एमाले सांसद रामवीर मानन्धर नै लागे केशव स्थापित हराउन, कति असर गर्ला ?

A+ A A-

एमाले सांसद रामवीर मानन्धर काठमाडौं महानगरमा मेयर उम्मेदवार केशव स्थापित हराउने अभियानमा सक्रिय भएका छन् । खुला रूपमा नै मानन्धरले काठमाडौंमा एमाले 'क्लिन स्वीप' हुने प्रक्षेपण गरिरहेका छन् । मानन्धर आफैँ एमालेबाट काठमाडौंको मेयरका दाबेदार थिए ।

स्थापित, मानन्धरसहित विद्यासुन्दर शाक्य, इन्दिरा पन्त र निर्मल देउला दाबेदार थिए । पन्तको नाम सिफारिस भएकोमा एमालेभित्रै विवाद थियो । पन्तका श्रीमान् बसन्त मानन्धर एकीकृत समाजवादीमा लागेका कारण पन्तप्रति एमालेमा अविश्वास देखिएको थियो । मेयर शाक्यले काम नगरेको भनेर आलोचित भइरहेका थिए, त्यसैले पार्टीभित्र पनि उनको पक्षमा माहौल थिएन ।

अर्कातिर स्थापितप्रति पनि एमालेभित्र खासै माहौल नदेखेका मानन्धर मेयरमा आस गरेका थिए । तर, अध्यक्ष केपी ओलीले मानन्धर र शाक्यलाई छोडेर स्थापित रोजे । त्यसपछि रुष्ट भएका मानन्धर एमाले उम्मेदवार स्थापितको विपक्षमा उभिएका हुन् । शिलापत्रसँगको कुराकानीमा मानन्धरले स्थापित विवादास्पद पृष्ठभूमिका भएको र एमालेभित्र पनि बदनाम व्यक्ति भएकाले पार्टीभित्र असन्तुष्टि रहेकाे बताएका थिए । त्यही असन्तुष्टि अरुले गुम्स्याएर राखे तर आफूले सार्वजनिक गरेको मानन्धरको दाबी थियो ।

मानन्धरको प्रभाव कति ?

मेयर उम्मेदवार स्थापितका लागि मानन्धरको विरोध अर्थपूर्ण हुने टिप्पणी भइरहेको छ । काठमाडौंको १६ नम्बर वडाका मतदाता मानन्धर त्यही वडामा दुईपटक वडाध्यक्ष भइसकेका थिए । त्यसबाहेक अहिले प्रतिनिधिसभा सदस्यसमेत रहेका मानन्धरले केही हजार मत प्रभावित बनाउन सक्ने विश्लेषण भइरहेको छ । खासगरी वडा नम्बर १६ जहाँ धेरै मतदाता पनि रहेका छन्, उक्त वडा र मानन्धरहरूको गुठीमा रामवीरले प्रभावित पार्न सक्ने अनुमान छ । तर, मानन्धर गुठीसँग उनकाे सम्बन्ध भने सुमधुर छैन । बर्दियाबाट चुनाव हारेका एमाले नेता वामदेव गाैतमलाइ संसदमा ल्याउन राजीनामाकाे घाेषणा गरेपछि मानन्धर समाजले उनलाई गरेकाे सम्मानसमेत फिर्ता गरेकाे थियाे ।

गुठी तथा सामाजिक संस्थामा मेयर विद्यासुन्दर शाक्यको प्रभाव भएकाले मानन्धर कमजोर हुन सक्ने पनि टिप्पणी छ । तर, शिलापत्रसँगको कुराकानीमा मानन्धरले राजनीतिक भविष्यका लागि पनि मेयर शाक्यले स्थापितलाई रोक्न प्रयास गर्नुपर्ने बताएका थिए ।

