मोटरसाइकलको मूल्यः भारतमा ४० हजार नेपालमा १ लाख ६० हजार

A+ A A-

नेपालमा मोटरसाइकल प्रयोगकर्ताको संख्या बढ्दै गएको छ । कतिपयले त मोटरसाइकललाई आफ्नो सोखका रूपमा लिने गरेका छन् ।

नेपालमा बजाज, यामाहा, टीभीएस, हिरो, होन्डा, सुजुकीलगायत ब्रान्डका मोटरसाइकल अधिक रुचाइएका छन् । नेपालमा बढी बिक्री हुने मोटरसाइकलको मूल्य भारतमा भन्दा निकै बढी छ । नेपालमा लाखभन्दा बढी पर्ने मोटरसाइकल भारतमा हजारमै पाइन्छ ।

बजाज

नेपालमा बजाजका मोटरसाइकलको बजार हिस्सा धेरै भएको कम्पनीले दाबी गर्ने गरेको छ । बजाजको पल्सर मोटरसाइकल नेपालमा अत्यधिक रुचाइएकोमध्येमा पर्छ । नेपालमा बजाजका मोटरसाइकलको मूल्य निकै उच्च छ ।

पल्सर २०० एनएसको नेपालमा मूल्य ३ लाख १८ हजार ९ सय रुपैयाँ पर्छ । त्यस्तै, पल्सर २२० को ३ लाख १२ हजार ९ सय रुपैयाँ, पल्सर १८० को २ लाख ७९ हजार ९ सय र पल्सर १५० को २ लाख ५९ हजार ९ सय रुपैयाँ पर्छ ।

यस्तै, एभेन्जरको २ लाख ६० हजार रुपैयाँदेखि ३ लाख ५० हजार रुपैयाँसम्म पर्छ । डिस्कभरको १ लाख ४२ हजार ९ सयदेखि २ लाख ९ हजार रुपैयाँसम्म पर्ने गरेको छ । नेपालमा बजाजका मोटरसाइकल गोल्छा अर्गनाइजेसनले बिक्री गर्ने गरेको छ ।

तर, भारतीय बजारमा यी मोटरसाइकलको मूल्य भने निकै कम छ । भारतमा पल्सर २०० एनएसको मूल्य भारु १ लाख १२ हजार छ । पल्सर २२० को ९९ हजारदेखि १ लाख ६ हजार, पल्सर १८० को ८५ हजार ५ सय २३ र पल्सर १५० को ६८ हजार २ सय ५० भारु पर्छ ।

यस्तै, एभेन्जरको ८२ हजार २ सय ५३ देखि १ लाख ३ हजार र डिस्कभरको ५२ हजार ३३६ देखि ७० हजार भारुसम्म पर्छ ।

यामाहा

नेपाली बजारमा यामाहा ब्रान्डका मोटरसाइकल पनि रोजाइमै पर्छन् । यामाहाको एफजेड र आर वान फाइभ मोडलका मोटरसाइकल बढी लोकप्रिय छन् ।

नेपालमा यामाहाका एफजेड मोडलका मोटरसाइकल २ लाख ५० हजार रुपैयाँदेखि ४ लाख रुपैयाँसम्म पर्ने गरेको छ । तर, भारतमा सोही बाइक ५० हजार भारुदेखि १ लाख ४० हजारमै पाइन्छ ।

त्यस्तै, यामाहाको आर वान फाइभको नेपाली बजार मूल्य ३ लाख ४० हजार रुपैयाँदेखि ४ लाख २० हजार रुपैयाँसम्म पर्छ । भारतमा उक्त मोटरसाइकल १ लाख ४ हजारदेखि १ लाख ५० हजार भारतीय रुपैयाँमा किन्न सकिन्छ ।

यामाहाको नेपालमा पाइने सबैभन्दा महँगो मोटरसाइकल वाईजेडएफ आर सिक्स हो । जसको नेपालमा २७ लाख रुपैयाँ पर्छ । तर, भारतमा यसको मूल्य १५ लाख भारु मात्रै छ ।

टीभीएस

युवा पुस्ताले रुचाएको मोटरसाइकल कम्पनीमा टीभीएस पनि हो । टीभीएस कम्पनीको अपाचे मोटरसाइकलको नेपाली बजार मूल्य २ लाख ५४ हजार ९ सय रुपैयाँदेखि ३ लाख २४ हजार ९ सय रुपैयाँसम्म छ । भारतमा भने उक्त मोटरसाइकल ७८ हजार ७ सय १५ देखि २ लाख १७ हजार भारुसम्म पर्ने गरेको विक्रेताहरुले आफ्नो वेबसाइटमा उल्लेख गरेका छन् ।

सुजुकी

नेपालमा सुजुकी कम्पनीको जिक्सर मोटरसाइकलको मूल्य २ लाख ५० हजार ९ सय रुपैयाँदेखि ३ लाख ५० हजार रुपैयाँसम्म पर्ने गरेको छ । तर, भारतमा उक्त मोटरसाइकलको मूल्य ७७ हजार ६ सय ५० भारुदेखि १ लाख १० हजार भारुसम्म पर्ने गरेको छ ।

हिरो

नेपालमा रुचाइएका ब्रान्डमध्ये सबैभन्दा सस्तोदेखि सबैभन्दा महँगो मोटरसाइकल हिरो कम्पनीकै छन् । हिरोका १ लाख ६० हजार रुपैयाँदेखि ३ लाखसम्मका मोटरसाइकल नेपाली बजारमा उपलब्ध छन् । हिरोका १ लाख ६० हजारदेखि ३ लाख रुपैयाँसम्म पर्ने मोटरसाइकल भारतमा भारु ४० हजारदेखि ८० हजारसम्ममै पाइन्छ ।

रोयल इन्फिल्ड

पछिल्लो समय रोयल इन्फिल्ड ब्रान्डका बाइक पनि लोकप्रिय छ । सो ब्रान्डका बाइकको मूल्य ४ लाख ३२ हजार रुपैयाँदेखि ७ लाख २१ हजार रुपैयाँसम्म पर्ने गरेको छ । भारतमा सोही कम्पनीका बाइकको मूल्य १ लाख २१ हजार भारुदेखि २ लाख ६५ हजार भारु छ ।

प्रकाशित मिति: शुक्रबार, असार २७, २०७६ ०३:३०