राहुल गान्धी मध्यरातमा झुमेको एलओडी नाइट क्लबकाे कथा

A+ A A-

ठमेलकाे बारेमा राेचक किताब लेखेका रवि थापाले लेखेका छन्ः ठमेल काठमाडाैंकाे तारा हाे, जाे रातमा चमचमी चम्किन्छ ।

त्याे ठमेलमा विदेशीहरू नेपाल देख्न छिर्छन् । नेपालीहरू विदेश देख्न । छिमेकी भारतमा एक शीर्ष नेता राहुल गान्धीलाई ठमेल जान मन भयाे । उनी त्यहीँकाे एउटा नाइट क्लबमा साथीहरूसहित छिरे ।

भारतीय राष्ट्रिय कंग्रेसका पूर्व अध्यक्ष राहुल गान्धी खासमा पूर्वराजदूत भीम उदासकी छोरी तथा सीएनएन पत्रकार सुम्निमा उदासको बिहेभोज भ्याउन आएका हुन् । तर, नेपालको राजधानी आएका बेला राहुललाई नाइट क्लब छिर्ने सुर चढिहाल्यो । उनी हिजो राति पुगे ठमेलको एलओडीमा ।

एलओडी, अर्थात् लर्ड अफ् ड्रिंक्स । यति भएपछि राहुललाई आफ्नाे देशमा भाइरल हुने निहुँ पुगिहाल्याे । अझ कट्टरपन्थी हिन्दुत्ववादी भाजपालाई के चाहियो । कट्टरपन्थीहरूको एउटा साझा स्वभाव हुन्छ- सरकारमा छँदा पनि प्रतिपक्षीलाई लखेटिरहने । राहुल एलओडी पसेको भिडियो सेयर गर्ने भाजपा समर्थक टन्नै देखिन्छन्, ट्वीटर फेसबुकमा ।

भाजपाको सूचना तथा प्रविधि विभागका प्रमुख तथा पश्चिम बंगालका पार्टी इन्चार्ज अमित मालवीयले त ट्वीटरमा लेखे नै, ‘राहुल त्यो बेला काठमाडौंको नाइट क्लबमा मस्ती मारिरहेका छन्, जुन बेला मुम्बईमा आक्रमण र लुट चलिरहेको छ । उनको पार्टी फुटेर धुजाधुजा छ र उनी नाइट क्लबमा मोज गर्दैछन् । उनी यस्तै हुन् । उनी यही तालले बसिरहे अबको चुनावमा कंग्रेसले प्रधानमन्त्री लड्ने उम्मेदवार अन्तैबाट खोजेर ल्याउनुपर्ला ।’

तर, राहुल छिरेकाे नाइटक्लबकाे कथा पनि कम्ती राेचक छैन ।

युवापुस्तामा चर्चित ‘नाम हो लर्ड अफ ड्रिङ्स’ नेपालीमा यसलाई पेयको मालिक भनिन्छ । यो पेय पदार्थको नाम नभएर क्लबको नाम हो । जहाँ युवायुवती दिनभरको थकान भुल्दै संगीतमा झुम्छन्, हाँस्छन्, अनि दिल खोलेर कुरा गर्न सक्छन् ।

हजारौँ युवायुवती एकैपटक नाच्न सक्ने र त्यहीअनुसार रमाइलो गर्न सक्ने हुनाले पनि एलओडी युवापुस्तामा चर्चित छ । सयौँ युवालाई फ्लोरमा उतारेर नचाउने, झुमाउने एलओडीका सीईओ रविन श्रेष्ठ त्यही भिडमा भेटिन्छन् । उस्तै उमेरकाे देखिन्छन् । आफ्नै उमेर समूहलाई नेतृत्व गर्दै हँसाइरहेका भेटिन्छन् ।

यसरी हरेक दिन युवायुवतीहरूलाई नचाउनु, रमाइलो गराउनु, मीठा परिकार मीठो संगीतमा झुमाउँदै खुवाउनु उनको दैनिकी नै हो । रंगिन दुनियाँमा व्यवसाय खोज्दै हिँडेका रविन ठमेलमा व्यस्त छन् आजभोलि । अनि युवापुस्ताको मनमस्तिष्कमा बस्न पनि ।

