गिरीश गिरीको 'इन्ट्री'ले वीरगञ्जकाे मेयर दाैडमा सरावगी र सिंहलाई कति फरक पार्छ ?

गिरीश गिरीको 'इन्ट्री'ले वीरगञ्जकाे मेयर दाैडमा सरावगी र सिंहलाई कति फरक पार्छ ?

A+ A A-

१२ वैशाखमा उम्मेदवारी दर्ता गर्नु केही दिनअघिसम्म पत्रकार एवं लेखक गिरीश गिरी ‘सत्यमोहन’ पुस्तक यात्रामा थिए । सत्यमोहन जोशीबारे उनले लेखेको पुस्तक यात्रा सकिएलगत्तै वीरगञ्ज पुगेका उनी एकाएक महानगरकाे मेयर उम्मेदवारका रूपमा उदाए ।

धेरैलाई चकित पार्ने गिरीको घोषणाले वीरगञ्जको राजनीतिक समीकरणमा नयाँ तरंग ल्याएकाे देखिन्छ । राप्रपाबाट मेयरका उम्मेदवार गिरीसँग वीरगञ्जमा पुरानो विरासत छ । हुनलाई वीरगञ्ज महानगर कांग्रेस र मधेसकेन्द्रित दलहरूको प्रभाव बढ्ता भएको क्षेत्र हो । तर, वीरगञ्जका लाेकप्रिय पूर्वमेयर गाेपाल गिरीको प्रभावकै कारण राप्रपाबाट गिरीशकाे उपस्थितिलाई चासाेकाे साथ हेरिएकाे छ ।

अघिल्लो चुनावमा पाँचौँ भएको एमाले अहिले लोसपासँग गठबन्धन गरेर चुनावी मैदानमा छ । जसपाबाट चुनाव जितेका निवर्तमान मेयर विजय सरावगी एमाले प्रवेश गरी पुनः मेयरको उम्मेदवार भएका छन् । अघिल्लो चुनावमा सरावगीले १९ हजार ३ सय ९३ मत ल्याएका थिए ।

जसपा छोडेर एमाले गएका सरावगीसँगै केही वडाध्यक्ष पनि एमाले प्रवेश गरेका छन् । जसले गर्दा जसपाको केही मत र वीरगञ्ज बजारको केही मतमा सरावगीकाे पकड रहेकाे अनुमान भइरहेको छ । एमालेका उम्मेवार बसुरुद्दिन अन्सारीले गत चुनावमा ८ हजार ६ सय ८८ मत ल्याएका थिए । त्यसैले एमालेको पुरानो मत कायम रहने र सरावगीसँगै आएको मतले चुनावी परिणामलाई प्रभावित बनाउन सक्ने विश्लेषण भइरहेको छ । एमालेलाई त्यसबाहेकको फाइदा भने लोसपासँगको गठबन्धन हो ।

लोसपाका नेता विमल श्रीवास्तवको व्यक्तिगत लोकप्रियता र संगठित भोट एमाले उम्मेदवार सरावगीलाई आउनेछ । लोसपा नेता श्रीवास्तव अघिल्लोपटक फोरम लोकतान्त्रिकबाट उम्मेदवार भएका थिए । र, उनले ८ हजार ७ सय १ मत ल्याएका थिए । त्यसमा फोरम लोकतान्त्रिकको संगठित भोटबाहेक श्रीवास्तवको व्यक्तिगत लोकप्रियताको मत पनि रहेको छ ।

त्यसो त, लोसपा अर्थात् पहिलाको राजपाका उम्मेदवार राजेशमान सिंहले १२ हजार १ सय ६५ मत ल्याएका थिए । राजेशमान सिंहसँग संगठित र व्यक्तिगत लोकप्रियताको मत पनि जोडिएको छ । अहिले सिंह लोसपासँग नभएका कारण त्याे मत घट्ने देखिन्छ । तर, लोसपाको संगठित मत सरावगीले पाउनेछन् ।

