बिरामी ल्याउन छैन हेलिकोप्टर, नेताले नै गर्दिन्छन् ४ घण्टासम्म होल्ड

A+ A A-

निर्वाचन आयोग र दलका नेताहरूले चुनावी प्रचारप्रसारका निम्ति हेलिकोप्टरको प्रयोग बढाएसँगै बिरामीको उद्धारमा समस्या आएको छ । निर्वाचन लक्षित कार्यक्रमा हेलिकोप्टर होल्ड भइदिँदा बिरामी उद्धारमा समस्या भएको हो ।

नेपालमा अहिले २८ वटा हेलिकोप्टरले दैनिक उडान भर्दै आएका छन्, जसमा दैनिक आठवटा उडान उद्धारका लागि हुने एयरलाइन्स अपरेटर एसोसिएसनको भनाइ छ । एसोसिएसनका प्रवक्ता योगराज कँडेल शर्माले राजनीतिक दलका कार्यक्रममा नेताहरूले हेलिकोप्टर लामो समयसम्म होल्ड गरिदिँदा समस्या आएको बताउँछन् ।

‘१ घण्टाका लागि बुकिङ आएको हुन्छ, त्यहीअनुसार गएको हेलिकोप्टर ३ देखि ४ घण्टासम्म फर्कन पाउँदैन । कार्यक्रम नसकुञ्जेलसम्म पर्खेर बस्नुपर्ने हुँदा पनि त्यसको असर उद्धारमा देखिएको हो ।’

हिजो मात्रै भरतपुरबाट तत्काल बिरामी उद्धार गर्नुपर्ने भए पनि सबै हेली चुनावी कार्यक्रममा अल्झिँदा २ घण्टासम्म उद्धार गर्न नसकेको उनले गुनासो गरे । हेली सर्भिस तत्काल उद्धारमा धेरै प्रयोग हुनुपर्ने हो । यसरी उद्धार गर्दा समय लाग्दैन । त्यसैले धेरैभन्दा धेरै उडान गरी उद्धार गर्न सकिन्छ । तर, कार्यक्रममा गएका हेली समयमा फर्किंदैनन् । हिजै मात्र पनि २ घण्टासम्म बिरामी उद्धार गर्न सकेनौँ । उद्धारमै ढिलो भयो ।’

नेपाल हेलिकोप्टर सर्भिसका म्यानेजिङ डाइरेक्टर राजन न्यौपाने बुकिङ अत्यधिक भए पनि उडान भने पर्याप्त हुन नसकेको गुनासो गर्छन् । भन्छन्, ‘दलका नेताहरूले अहिले धमाधम हेलिकोप्टर प्रयोग गरिरहनुभएको छ । लामो समयसम्म हेली चुनावी गतिविधिमै व्यस्त हुँदा बिरामी उद्धारमा समस्या भएको छ भने पर्याप्त उडान भर्न पनि पाइएको छैन ।’

प्रवक्ता शर्मा नेताहरूले चुनावी कार्यक्रममा जाँदा हेलिकोप्टरको समय ख्याल नगरिदिँदा उद्धारका लागि हुने उडान कम भएको बताउँछन् । भन्छन्, ‘दैनिक आठवटासम्म रेस्क्युका लागि उडान भर्दै आएका थियौँ । अहिले त्यति पनि गर्न सकिएको छैन । उडान व्यवस्थापनमै समस्या भइरहेको छ ।’

प्रवक्ता शर्माका अनुसार एउटा हेलिकोप्टले दैनिक औसतमा तीनवटासम्म उडान गर्दै आएको छ ।

प्रकाशित मिति: सोमबार, वैशाख २६, २०७९ १४:०५