अपाङ्गता भएकालाई मतदान केन्द्रमा ह्वील चेयर प्रयोग गर्न दिइएन, घिस्रिएर गई भोट हाले (भिडियो)

अपाङ्गता भएकालाई मतदान केन्द्रमा ह्वील चेयर प्रयोग गर्न दिइएन, घिस्रिएर गई भोट हाले (भिडियो)

A+ A A-

नेपालगञ्ज उपमहानगरपालिका-२० स्थित आदर्श मावि राँझा मतदान केन्द्रमा अपाङ्गता भएका व्यक्तिहरूले घिस्रिएर गएर मतदान गरेका छन् ।

मतदान केन्द्रभित्र ह्वील चेयर प्रयोग गर्न नदिइएपछि उनीहरूले निकै कष्टका साथ मतदान गर्नुपरेको हो । नयाँ बस्तीका फागुराम चौधरीले गेटबाट भित्र ह्वील चेयर ल्याउन नदिँदा घिस्रिएर गएर मतदान गर्नुपरेको बताए । ‘पुलिसले ह्वील चेयर भित्र छिराउनै दिइएन । भित्र पनि अपाङ्गता भएका व्यक्तिहरूका लागि छुट्टै व्यवस्था केही थिएन । घिस्रिएर लाइनमै बस्नुपर्‍यो,’ उनले भने, ‘मतदान गर्ने ठाउँ पुग्दा हात पूरै हिलो थियो । भोट हाल्ने टेबुल पनि अग्लो थियो । आफैँले भोट हाल्न नमिलेपछि सहयोगीले भोट हालिदिए ।’

साथमा आफन्त लिएर आएका केहीलाई बोकेर मतदान बुथभित्र लगिएको थियो । अपाङ्गता भएकी अर्की मतदाता कलसा बिकले आफूहरूप्रति अमानवीय व्यवहार भएको बताइन् । ‘हामीले ह्वील चेयर रहरले बोकेर आएको हो र ? भित्र ल्याउनै दिएनन् । मलाई नातेदारले बोकेर ल्याएर भोट हाल्न सघाए,’ उनले भनिन् ।

मतदान केन्द्रमा महिला र पुरुषपछि अन्यको लाइनको पनि व्यवस्था छ । तर, सुरक्षामा खटिएका म्यादी र प्रहरीले त्यो लाइन प्रयोग गर्न नदिएको अपाङ्गता भएका व्यक्तिहरूको गुनासो छ । लालबहादुर परियार शारीरिक अपाङ्गता भएका व्यक्ति हुन् । उनको एउटा खुट्टा कमजोर छ । त्यसैले वैशाखीको सहायतामा हिँड्छन् । उनले १ घण्टा लाइनमा बसेर पालो आएपछि मतदान गरेको बताए । ‘कुरै नबुझ्ने पुलिस र मतदान अधिकृत खटाएको रै'छ । हाम्रो कुनै सुनुवाइ नै भएन । यसपटक बडो दुःखसित भोट हालियो,’ परियारले भने ।

घिस्रिएर भोट दिएका मतदाता चौधरीले चुनावका बेला भोट माग्न आउनेहरूले विकास निर्माणका अनेक सपना बाँडे पनि अपाङ्गता भएका व्यक्तिका लागि कुनै प्रतिबद्धता नजनाएको बताए । ‘हाम्रो हालत कस्तो छ भन्ने त आज भोट हाल्दा नै देखियो नि,’ उनले भने ।

अधिकारकर्मी सीता बोहोरा अपाङ्गता भएका मतदाताप्रति मतदान केन्द्रमा संवेदनशीलता नदेखिएको बताउँछिन् । आफूहरूले आग्रह गर्दा पनि सहज बनाउन नखोजिएको गुनासो गर्दै उनले भनिन्, ‘मतदान अधिकृतलाई भन्दा मतदान गर्ने ठाउँ पुगेपछि मात्र आफूहरूले व्यवस्थापन गर्ने बताए । बाहिर प्रहरीसँग समन्वय गर्न भनिएको थियो । तर, अपाङ्गता भएकाहरूलाई सहज मतदानको वातावरण बनाइएन ।’

प्रकाशित मिति: शुक्रबार, वैशाख ३०, २०७९ १२:४५