तुलनात्मक रूपमा कमजोर भए पनि लोसपा र एमालेका संगठित मतसँगै विमल श्रीवास्तव र उम्मेदवार सरावगीको लोकप्रिय मतसमेत जोडिने भएकाले उनी बलियो दाबेदारका रूपमा देखिएका छन् । वीरगञ्ज बजार क्षेत्र र उद्याेगी व्यवसायी समुदाय सरावगीको पक्षमा देखिन सक्ने अनुमान पनि गरिन्छ ।

यद्यपि कांग्रेस र जसपाको गठबन्धनचाहिँ तुलनात्मक रूपमा बलियो गठबन्धन हो । तर, कांग्रेसभित्रको असन्तुष्टिले गठबन्धनलाई सकस हुनसक्ने अनुमान गरिएको छ । गत चुनावमा कांग्रेस उम्मेदवारले ल्याएकाे १७ हजार १ सय ९६ र जसपाबाट सरावगीले ल्याएकाे १९ हजार ३ सय ९३ मतलाई आधार मान्दा गठबन्धन बलियाे देखिन्छ ।

तर, कांग्रेसभित्र बढेको असन्तुष्टि र सरावगी तथा केही वडाध्यक्षको बहिर्गमनसँग घटेको जसपाको मतका कारण सिंह पहिलाजस्तो बलियो नहुन सक्ने विश्लेषण वीरगञ्जमा भइरहेको छ । तर, सिंहसँगै आउने केही व्यक्तिगत लोकप्रिय मत चाहिँ थपिन सक्छ ।

केन्द्रीय गठबन्धन अनुसार, माओवादीको ८ हजार ६ सय ८८ मत पनि सिंहको पक्षमा थपिने छ । तर, माओवादी वीरगञ्जमा कमजोर छ । उसको मत रहवर अन्सारीको व्यक्तिगत लोकप्रियताका कारणले ८ हजार पुगेको विश्लेषण पनि भइरहेको छ ।

शिलापत्रसँगको कुराकानीमा सिंहले गठबन्धनको बलियो मत र व्यक्तिगत प्रभावका कारण चुनाव जित्ने दाबी गर्छन् । युवा पुस्तामा सिंह लोकप्रिय छन् । त्यसको प्रभाव चुनावमा आउन सक्ने सिंह विश्लेषण गर्छन् । सिंह भन्छन्, ‘कांग्रेस र जसपाको बलियो जनमत रहेकाले चुनाव जितिन्छ ।’

सिंह र सरावगीको प्रतिस्पर्धाबीच छिरेका राप्रपा उम्मेदवार गिरी पनि तुलनात्मक रूपमा बलियो उम्मेदवारका रूपमा देखिएका छन् । गिरीको व्यक्तिगत विरासत र लोकप्रियताका कारण उनको मत निकै बढ्ने सम्भावना रहेको विश्लेषण भइरहेको छ ।गिरीशका बुबा पूर्वमेयर गाेपाल गिरीलाई द्वन्द्वकालमा माओवादीले हत्या गरेकाे थियाे । त्यसैले उनलाई सहानुभूतिकाे मत पनि थपिने आशा राप्रपाले गरेकाे छ ।

राप्रपा वीरगञ्जमा पहिला निकै लोकप्रिय भए पनि अघिल्लो चुनावमा खासै उत्साहजनक मत भने ल्याएन सकेको थिएन । त्यतिबेला राप्रपाबाट मेयरका उम्मेदवार अर्जुनबहादुर सिंह ठकुरी सातौँ नम्बरमा थिए । गिरी मधेसको राजनीतिमा रापताप निकै बढेको बताउँछन् ।

शिलापत्रसँग कुराकानी गर्दै गिरीले अपेक्षाकृत माहोल वृद्धि भइरहेको बताए । गिरीले भने, ‘उम्मेदवारी दर्ताको एक दिनअघि मात्र वीरगञ्ज आएँ । राप्रपाले चुनावी माहोल कभरअप गर्नुपर्नेछ । तैपनि अपेक्षाकृत रूपमा नै माहोल बन्दैछ ।’

प्रकाशित मिति: बिहीबार, वैशाख २२, २०७९ १५:०५