पूर्वगभर्नरको सुझावः बैंकको संख्या घटाऔं

A+ A A-

नेपाल राष्ट्र बैंकका पूर्वगभर्नरहरुले बैंकको संख्या घटाउन सुझाव दिएका छन् । राष्ट्र बैंक व्यवस्थापनले मर्जरबाट बैंकको संख्या घटाउने सार्वजनिक अभिव्यक्ति दिइरहेको समयमा पूर्वगभर्नरहरुबाट पनि यस्तै सुझाव आएको हो ।

राष्ट्र बैंकले आगामी आर्थिक वर्षको मौद्रिक नीतिको विषयमा सुझाव लिन पूर्वगभर्नरसँग गरेको छलफलमा उनीहरुले यस्तो सुझाव दिएका हुन् । राष्ट्र बैंकले पहिलोपटक मौद्रिक नीतिको विषयमा पूर्वगभर्नरसँग छलफल गरेको छ ।

छलफलमा राष्ट्र बैंकका संस्थापक गभर्नर हिमालय शमशेर जबरा, पूर्वगभर्नरहरु भेषबहादुर थापा, गणेशबहादुर थापा, तिलकबहादुर रावल, दीपेन्द्रपुरुष ढकाल र विजयनाथ भट्टराई सहभागी थिए ।

पूर्वगभर्नरहरुले अर्थ व्यवस्थाको आन्तरिक र वाह्य क्षेत्र स्थायित्वका लागि आवश्यक उपायहरु अवलम्बन गर्नुपर्ने तथा मर्जरलाई प्रभावकारी बनाउनुपर्ने सुझाव दिएका राष्ट्र बैंकका प्रवक्ता लक्ष्मीप्रपन्न निरौलाले जानकारी दिए ।

पूर्वगभर्नरहरुले नेपालको बैंकिङ क्षेत्रलाई विश्व बजारमा उपस्थित हुन सक्ने गरी पुनर्संरचना गर्नुपर्ने सुझाव दिएका छन् ।

उनीहरुले अन्तर्राष्ट्रिय आर्थिक स्थिति तथा विकास क्रमलाई ध्यानमा राखी केन्द्रीय बैंकले मौद्रिक नीति तर्जुमा गर्नुपर्ने तथा आयात व्यवस्थापन र आन्तरिक उत्पादन वृद्धिका उपाय अपनाई व्यापार घाटा न्यूनीकरणमा जोड दिनुपर्ने बताएका छन् ।

वित्तीय सेवाको लागत घटाउन, वित्तीय सेवा प्रवाहमा गुणस्तर वृद्धि गर्न, वित्तीय उपभोक्ताहरुको हित संरक्षण गर्न आवश्यक नीतिगत तथा कानूनी व्यवस्था गर्नुपर्ने र सरकारको उच्च आर्थिक वृद्धिदर हासिल गर्ने लक्ष्यलाई सहयोग पुग्ने गरी मौद्रिक नीति ल्याउनुपर्ने पूर्वगभर्नरहरुको सुझाव छ ।

मौद्रिक नीतिले कृषिलगायत अन्य प्राथमिकता प्राप्त क्षेत्रमा वित्तीय स्राेत र साधनका लागि थप प्रवाह हुने गरी नीतिगत व्यवस्था गर्नुपर्ने सुझाव दिएका छन् ।

यस्तै, व्यापार घाटाको आकार कम गर्न र शोधनान्तर स्थितिलाई सन्तुलनमा राख्न स्थायी प्रकृतिको उच्च स्तरीय संरचना स्थापना गरी परिणाममुखी नतिजा निकाल्ने गरी काम गर्नुपर्ने सुझावमा समेटिएको छ ।

सो छलफलमा पूर्वगभर्नरहरु सत्येन्द्रप्यारा श्रेष्ठ र दीपेन्द्रबहादुर क्षेत्र सहभागी भएका थिएनन् । यस्तै, अर्का पूर्वगभर्नर डा. युवराज खतिवडा अहिले अर्थमन्त्री भएकोले सहभागी भएनन् ।

प्रकाशित मिति: शुक्रबार, असार २७, २०७६ ०५:५३