्रसूति गृहको अत्याधुनिक मुख्य भवनमा १ सय ८२ वटा शय्या छन् ।

नयाँ प्रविधिको उपयोग गरिएको भवनमा पानीको धारामा सेन्सर जडान गरिएको छ । भुइँ तलामा इमर्जेन्सी सेवा, ३ वटा अपरेसन थिएटरसहित प्रसूति सेवा, एएनसी तथा एक्टिभ लेबर बेड राखिएको छ । अस्पतालको आफ्नै फार्मेसी छ ।

त्यस्तै, पहिलो तल्लामा १० वटा डेलिभरी एकैसाथ गर्न सकिने प्रसूति कक्ष, पोस्ट अपरेटिभ वार्ड छन् । साथै ब्लड बैंक, स्पेसल केयर बेबी युनिट, कन्फरेन्स हल र पुस्तकालयको पनि व्यवस्था गरिएको छ ।

५४ प्रतिशत स्वास्थ्य संस्थाको पुनर्निर्माण

भूकम्पले क्षतिग्रस्त भएका ३१ जिल्लाका १ हजार ९ सय २८ स्वास्थ्य संस्थामध्ये ३ सय १५ स्वास्थ्य संस्था पूर्ण रुपमा क्षति भएका थिए । यस्तै, ३ सय ३९ स्वास्थ्य संस्था आंशिक र २ सय ८२ स्वास्थ्य संस्थामा न्यून क्षति भएको थियो । जसमध्ये ५४ प्रतिशत स्वास्थ्य संस्थाको पुनर्निर्माण सकिएको छ ।

यस्तै, १२ प्रतिशत स्वास्थ्य संस्थाको पुनर्निर्माण जारी रहेको राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीले जानकारी दिए । भूकम्पले दिएको क्षति दुःखदायी भए पनि यसलाई अवसरको रुपमा लिएर संरचनालाई आधुनिकीकरण गर्दै पुनर्निर्माण गरिएको प्रमुख कार्यकारी अधिकृत ज्ञवालीको भनाइ छ ।

स्त्री रोग र प्रसूति रोग छुट्टाछुट्टै भवनमा

प्रसूति गृहका निर्देशक डा. गौतमले स्त्री रोग तथा प्रसूति सेवाको एकै भवनमा उपचार गराउनुपर्ने समस्या हटेको बताए । स्त्री रोगको उपचार पुरानो भवनमा हुनेछ भने प्रसूति सेवा नयाँ भवनमा हुनेछ ।

नयाँ भवन बनेपछि अस्पतालले एकै समयमा दिने सेवाको आधारमा सात जना गर्भवतीको अप्रेसन गर्न सकिने र २० जनाले एकै समयमा बच्चा जन्माउन सक्ने निर्देशक डा. गौतमले बताए ।

प्रत्येक प्रदेशमा एउटा विशिष्टी अस्पताल

काठमाडौं बाहिर पनि प्रसूतिसम्बन्धी अत्याधुनिक अस्पताल स्थापना गर्ने योजना रहेको उपप्रधान एवम् स्वास्थ्य तथा जनसंख्यामन्त्री उपेन्द्र यादवले बताए । कार्यक्रमलाई सम्बोधन गर्दै मन्त्री यादवले काठमाडौं बाहिर पनि प्रसूतिसम्बन्धी अत्याधुनिक अस्पताल स्थापना गर्ने योजना तय गरिएको बताएका छन् ।

वीर अस्पताल पनि बनिसक्यो

यस्तै, वीर अस्पतालको एउटा भवनको पुनर्निर्माण पनि सपन्न भएको छ । उपप्रधान, स्वास्थ्य तथा जनसंख्यामन्त्री उपेन्द्र यादवले वीर अस्पतालमा पुनर्निर्माण गरिएको भवनको उद्घाटन गरेका हुन् ।

भूकम्पबाट क्षति भएका स्वास्थ्य संस्थाका पूर्वाधारको पुनर्निर्माण कार्यक्रमअन्तर्गत नेपाल सरकार र जापान सरकारबीच भएको द्विपक्षीय सम्झौताअनुसार जापान अन्तर्राष्ट्रिय सहयोग नियोग (जाइका)को प्राविधिक तथा आर्थिक सहयोगमा स्वास्थ्य तथा जनसंख्या मन्त्रालयमार्फत वीर अस्पतालको पनि पुनर्निर्माण गरिएको हो ।

पुनर्निर्माण गरिएको वीर अस्पतालमा ९४ शय्या छन् । प्रसूति गृह र वीर अस्पताल निर्माणको लागत २ अर्ब ३६ करोड रुपैयाँ रहेको प्राधिकरणले जानकारी दिएको छ ।

नेपालका लागि जापानका राजदूत मासामिची साइगोले भूकम्पपछिको पुनर्निर्माणमा सहयोग गर्न पाएकोमा खुसी व्यक्त गर्दै पुनर्निर्माण सम्पन्न भएका अस्पतालबाट सेवा प्रवाह पनि बढ्ने विश्वास व्यक्त गरे ।

प्रकाशित मिति: शनिबार, असार २८, २०७६ ०३:१२