डडेल्धुराका चिकित्सकलाई काठमाडौं फर्किन आग्रह

A+ A A-

सरकारी चिकित्सक संघ नेपाल (गोदान)ले डडेल्धुरा अस्पतालमा कार्यरत सबै चिकित्सकलाई काठमाडाैं फर्किन आग्रह गरेको छ । जिल्लामा चिकित्सकमाथि असुरक्षा बढेको भन्दै संघले उनीहरुलाई काठमाडौं हाजिर हुन भनेको हो।

‘सुरक्षाको शत प्रतिशत ग्यारेन्टी नभएसम्म र दोषीलाई तत्काल हिरासतमा लिएर अनुसन्धान नगरिएसम्म अस्पतालमा कार्यरत चिकित्सकलाई आत्मसुरक्षाका लागि स्वास्थ्य तथा जनसंख्या मन्त्रालयमा हाजिर हुन आग्रह गर्दछौं,’ संघका अध्यक्ष डा. दीपेन्द्र पाण्डे र महासचिव डा. रविन खड्काद्वारा हस्ताक्षरित विज्ञप्तिमा उल्लेख छ ।

बुधबार दिउँसो अमरगढी नगरपालिका–११ का वडाध्यक्ष सूर्यप्रकाश खड्काको नेतृत्वमा आएको भीडले शव परीक्षण गरिरहेका चिकित्सकमाथि आक्रमण गरेको अस्पतालमा कार्यरत चिकित्सकले बताएका छन् ।

जिल्ला अस्पतालमा कार्यरत चिकित्सकले सुरक्षाका कारण देखाउँदै नियमित सेवामा फर्कन नसक्ने जनाएका छन् । उनीहरुले जिल्ला प्रशासन कार्यालयलाई जानकारी गराएर बुधबारबाट आकस्मिकबाहेकका सेवा बन्द गरेको घोषणासमेत गरेका छन् ।

बिहीबार अस्पतालमा सरोकारवालाबीच छलफल भएको थियो । छलफलमा चिकित्सकले आफूहरुमाथि बेलाबेला भएको दुर्व्यहार हुने गरेकाले डडेल्धुरा अस्पतालमा बस्ने वातावरण नभएको बताएका थिए । बुधबार शव परीक्षण गरिरहेका चिकित्सकलाई परीक्षणमा ढिलो गरेको भन्दै हातपात गर्दै स्थानीयले शवको पूर्ण पोस्टमार्टम नहुँदै शव उठाएर लगेको चिकित्सकको भनाइ छ ।

प्रमुख जिल्ला अधिकारी राजुप्रसाद पौडेलले जिल्लामा शान्ति सुरक्षा प्रदान गर्नमा कुनै कमी नगरेको उल्लेख गरे । अस्पतालमा सुरक्षाको प्रत्याभूति गराउने भन्दै तत्काल काममा फर्किन प्रजिअ पौडेलले चिकित्सकलाई सुझाएका थिए ।

वडाध्यक्ष खड्काले भने अस्पतालले पाँच घण्टासम्म पनि पोस्टमार्टम नगर्दा आफूले हप्काएको भए पनि दुर्व्यवहार भने नगरेको बताएका छन् ।

प्रकाशित मिति: शुक्रबार, असार २७, २०७६ १८:२८