उद्योगीलाई ऊर्जामन्त्रीको आश्वासन- अहिलेको समस्या क्षणिक हो, भोलिदेखि नै विद्युत् आपूर्ति सहज हुन्छ

उद्योगीलाई ऊर्जामन्त्रीको आश्वासन- अहिलेको समस्या क्षणिक हो, भोलिदेखि नै विद्युत् आपूर्ति सहज हुन्छ

A+ A A-

ऊर्जा, जलस्रोत तथा सिँचाइमन्त्री पम्फा भुसालले केही ठूला उद्योगहरूमा विद्युत् आपूर्तिमा देखिएको समस्याबारे उद्योगी तथा व्यावसायीसँग छलफल गरेकी छन् । मन्त्रालयमा आज केही उद्योगमा विद्युत् आपूर्तिमा गडबढी हुनुका कारणबारे नेपाल विद्युत् प्राधिकरण र नेपाल उद्योग वाणिज्य महासङ्घका पदाधिकारीसँग छलफल भएको हो ।

मन्त्री भुसालले विद्युत् आपूर्तिमा देखिएको समस्या क्षणिक भएको उल्लेख गर्दै भोलिदेखि नै आपूर्ति सहज हुने विश्वास दिलाएकी थिइन् । 'विद्युत् आपूर्तिमा देखिएको समस्या हाम्रो कारणबाट उत्पन्न भएको होइन, विश्वव्यापी समस्या हो । नेपालको सन्दर्भमा यसलाई सल्टाउन सरकार प्रतिबद्ध भएर लागेको छ, चाँडै समाधान हुन्छ,' उनले भनिन् ।

विगतमा ऊर्जा सुरक्षाका लागि ठूला जलाशययुक्त आयोजना नबन्दा सुख्खा समयमा समस्या देखिने गरेको भन्दै भुसालले केही दिनका लागि देखिएको समस्यालाई राजनीतिकरण नगर्नसमेत आग्रह गरिन् । 'ऊर्जाकै कारण हामीले समस्या भोग्नु पर्दैन, विगतमा ऊर्जा सुरक्षालाई ध्यान नदिँदा क्षणिक समस्या आएको हो, आगामी दिनमा यस्ता समस्या सल्टिँदै जानेछन्,' उनले भनिन् ।

मन्त्रालयका सचिव देवेन्द्र कार्कीले ऊर्जा प्रणालीमा देखिएको क्षणिक समस्या केही दिनमै हल हुने बताउँदै आत्तिनुपर्ने अवस्था नहरेको बताए । 'यो समस्या क्षणिक हो, राज्यले यसलाई सम्बोधन गर्छ,' उनले भने ।

नेपाल विद्युत् प्राधिकरणका कार्यकारी निर्देशक कुलमान घिसिङले पछिल्लो समयमा विद्युत् आपूर्तिमा देखिएको समस्या सामान्य भएको भन्दै उद्योगी व्यावसायीलाई नआत्तिन आग्रह गरे । 'अहिलेको समस्या दुईचार दिनको हो, आत्तिनु पर्दैन, छिट्टै समाधान हुन्छ,' उनले भने ।

उद्योग वाणिज्य महासङ्घका अध्यक्ष शेखर गोल्छाले विद्युत् आपूर्तिमा देखिएको समस्याबारे जानकारी गराएका थिए । 'विद्युत् आपूर्तिमा समस्या देखिएको छ, यसलाई सरकारले समाधान गर्नुपर्‍यो,' उनले भने ।

महासङ्घका वरिष्ठ उपाध्यक्ष चन्द्र ढकालले विद्युत् आपूर्ति सहज तुल्याउन सरकार र निजी क्षेत्र सँगसँगै मिलेर काम गर्नुपर्नेमा जोड दिए । आगामी दिनमा विद्युत्‌को गुणस्तरीयता सुधार हुने उनको विश्वास थियो ।

प्रकाशित मिति: सोमबार, वैशाख १९, २०७९ २०:४०