ठूलाबासित रविमानको ब्यालेट भिडन्त- हारे पनि इतिहास, जिते पनि इतिहास (भिडियाे)

ठूलाबासित रविमानको ब्यालेट भिडन्त- हारे पनि इतिहास, जिते पनि इतिहास (भिडियाे)

A+ A A-

ललितपुरकाे कुपण्डोलस्थित प्रसूतिगृह क्वार्टर गेटको देव्रेतिर ८१ वर्षीय नरसिंह ब्यञ्जनकार र आधा मिटरको दूरीमा दाहिनेतिर उनको भाइका ४४ वर्षे छोरा रबिनमान ब्यञ्जनकार मतदातासँग हात जोडिरहेका थिए । तर, यहाँ ठूलाबाले भतिजका लागि वा भतिजले ठूलाबाका लागि भोट मागिदिएका चाहिँ होइनन् ।

दुवै जना ललितपुर महानगरपालिका वडा नम्बर १० का वडाध्यक्ष उम्मेदवार हुन् । नरसिंह स्वतन्त्र र रबिनमान नेपाली कांग्रेसबाट चुनावी प्रतिस्पर्धामा छन् । यद्यपि, यसपालि एमालेले उम्मेदवारी नै नदिएर नरसिंहलाई साथ दिएकाे छ ।

यो वडामा माओवादी केन्द्रका वीरबहादुर तामाङ र राप्रपाका रघुनाथ दुलाल पनि वडाध्यक्ष उम्मेदवार हुन् तर मूलतः यिनै बडाउ-भतिजबीच प्रतिस्पर्धा हुने अनुमान गरिएको छ । बुथमा छिर्ने गेटबाहिर दुईतिरै बडाउ-भतिजकै समर्थकहरू देखिन्थे । कोही बडाउतिर हेरी मुस्कुराउँदै गेटभित्र छिर्दै थिए । कोही भतिजलाई धाप मारी बुथतिर जाँदै थिए ।

मध्याह्नमा फाट्टफुट्ट मतदाता आउने क्रम चलिरहेको थियो । रबिनले मुख खोलेर भोट मागेका थिएनन् तर उनका समर्थकहरू मौका छोपी भोट रुखमा है भन्दै थिए । नरसिंह आफ्नी छोरी र समर्थकहरूका माझ थिए । उनले पनि कसैसँग भोट मागेको देखिएन । तर, छोरी सज्जु भने दाजु रबिनका समर्थकले भोट मागेको प्रति विरोध जनाइरहेकी थिइन् । घरबाटै तताई ल्याएको पानी हातमा बोकेर उनी ८९ वर्षे बुबालाई पछ्याइरहेकी थिइन् । मतदानस्थलबाहिर नरसिंह र रबिनका आफन्त, समर्थक गरी ५०/६० जना मतदान सकिने समय कुरिरहेका थिए ।

यी बडाउ-भतिज एकअर्कालाई हराएर इतिहास रच्ने दाउमा छन् । लगातार १० पल्ट वडाध्यक्ष जितिसकेका नरसिंह ११औँ पटक बाजी मार्न प्रयासरत छन् । रबिनचाहिँ २०२९ सालदेखि वडा नम्बर १० मा बडाउले गाडेको विजयी झण्डा उखेल्ने होडमा छन् । र, यसो भयो भने रबिनले इतिहास रच्नेछन् ।

२०७४ सालको चुनावमा पनि स्वतन्त्र उम्मेदवारी दिएका नरसिंहले कांग्रेसबाट उठेका उनका माइला काकाका छोरा कर्मलाल ब्यञ्जनकारलाई ९७ मतले हराएका थिए । यसपालि आफ्नो कान्छा भाइका छोरा रबिन उनका प्रतिस्पर्धी छन् ।

व्यक्तिगत सम्बन्ध राम्रो, पार्टी बैरी

स्थानीय चुनावमा एकअर्काका प्रतिस्पर्धी नरसिंह र रबिनबीच व्यक्तिगत सम्बन्ध सुमधुर छ । सज्जु भन्छिन्, ‘उहाँहरू एकअर्कालाई आदरसम्मान गर्नुहुन्छ । परिवारभित्र कुनै खालको तुष छैन । तर, पार्टीगत रूपमा तीव्र प्रतिस्पर्धा छ ।’ केही समयअघि शिलापत्रसितको संवादमा नरसिंहले पार्टी पसेर आफ्नो परिवार फुटाउन खोजेको बताएका थिए । एकपल्ट कांग्रेसबाटै टिकट पाएर वडाध्यक्ष जितेका नरसिंह त्यसयता ललितपुर-१० मा कांग्रेसकै चुनाैती बन्दै आएका छन् ।

शुक्रबार मतदानस्थलबाहिर रबिनका केही समर्थक कटाक्ष गर्दै थिए, 'बालाई भोट हाल्नु रे, गिनिज बुकमा नाम लेखाउँछन् रे !’

नरसिंहले उम्मेदवारी दर्तालगत्तै भनेका थिए, उनी लामो समय चुनाव जितेर जनताको सेवा गर्ने प्रतिनिधिको रूपमा गिनिज बुकमा नाम लेखाउन चाहन्छन् । 'लगातार ३५ वर्ष चुनाव जितेर जनताकाे सेवा गर्नेकाे नाम गिनिज बुक अफ वर्ल्ड रेकर्डमा छ । यसपालि तपाईंले चुनाव जित्नुभयाे भने त्याे ताेडिनेछ', नजिककाे शुभचिन्तकले भनेका कुरा सुनाउँदै ब्यञ्जनकारले भने, 'लामाे समय स्थानीय निर्वाचन हुन नसकेकाले मेराे अलि पुगेन कि भन्ने छ । यसपालि जितेँ भने विश्व रेकर्ड हुन्छ रे ।' (यसअघि ठूलाबा हुनुपर्नेमा काका भएकाले सच्याइएको छ)

भिडियाे रिपाेर्ट

प्रकाशित मिति: शुक्रबार, वैशाख ३०, २०७९ १६:२३