नेप्से बढ्दा यी कम्पनीका लगानीकर्ता बने भाग्यमानी, कसको कमाइ कति ?

A+ A A-

शेयरबजार परिसूचक नेप्सेमा आइतबार १७ अंकको वृद्धि भएकाे छ । कारोबार सुरु भएसँगै उच्च अंकले घटेकाे बजार अन्तिम केही मिनेट बढ्दा बजार राताेबाट हरियोतिर फड्को मार्‍याे ।

२२३८ अंकबाट सुरु भएको आइतबारको कारोबार बढेर २२४१ सम्म पुगेको थियो । त्यसपछि ओरालो लागेको बजारले न्यूनतम विन्दु २२०४ सम्म छुन पुग्दा ३७ अंकको ह्रास देखियो । यद्यपि बजार सम्हालिँदै त्यसपछि भने उकालाे लाग्दा अन्त्यमा दोहोरो अंकको वृद्धि भएर बजार बन्द भयाे ।

आइतबार नेप्से सूचक १७.९५ अंकले बढेर २२५६.५७ अंकमा पुगेको छ । त्यस्तै, सेन्सेटिभ परिसूचक पनि ३.८० अंकले बढेर ४३६.३५ अंकमा पुग्यो ।

दिनभरजसो बजार राताम्मे बने पनि अन्त्यमा हरियो बन्दा कारोबारमा आएका २ सय ३३ कम्पनीमध्ये १ सय ३६ कम्पनीका लगानीकर्ताले आजको कारोबारबाट नाफा कमाएका छन् ।

यी कम्पनीले कमाए नाफा

दिनभरमा १ अर्ब ३२ करोड रुपैयाँको कारोबार हुँदा सर्वाधिक कमाउनेमा जाल्पा लघुवित्त अगाडि देखिएको छ। यो कम्पनीको शेयरमूल्यमा सकारात्मक सर्किट लाग्याे । यसकाे शेयरमूल्य १ सय ५२ रुपैयाँले बढेर १६७२ रुपैयाँ कायम भएको छ ।

योसँगै घलेम्दी हाइड्रोपावर, माउन्टेन इनर्जीको शेयरमूल्य ८ प्रतिशतले बढेको छ भने हिमालयन ऊर्जा विकास, श्री इन्भेस्टमेन्टको शेयरमूल्य ७ प्रतिशतले बढेको छ ।

समग्रमा आजको कारोबारबाट लघुवित्त, विकास बैंक र जलविद्युत् कम्पनीको सर्वाधिक शेयरमूल्य बढेको देखिन्छ । समूहगत रूपमा पनि लघुवित्तको सबैभन्दा धेरै ३.३५ प्रतिशत, विकास बैंकको २.८४ प्रतिशत र जलविद्युतको २.७१ प्रतिशतले सूचक बढेको छ ।

यी कम्पनीको शेयरमूल्य घट्याे

धेरै समयपछि हरियो बनेको बजारबाट पनि राताम्मे हुनेमा आज ५२ वटा कम्पनीहरू परे । जसमा उन्नति सहकार्य लघुवित्त अगाडि छ । यो कम्पनीको शेयरमूल्य ४.९२ प्रतिशत अर्थात् ६२ रुपैयाँले घटेर ११९७ रुपैयाँ कायम भएको छ । योसँगै एसियन लाइफ, एनआईसी सेलेक्ट फण्ड, रुरु जलविद्युत् आयोजना, ग्रामीण विकास लघुवित्तलगायतका कम्पनीको आज मूल्य सर्वाधिक घटेको छ ।

यी कम्पनीमा थियो लगानीकर्ताको भिड

नेप्से सूचक घटेर २२०४ को न्यूनतम विन्दुमा पुगेपछि शेयर किन्न उक्सिएका लगानीकर्ता सिटिजन्स इन्भेस्टमेन्ट फण्डमा बढी देखिए । यो फण्डको ७ करोड ५३ लाख रुपैयाँबराबरको शेयर कारोबार भयो । यो बाहेक हिमालयन डिष्टिलरी, नबिल बैंक र एनआईसी बैंकमा पनि शेयर किन्ने लागानीकर्ताको भिड देखियो । कारोबार भने यी कम्पनीहरूको क्रमश: ४ करोड ६० लाख, ४ करोड १५ लाख र ३ करोड ६७ लाख रुपैयाँको भयो ।

प्रकाशित मिति: आइतबार, वैशाख २५, २०७९ १५:३९