पाँचथरमा ६८ किसिमका निर्वाचन सामग्रीसहित खटिए कर्मचारी

A+ A A-

शुक्रबार हुने स्थानीय तह चुनावमा मतदान केन्द्रमा ६८ किसिमका मतदान सामग्री प्रयोग हुनेछन् । निर्वाचन आयोगबाट यी समाग्री बुझेका मतदान अधिकृत मतदान केन्द्रमा आवश्यक कर्मचारीसहित मतदानको तयारीमा जुटेका हुन् ।

मतदानस्थलमा सर्वपक्षीय बैठक राखिएको छ । निर्वाचनलाई शान्तिपूर्ण रूपले सम्पन्न गर्नका लागि राजनीतिक दलहरू सम्मिलित बैठक बसेको हो ।

बिहीबार मतदानस्थल निर्माणको काम हुने जानकारी दिइएको छ । मतदान केन्द्रमा मतदानका लागि आवश्यक समग्री, कानुन तथा अन्य कागजात रहेका हुन्छन् । मतदान केन्द्रमा स्वस्तिक छाँप, मतपेटिका, मतपत्रसहितका समग्री प्रयोग गरिन्छ । फिर्ता गर्ने र त्यहीँ प्रयोग गर्ने गरी समग्री पठाइएको हुन्छ ।

मतदान केन्द्रका लागि धागो, सियो, खापसियो, सलाई, मैनवत्तीलगायतका सामग्री प्रयोग हुने गर्छन् । यस पटकको चुनावमा मास्कसमेत थप गरिएको छ ।

पाँचथरका १७६ केन्द्रमा ८७७ कर्मचारी मतदान गराउन खटिएको जिल्ला निर्वाचन अधिकारी कुमार भट्टराईले जानकारी दिए । मतदानस्थलमा स्वंयमसेवकसमेत नियुक्त हुनेछन् ।

चुनावी सुरक्षाका लागि पाँचथरमा २ हजार १ सय सुरक्षाकर्मी परिचालन गरिएको पाँचथरका प्रमुख जिल्ला अधिकारी सुरेश न्यौपानेले जानकारी दिए । नेपाल प्रहरी, शसस्त्र प्रहरी, नेपाली सेनाबाहेक १ हजारको संख्यामा म्यादी प्रहरी परिचालन भएका छन् । विभिन्न क्षेत्रमा राष्ट्रिय अनुसन्धानका कर्मचारीसमेत परिचालन गरिएको बताइएको छ ।

मतपेटिका सोही दिन नगरपालिका तथा गाउँपालिकाको केन्द्रमा रहेका मतदान अधिकृतको कार्यालयमा पुर्‍याइने छ । मतगणना भने ३१ गते बिहानदेखि सुरु गरिने भएको छ ।

आठवटा स्थानीय तहमा ६० वार्ड रहेको पाँचथरमा १०१ स्थानमा १७६ मतदान केन्द्र रहेका छन् । १ लाख ४० हजार २ सय २४ जना मतदाता रहेको जिल्लामा महिला मतदाताको संख्या ६६ हजार ६ सय ४८ रहेको छ ।

प्रकाशित मिति: बुधबार, वैशाख २८, २०७९ १९:३२