भरतपुरका कांग्रेससँग सशंकित प्रचण्ड, गठबन्धनमा इमानदार हुन कार्यकर्तालाई कांग्रेस नेताहरूको आग्रह

भरतपुरका कांग्रेससँग सशंकित प्रचण्ड, गठबन्धनमा इमानदार हुन कार्यकर्तालाई कांग्रेस नेताहरूको आग्रह

A+ A A-

बिहीबार चितवनकाे भरतपुरमा आयाेजित चुनावी सभामा नेकपा माओवादी केन्द्रका अध्यक्ष पुष्पकमल दहाल सशंकित मुद्रामा देखिए । नेपाली कांग्रेसका कार्यकर्ताले हँसिया हथाैडामा भोट नहाल्ने त्रास उनीमा प्रष्ट देखियो ।

यो गठबन्धन गणतन्त्र र लोकतन्त्रको आवश्यकता हो भन्दै भरतपुरका कांग्रेसहरूले गठबन्धनलाई समर्थन नगरे देश दुर्घटनातर्फ जाने अभिव्यक्ति दिए ।

‘देश र जनताको आवश्यकतालाई नबुझी हँसिया हथौडामा भोट हाल्दिनँ भनेर कांग्रेसका साथीहरूले भन्नुभयो भने देश दुर्घटनातिर जान सक्छ,’ उनले भने ।

उनी यतिमै रोकिएनन् । गठबन्धनलाई साथ दिएर रेनु दहालको टिमलाई विजयी गराए यो गठबन्धन १०,१५,२० वर्षसम्म पनि जान सक्ने उनले प्रतिबद्धता व्यक्त गरे । केपी ओलीको पार्टीसँग गठबन्धन गरेर आएकाले आफूलाई शंका नगर्न उनले आग्रह गरे ।

उता, नेपाली कांग्रेसका नेताहरूले भने रेनु दाहालको तारिफ गर्दै गठबन्धनप्रति वफादार हुन आफ्ना कार्यकर्तालाई आग्रह गरे । भरतपुरबवासीको इच्छा रुख चिह्नमै भोट हाल्ने भए पनि लोकतन्त्रको रक्षाका लागि गठबन्धनमै मतदान गर्न नेपाली कांग्रेस चितवनका सभापति राजेश्वर खनालले आग्रह गरे । ‘प्रतिगमनकारी शक्तिलाई परास्त गर्न केन्द्रबाट भएको निर्णयलाई हामीले मान्नुपर्छ,’ उनले भने ।

रेनु दाहालको काम र व्यक्तित्वबाट आफू प्रभावित भएको नेपाली कांग्रेसका वरिष्ठ नेता रामचन्द्र पौडेलले बताए । ‘भरतपुरमा कालोपत्र नभएको कुनै सडक छैन । खानेपानी, तटबन्ध, अन्तर्राष्ट्रिय रङ्गशाला, प्रदर्शनी हललगायत धेरै काम भइरहेका रहेछन् । यस्ताे मान्छेलाई नजिताएर हुन्छ ?' उनले भने ।

माओवादीलाई एउटा महानगरमा भोट दिँदा माओवादीले कांग्रेसलाई तीनवटा महानगरमा भोट दिने हुँदा कुनै पनि घाटा नभएको उनले स्पष्ट पारे ।

रेनुको कामलाई भरतपुरवासीले देखिसकेको हुनाले उनलाई प्रचण्डकी छोरी मात्र भन्न नहुने नेकपा एकीकृत समाजवादीका अध्यक्ष माधवकुमार नेपालले बताए । ‘तापाईंहरूले उहाँको काम देखिसक्नुभएको छ । प्रचण्डको छोरी भन्दैमा अब उहाँलाई अर्कै पार्टीमा पठाउने त ? कि नेताको सन्तान नेता बन्न नपाउने ?’ नेपालले भने । त्यस्तै उनले रेनुको भाषण सुनेर दङदास बनेको बताए ।

रेनुलाई शंका नगरी सहयोग गर्नुपर्ने प्रधानमन्त्री तथा नेपाली कांग्रेसका सभापति शेरबहादुर देउवाले बताए । ‘मेचीदेखि महाकालीसम्मका साथीहरूले गठबन्धनलाई सहयोग गर्नुपर्छ । यस्तो काम गर्ने मान्छेलाई हराए भरतपुरका जनताले के भन्लान्,’ उनले भने ।

५ वर्षअघि आफूले गरेको प्रतिबद्धता पूरा गरेको र सुरु भएका ठूला योजनाहरू पूरा गर्न फेरि उम्मेदवारी दिएको भरतपुर महानगरपालिकाकी मेयर उम्मेदवार रेनु दहालले बताइन् । ‘मैले यो पाँच वर्षमा गरेको काम कास्टिङ मात्रै हो । भरतपुरबासीलाई फिल्म देखाउन बाकीँ नै छ,’ उनले भनिन् ।

सडक, कृषि, सभागृह निर्माण, तटबन्धन, पार्क, स्मार्ट बत्ती, शिक्षा, स्वास्थ्य, पर्यटन, सुकुम्बासीलगायतका विषयमा आफ्नो कार्यकालमा धेरै काम गरेको भए पनि काम फत्ते गर्न मेयर पदमा इच्छा देखाएको उनले बताइन् ।

प्रकाशित मिति: बिहीबार, वैशाख २२, २०७९ २१:०१