अन्तर्राष्ट्रियस्तरको क्लबमा एलओडी

स्थापनाको ७ वर्ष पार नगर्दै अन्तर्राष्ट्रिय म्यागजिन डीजे म्यागले एलओडीलाई विश्वका उत्कृष्ट क्लबहरूमा उल्लेख गर्दै नोमिनेसनमा राख्यो । जसले युवापुस्तामा नेपालमा पनि विश्वका उत्कृष्ट क्लबहरूसँग जुध्ने क्लब आफ्नै देशमा रहेछ भन्ने जानकारी पनि दियो । यसैले पनि एलओडीलाई थप उचाइमा पुर्‍यायो ।

यो पनि : राहुल गान्धी एलओडी नाइट क्लब गएको खबरलाई भाजपाले बनायो मसला

‘अब विश्वको टप टेनमा पुर्‍याउने उद्देश्य छ हाम्रो,’ उनले भने । एकै पटकमा पाँच हजार मानिसलाई नचाउन सक्ने बनिसकेको एलओडीको कारोबार पनि करोडौँ रुपैयाँमा पुगिसकेको छ ।

सिंगापुरबाट फर्किएपछि व्यवसायमा

सामाखुसीका स्थायी बासिन्दा श्रेष्ठ भविष्य बनाउँछु भनेर सिंगापुर पुगे । तर उनी सिंगापुर बसिरहन भने सकेनन् । 'सिंगापुरमा देखिएका रेस्टुरेन्ट व्यवसाय नेपालमा गर्न पाए' भन्ने कौतुहलकै बीच फर्केका उनी एलओडीमा भेटिए । रविनसँगै एलओडीलाई व्यावसायिक बनाउन आइपुगे अन्य तीन सहकर्मी राजु सिंह, भूपेन कुँवर र रुदिप श्रेष्ठ ।

२०७० सालमा १२ करोड लगानीमा बनेको आलिशान क्लब अहिले २५ करोडको लगानीमा पुगिसकेको छ भने हजारौँको रोजगारीको स्रोत समेत बनेको छ । त्यहीबेला रविन र उनका साथीभाइ मिलेर रिफ नामको रेस्टुरेन्ट सुरु गरे । त्यसबाट उनलाई राम्रै प्रतिक्रियाहरू आए । जसबाट हौसिएर कर्मा क्लब पनि खोले ।

कर्मामा स्पेस सानो अनि लगानी पनि थोेरै । रविन र उनका साथीहरूलाई केही नयाँ गरौँ भन्ने हुटहुटी जाग्यो । जसले उनीहरूलाई कर्मामा सीमित हुन दिएन । उनी भन्छन्, ‘सानो लगानी थियो नाइट क्लबमा राम्रै पैसा कमाइ हुँदो रहेछ भन्ने बुझेपछि अझै धेरै स्पेस भएको थप गुणस्तरीय क्लब किन नखोल्ने भनेरै एलोओडी सुरुवात गरेका हौँ ।’

नेपालमा एलओडीको सुरुवात हुँदासम्म डान्स क्लबलाई राम्रो नजरबाट हेरिँदैनथ्यो । यद्यपि यस्ता क्लबहरूले आफ्नो छवि आजको दिनमा आइसक्दा समाजमा राम्रो बनाइसकेका छन् भने परिवारसँग क्लब गएर रमाइलो गर्नु समान्य बनिसकेको छ । रविन यसो हुनुमा एलोओडीको पनि योगदान महत्त्वपूर्ण रहेको बताउँछन् ।