एकातिर एमाले विभाजित भएर एकीकृत समाजवादीका आफ्नै उम्मेदवार हुने अर्कातिर मानन्धरले असहयोग गर्दा स्थापितलाई मात्र होइन, वडामा पनि प्रभावित हुने आकलन हुन थालेकाे छ ।मानन्धरकै विश्लेषणमा पनि काठमाडौं वडा १ मा एमालेका वडाध्यक्ष भरतलाल श्रेष्ठ करिब ४ सय मतले निर्वाचित भएका थिए । वडा नम्बर २ का राजेन्द्र श्रेष्ठ, वडा ४ का मोहनबहादुर विष्टलगायतका उम्मेदवार करिब ४ सयकै सेरोफेरमा निर्वाचित भएका छन् । एमालेकै भोट बैंकबाट खिच्ने गरी ती सबै वडामा एकीकृत समाजवादीका उम्मेदवार भएकाले एमालेका वडाध्यक्ष पराजित हुने उनी बताउँछन् ।

दुईपटक वडाध्यक्ष भएको वडा १६ मा मानन्धरले कांग्रेस उम्मेदवार सिर्जना सिंहलाई सहयोग गर्ने निर्णयले थप मत प्रभावित हुने अवस्था छ । गुठी र केही वडामा मानन्धरले प्रभाव पार्नेबित्तिकै स्थापितलाई समस्या पर्ने एमालेकै नेता बताउँछन् ।मतदानको सम्मुखमा सार्वजनिक रूपमा बोल्दा त्यसले गलत सन्देश प्रवाहित भएको र अन्यत्र पनि असर पर्ने डर एमालेमा छ ।

एमाले नेता कृष्णगोपाल श्रेष्ठले मानन्धरको असन्तुष्टि र स्थापितविरुद्धका अभिव्यक्तिको प्रभाव कति पर्छ भनेर आकलन भइनसकेको बताए । उनले शिलापत्रसँग भने, ‘उहाँजत्तिको नेताले बोलेको हो कि होइन भन्ने पहिला प्रस्ट हुनुपर्छ । दोस्रो उहाँले बोलेपछि पर्ने प्रभावको मूल्यांकन हामीले गरिसकेका छैनौँ ।’

किन रुष्ट भए मानन्धर ?

मानन्धर एमालेसँग किन रुष्ट भए ? त्यसको कारण प्रष्ट भइसकेको छैन । तर, मानन्धरलाई चोट लाग्नुको दुई कारण मानिएको छ । एउटा- केन्द्रीय सदस्य हुन नसक्नु । अर्काे- काठमाडौंको मेयर टिकट नपाउनु । मानन्धरलाई एमालेले चितवन महाधिवेशनबाट केन्द्रीय सदस्य चयन गरेन । स्थापित, शाक्यलगायत उपत्यकाका धेरै नेता केन्द्रीय नेतृत्वमा आउँदा उनी केन्द्रीय सदस्य मनोनीतमा समेत परेनन् । त्यसपछि असन्तुष्ट बनेका मानन्धर पछिल्लोपटक काठमाडौंको मेयर दाबी गरिरहेका थिए ।

मेयरको पनि टिकट नपाएपछि उनी खुलेर मेयरका उम्मेदवार स्थापितविरुद्ध लागेका हुन् । मानन्धरले गलत व्यक्तिलाई उम्मेदवारी दिएकाले विरोध गरेको बताएका छन् । तर, उनले असन्तुष्टिको कारण भने खोलेनन् । मानन्धरले भने, 'काठमाडौंको एमाले नेतृत्व नै पार्टी सिध्याउने मिलेमतोमा छन्, त्यसमा कृष्णगोपाल श्रेष्ठ, कृष्ण राई, दीपक निरौला र केशव स्थापितहरू संलग्न छन् ।’

यो पनि पढ्नुस् :

केशव स्थापितका निम्ति विद्यासुन्दर फ्याक्टर कति निर्णायक ?

प्रकाशित मिति: मंगलबार, वैशाख २७, २०७९ २०:००