डडेल्धुराको दुमडा गाउँमा पहिलोपटक रोपाइँ

A+ A A-

डडेल्धुराको दुमडा गाउँमा पहिलोपटक रोपाइँ गरिएको छ। अमरगढी नगरपालिका वडा नं ६ को दुमडा गाउँमा सिँचाइ पुगेपछि पहिलोपटक रोपाइँ गरिएको हो ।

गाउँमा पहिलोपटक रोपाइँ गर्न पाएपछि स्थानीयले खुसी व्यक्त गरेका छन् । २०७० सालदेखि सुरु भएको सिचाइँको काम यस वर्ष पूरा भएको हो । झन्डै आठ किलोमिटर टाढाबाट पानी गाउँमा पुर्‍याई रोपाइँ गरिएको वडाअध्यक्ष गोविन्दराज भट्टले जानकारी दिए ।

गाउँभन्दा धेरै तल खोला किनारमा दुमडा गाउँका केही परिवारका खेत थिए। बँदेल र रतुवाले धानबाली नष्ट गर्न थालेपछि भएका खेत पनि बाँझै रहेको उनले बताए ।

खोलाको पानी वडा नं ७ को खानेपानी र सिँचाइमा प्रयोग भएसँगै वैशाख र जेठमा आफ्ना खेतसम्म पानी नै नपुग्ने समस्या थियो। उनले भने, ‘अहिले अलग्गै मुल वडा नं ६ कै तोलीबाट सिँचाइको पानी गाउँमा पुगेपछि घर वरपर रहेका बारीमा सबै गाउँलेहरुले रोपाइँ गरिरहेका छन्।’

स्थानीय निकै हर्षित
यस वर्ष मात्रै गाउँमा पानि पुगेकाले रोपाइँ गर्न नपाएका गाउँलेहरु सबैले धमाधम रोपाइँ गर्न थालेका छन् ।

बिहे गरी दुमडा गाउँमा आएको ४० वर्ष बढी भए पनि रोपाइँ गर्न नपाएको स्थानीय हरुदेवी भट्टले बताइन् । दुमडा गाउँमा पहिलोपटक रोपाइँ गर्न पाउँदा निकै खुसी भएको उनले सुनाइन् ।

धान राम्रो फल्ने आस !

पानी पुगेपछि घरको माथिल्लो गाह्रामा रोपाइँ गर्न लागेकाले निकै रमाइलो महसुस भइरहेको बताउँदै स्थानीय राधिका भट्टले भनिन्, ‘अबदेखि खेतको मसिनो चामलको भात खान पाइने भयो । यो वर्ष परीक्षणका रुपमा रोपाइँ गर्न लागेका छौं । गाउँमा पानी पुगेको छ । धान राम्रो फल्ने आस छ ।’

दुमडा गाउँमा तरकारी उत्पादन पनि गरिँदै आएको छ। २ हजार रोपनीमा सिँचाइ गर्न २०७० सालमा अमरगढी नगरपालिकाबाट १ लाख रकम विनियोजन भएपछि काम सुरु भएको दुमडा सिँचाइ जल उपभोक्ता समिति अध्यक्ष कालीप्रसाद भट्टले बताए।

सिँचाइ कार्यालय डडेल्धुराबाट पनि २०७० सालमा नै १५ लाख र त्यसपछि १० लाख आएको उनले जानकारी दिए। क्रमागत रुपमा सुरुवात गरिएको सिँचाइ योजनाको ४२ लाखको टेन्डरमा पनि काम गरिएको अध्यक्ष भट्टको भनाइ छ।

चालू आर्थिक वर्षमा अमरगढी नगरपालिकाको २ लाख बजेट र हालसम्म गरी स्थानीयले २० लाख बराबरको श्रमदान गरी सिँचाइ योजना सम्पन्न भएको हो ।

‘अहिले एउटा ९ मिटर चौडाइ र १३ मिटर लम्बाइ भएको करिब डेढ लाख लिटर क्षमताको ट्यांकी बनाई ३७ धाराबाट गाउँका बारीमा पानी वितरण गरिएको छ,’ उनले भने । सिचाइँका लागि ६ मिटर चौडाइ र ९ मिटर लम्बाइ भएका पाँचवटा ट्यांकीबाट पनि पानी वितरण गरिरहेको उनले बताए ।

प्रकाशित मिति: बिहीबार, असार २६, २०७६ १८:४२