पारिवारिक माहौलमा सांगीतिक मजा दिँदै आएको एलओडी कहिले विदेशी गायक/गायिकाका कारण चर्चामा आउँछ त कहिले राजघरानाको उपस्थितिले पनि चर्चामा आउने गर्छ । भन्छन्, 'एलओडीले थोरै आम्दानी गरेर रमाइलो गर्न आउने ग्राहकदेखि धनाढ्यसम्मलाई समेट्दै आएको छ । सबैलाई रमाइलो गर्ने ठाउँ चाहिएको थियो, त्यसको पूर्ति एलओडीले गरेको छ,’ ग्राहकको रोजाइअनुसार क्लबलाई सामान्य, भीआईपी र भीभीआईपी गरेर तीन क्षेत्रमा छुट्याएको छ । पर्याप्त स्थान भएका कारण स्थान स्तरीकरण मात्र गरेको छैन, एलओडीले गुणस्तरलाई कम्पनीको मोटोको रूपमा उभ्याएको पनि छ । भन्छन्, ‘क्वालिटीमा हामीले निक्कै ध्यान दिएका छौँ । त्यसैले पनि क्लब यो स्थानमा आइपुगेको छ ।’

नयाँ गर्ने हुटहुटी बाँकी नै

एलओडीको सफलता र चर्चाबाट पूर्ण सन्तुष्ट छैनन् रविन । यसको सेवा रात्रिक्लबमा रमाउन चाहने सबै नेपालीका साथै नेपाल भ्रमणमा आएका हरेक विदेशी पर्यटकसम्म पुर्‍याउने महत्त्वाकांक्षा उनमा भेटिन्छ ।

‘अहिलेको अवस्थामा धेरै नेपालीहरू विदेश घुमेर धेरै कुरा देखेर आउनुभएको छ । विदेशी नाइट क्लब देखेका त्यहाँ गएका मानिसलाई नेपालमै कसरी हुन्छ स्तरीय सेवा दिन हामी अनवरत प्रयासमा छौँ,’ एलओडीले प्रदान गर्ने सेवाको गुणस्तर बढाउन ध्यान दिनेबारे उनी थप्छन्, ‘क्लबमा बज्ने संगीत र छरिने प्रकाशले ग्राहकमा थप ऊर्जा थप्छ ।’

क्लबमा स्वअनुशासनको संस्कार रहेको रविन बताउँछन् । ‘हाम्रो क्लबमा पस्नेबित्तिकै जोकोहीलाई पनि यहाँ जे पायो त्यही गर्ने छुट रहेनछ भन्ने भान पर्छ । क्लबमा अनुशासन कायम होस्, अप्रिय घटना नहोस् भनेर हामीले बाउन्सर पनि राखेका छौँ,’ उनले भने ।

एलओडीमा रक्सी पिएर मातेकाले जथाभावी गर्न नसक्ने उनी बताउँछन् । ‘एलओडीमा परिवारका सदस्य नै भेला भएर रमाइलो गर्न सकिने वातावरण छ । हामीसँग १ सय ५० जनाको टिम छ । जसमा सेक्युरिटी बाउन्सरहरू पनि हुनुहुन्छ,’ उनले भने ।

१ हजारमै गर्न सकिन्छ रमाइलो

साथीभाइसँग बसेर गफिँदै संगीतमा झुमिनुलाई महँगो रूपमा नलिनुपर्ने रविन बताउँछन् । उनका अनुसार एलओडी आउन चाहने ग्राहकले एक हजार रुपैयाँ तिरे मात्रै पनि यी सुविधा सहजै पाउँछन् । क्लबले १ हजार रुपैयाँ प्रवेश शुल्क लिँदै आएको छ । यसमा पनि महिलालाई नि:शुल्क प्रवेशको व्यवस्थासमेत गरेको छ । ‘टेबलअनुसार प्याकेजहरू राखेका छौँ । जति रकमको टेबल बुकिङ गरेको छ, त्यति नै रकमको पिउने र खानेकुराहरूको व्यवस्था गर्छौं,’ उनले भने ।

राति ९ बजेदेखि बिहान ४–५ बजेसम्म चल्ने क्लबमा २ हजारदेखि ५ हजारसम्मको उपस्थिति दैनिक हुँदै आएको रविनको भनाइ छ । क्लबमा भर्खरै चर्चित नेपाली ब्यान्ड १९७४ एडीकाे भव्य कन्सर्ट चल्याे । पूर्वराजा ज्ञानेन्द्र गएकाे खबर आइरहन्छ । राहुल गान्धी जानु कुन नाैलाे कुराे भाे र ?

प्रकाशित मिति: मंगलबार, वैशाख २०, २०७९ १७:४१