कच्चा पदार्थमा लाग्ने भन्सारशुल्क घटाउन नेपाल पेन्ट उद्योग संघको माग

A+ A A-

नेपाल पेन्ट उद्योग संघले पेन्टका लागि आवश्यक पर्ने मुख्य कच्चा पदार्थ र तयारी वस्तुको मूल्य एउटै भएको उल्लेख गर्दै कर घटाउन माग गरेको छ ।

पेन्ट उद्योगहरूले आयातित कच्चा पदार्थमा भन्सार विभागबाट बेहोरिरहेको अधिकतम भन्सार शुल्क समस्याबारे ध्यानाकर्षण गराउन पेन्ट उद्योग संघले पत्रकार सम्मेलन गरेको छ ।

हाल नेपालको बैङ्किङ क्षेत्रमा देखिएको तरलता सङ्कट तथा विदेशी मुद्रा सञ्चितिमा आएको ह्रासलाई मध्यनजर गरी आउँदा दिनहरूमा तयारी पेन्टको आयातमा सरकारले काउण्टर भेलिङ शुल्क लगाउन सक्ने सम्भावनाको आकलन गर्दै नेपाल पेन्ट्स उद्योग संघ एनपीएमद्वारा उक्त सम्मेलन गरिएको हो ।

एक्रेलिक पोलिमर आयातमा सरकारलाई ३० प्रतिशतसम्म भन्सार तिर्नुपरेको संघले बताएको छ । एक्रेलिक पोलिमरको आयातमा सरकारले तोकेको कर बजारमुखी नरहेको पेन्ट उद्योग संघको ठहर छ ।

संघका अनुसार इमल्सन एचएसएन कोड ३९.०६ अन्तर्गत वर्गीकृत गरिएको वाटर बेस्ड पेन्टहरूका लागि कच्चा पदार्थ भए पनि २०७६ मा भन्सार विभागले जारी गरेको पत्रअन्तर्गत एक्रेलिक पोलिमरलाई फिनिस्ड गुड, पेन्ट एण्ड भार्निसका लागि तोकिएको कोड ३२.०९ अन्तर्गत वर्गीकृत गर्न निर्देशन दिइएको छ ।

संघका अनुसार एचएसएन ३९.०६ अन्तर्गत आयातमा १० प्रतिशत मात्र तिर्नुपर्ने र साफ्टा सुविधा पनि पाइनेछ । तर, ३२.०९ कोडअन्तर्गत भन्सार मूल्यांकन गर्दा ३० प्रतिशत भन्सार शुल्क तिर्नुपर्ने र साफ्टामा पनि तयारी वस्तु उत्पादनका लागि केही प्रावधान छैैन ।

उद्योगीका अनुसार क्याबिनेटले ३२.०९ कोड अन्तर्गत भित्रिने इमल्सनको भन्सार २० प्रतिशतमा झारे पनि पेन्टका लागि आवश्यक पर्ने प्रमुख पदार्थमा भने भन्सार शुल्क प्रभावकारी रूपमा १० प्रतिशतदेखि २० प्रतिशतमा पुगेको छ ।

त्यस्तै, वित्तीय ऐन २०७७/७८ ले टाइटेनियम डाइअक्साइडको आयातमा १५ प्रतिशतबाट घटाएर ५ प्रतिशत गरेको छ । पेन्ट उद्योगहरूले टाइटेनियम डाइअक्साइडलाई ३२.०६.११ मा आयात गर्ने गरेको हुनाले एसएन कोड सच्याउन नेपाल पेन्ट उद्योगको माग गरेको छ ।

उद्योगीहरूले एक्रेलिक पोलिमरमा श्रीलंका, बंगलादेश, भारतजस्ता छिमेकी मुलुकमा १० प्रतिशतसम्म भन्सार शुल्क लाग्ने गरिएकोमा नेपालमा बढी रहेको बताएका छन् ।

प्रकाशित मिति: शुक्रबार, वैशाख २३, २०७९ १५:१७