‘विद्यार्थीलाई दैनिक ११ रुपैयाँको खाजाले शिक्षा समाजवादी हुन्छ ?’

A+ A A-

शिक्षा, विज्ञान तथा प्रविधिमन्त्री गिरिराजमणि पोखरेलले अबको १० वर्षमा शिक्षा क्षेत्रमा ठूलो परिवर्तन देखिने दाबी गरेका छन् । २०७६–२०८५ लाई सामुदायिक शिक्षा सबलीकरणको दशक घोषणा गरिएकोले यसबीच शिक्षा क्षेत्रले फड्को मार्ने मन्त्री पोखरेलको तर्क छ ।

राष्ट्रिय युवा परिषद्ले बुधबार काठमाडौंमा आयोजना गरेको ‘सार्वजनिक शिक्षाको सबलीकरण र समाजवादी शिक्षा : अवस्था, चुनाैती र अबकाे बाटाे’ कार्यशाला गोष्ठीमा मन्त्री पोखरेलले शिक्षा क्षेत्रका लागि अबको दशक महत्त्वपूर्ण र ऐतिहासिक हुने बताएका हुन् ।

कार्यक्रममा समाजवादी शिक्षाको अवस्था र चुनौतीका विषयमा छलफल गरिएको थियो । पूर्वशिक्षामन्त्री गंगालाल तुलाधरले सुलभ, वैज्ञानिक र समाजवादी शिक्षाको विषयमा धेरै वर्षदेखि बहस भइरहे पनि उपलब्धि शून्य देखिएको बताए ।

समाजवादी शिक्षाको विषयमा उच्चस्तरीय राष्ट्रिय शिक्षा आयोगले तयार पारेको प्रतिवेदन सरकारलाई बुझाए पनि अझै सार्वजनिक नहुनु दुःखद भएको उनले बताए ।

सामुदायिक शिक्षा सुधार र योजनाबारे तयार पारिएको प्रतिवेदन गत माघमा प्रधानमन्त्री केपी शर्मा ओलीलाई बुझाइएको थियो । प्रतिवेदन अहिलेसम्म सार्वजनिक नगर्दा शिक्षा सुधारका योजना अलपत्र परेको तुलाधरको भनाइ छ ।

कार्यक्रममा नेपाली कांग्रेस केन्द्रीय सदस्य गुणराज घिमिरेले नेपालले आफ्नै शिक्षा नीति नबनाई अरुको अनुसरण गरेको बताए । अहिले बल्ल दुई तिहाइको सरकार बनेको भन्दै यो सरकारले शिक्षा सुधार गर्न सकेन भने अरुले गर्न नसक्ने उनको भनाइ थियो ।

नेकपा केन्द्रीय सदस्य लेखनाथ न्यौपानेले संविधानमा राखिएको समाजवाद शब्द जनतालाई खुसी बनाउन मात्रै राखिएको जस्तो लाग्न थालेको बताए ।

त्रिभुवन विश्वविद्यालय नांगिएको बताउँदै उनले पहिला विश्वविद्यालयले लाज ढाक्नुपर्ने बताए ।

त्यस्तै, शिक्षाविद् डा. मनप्रसाद वाग्लेले नेपालको शिक्षा पहिला पनि धमिलो भएको र अहिले पनि धमिलो नै भएको बताए । २ वर्षमा १२ लाख विद्यार्थीले सार्वजनिक विद्यालय छाडेको तथ्यांक प्रस्तुत गर्दै डा. वाग्लले प्राथमिक विद्यालयका विद्यार्थीलाई दैनिक ११ रुपैयाँको खाजाले समाजवादी शिक्षा नहुने बताए ।

कार्यक्रममा राष्ट्रिय युवा परिषद्का कार्यकारी उपाध्यक्ष माधव ढुंगेलले नेपालमा समाजवादी शिक्षाको अवधारण, आधार र भविष्यको विषयमा कार्यपत्र प्रस्तुत गरेका थिए ।

प्रकाशित मिति: बिहीबार, असार २६, २०७६ ०४:११