नवलपरासीमा यसरी भयो कांग्रेस र एमालेबीच 'ताण्डव'

A+ A A-

मंगलबार राति करिब साढे १० बजे पूर्वी नवरपरासीको हुप्सेकोट गाउँपालिका वडा नम्बर १ मा चुनाव प्रसारबाट फर्किएका नेकपा एमाले र नेपाली कांग्रेसका कार्यकर्ताकाे जम्काभेट भयो ।

सुरुमा नाराबाजी हुँदा स्थिति सामान्य भए पनि पछि झडपको स्थिति आइपर्‍याे । झडपमा पूर्वी नवलपरासीको हुप्सेकोट गाउँपालिका अध्यक्षका कांग्रेस उम्मेदवार लक्ष्मीदेवी पाण्डे र नेकपा एमालेका कार्यकर्ता मनोज गुरुङलगायतका ४ जना घाइते भएका छन् ।

घाइतेहरूको हाल भरतपुरको चितवन मेडिकल कलेजमा उपचार भइरहेको जिल्ला प्रहरी कार्यालय नवलपुरका डीएसपी सन्तोष पाठकले जानकारी दिए ।

‘प्रचारप्रसारबाट फर्किंदा झडप भएको रहेछ । गल्ती कसको हो भन्ने कुरा हामी अनुसन्धान गरिरहेका छौँ । अहिले सबै घाइतेको स्थिति सामान्य छ,’ उनले भने । घटनापछि दुईवटा मोटरसाइकल नियन्त्रणमा लिएको उनले जानकारी दिए ।

नेपाली कांग्रेसका कार्यकर्ताको गुण्डागर्दीका कारण यो घटना निम्तिएको नेकपा एमाले, हुप्सीकोट गाउँपालिका अध्यक्ष चेतन रानामगरको दाबी छ । ‘हाम्रा कार्यकर्ता मनोज गुरुङ हिजो वडा नम्बर २ को चुनावी कार्यक्रमबाट वडा नम्बर १ को बेलवा भन्ने ठाउँमा आफ्नो घर फर्कने क्रममा बुद्ध चोकमा नेपाली कांग्रेसका अध्यक्ष र उपाध्यक्ष पदका उम्मेदवार सवार स्कर्पियोबाट केही मान्छे ओर्लिएर कुटपिट गरे,’ उनले भने, ‘त्यसपछि मैले प्रहरी प्रशासन र नेपाली कांग्रेसका नेताहरूसँग कुरा गर्न चाहँदा पनि सम्पर्क भएन ।’

त्यसपछि मनोज गुरुङलगायतका कार्यकर्ताहरूसँग त्यही गाडी स्थानीय वीरबहादुर कुमालको घरअगाडि जम्काभेट हुँदा नेपाली कांग्रेसका कार्यकर्ताले निर्घात कुटेको उनको आरोप छ ।

‘भाइहरूले बाटोमा हिँडिरहेको मान्छेलाई किन दुर्व्यवहार गरेको भन्दा भनाभन भएपछि गाडी तोडफोड भएको हो । तर, गाडी तोडफोड भए पनि अध्यक्षको उम्मेदवारले घाइते भएको अभिनय मात्र गर्नुभएको हो । बरु हाम्रा तीन जना भाइहरूको अप्रेसन गर्नुपर्ने अवस्था आएको छ,’ उनले भने ।

मनोज गुरुङलगायतका एमालेका कार्यकर्ता आक्रमण गर्न सुनियोजित तरिकाले आएको नेपाली कांग्रेस हुप्सेकोटका सभापति बलबहादुर रानाले बताए ।

‘हामी आफ्नो हिसाबले घर जाने क्रममा मनोज गुरुङलगायतका एमालेका कार्यकर्ताले बाटोमै आक्रमण गरे । अध्यक्ष र उपाध्यक्षको गाडी पनि तोडफोड गरे,’ उनले शिलापत्रसँग भने, ‘२ नम्बर वडामा जाँदा मनोज गुरुङले बाटो छेकेछ । त्यसपछि भनाभन भयो । उनीहरू सुनियोजित हिसाबले लड्नै आएका रहेछन् । लड्न नआएको भए त उम्मेदवारको गाडीलाई तोडफोड गर्न त पर्ने थिएन नि ।’

लडेरै हिँड्ने हो भने आफूलाई एमालेले केही पनि गर्न नसक्ने उनले चेतावनी दिए । ‘मेलमिलापका लागि कसैले केही पनि गरेको छैन । एमालेको पालिका अध्यक्षसँग समान्य गफ मात्रै भएको छ । म सम्झाउँछु भनेका छन्,’ उनले भने, ‘कम्युनिस्टहरू मुखले मात्रै ठिक्क पार्छन् । व्यवहारमा देखिँदैन । अब जे परिस्थति हुन्छ, त्यसैको सामना गर्छौं भनेर हिँडेका छौँ ।’

प्रकाशित मिति: बुधबार, वैशाख २१, २०७९ १५:४५