तालमेलबारे गठबन्धनको समीक्षा: व्यावहारिक कार्यान्वयनमा अझै चुनौती, एकताबद्ध हुन निर्देशन

तालमेलबारे गठबन्धनको समीक्षा: व्यावहारिक कार्यान्वयनमा अझै चुनौती, एकताबद्ध हुन निर्देशन

A+ A A-

स्थानीय चुनावमा गठबन्धन कार्यान्वयन गराउन बनाइएको मोडालिटी अवज्ञा बढेपछि सत्ता गठबन्धनले तालमेललाई व्यावहारिक रूपमा कार्यान्वयन गराउन एकपछि अर्को निर्देशन जारी गरेको छ ।

सत्ता गठबन्धनको शनिबार बसेको समीक्षा बैठकमा सैद्धान्तिक रूपमा गठबन्धन सफल भए पनि व्यावहारिक कार्यान्वयनमा जटिलता उत्पन्न भएकाले आवश्यक रणनीति र निर्देशन जारी गर्नुपर्ने निर्णय गरेको थियो । त्यही आधारमा आइतबार सत्ता गठबन्धनले अर्को निर्देशन जारी गरेको छ ।

आइतबारको बैठकबाट सत्ता गठबन्धनले बागी उम्मेदवार फिर्ता नभएका स्थानमा पनि गठबन्धनलाई कार्यान्वयन गराउन निर्देशन दिएको छ । गठबन्धनको मर्म र भावनाविपरीत असहयोगको स्थिति पैदा भए पार्टीबाट निष्कासित गरिने चेतावनी पाँच दलको छ । पाँच दलबीच समझदारी कायम भएको स्थानमा बागी उम्मेदवारी फिर्ता नभए पनि गठबन्धनको मर्म अनुसार अघि बढ्न उनीहरूले निर्देशन दिएका छन् ।

'पाँच दलीय गठबन्धनमा समझदारी भएको तर समझदारी अनुरुप उम्मेदवारी फिर्ता नलिएको तथा फिर्ता लिने समय अपुग भएका स्थानमा समझदारी अनुरुप कार्य गर्न/गराउन आ-आफ्ना दलले मातहतका निकायलाई निर्देशन गर्ने,' गठबन्धनको निर्णयमा भनिएको छ ।

गठबन्धनको मर्म र भावना अनुरुप आपसी एकता कायम गर्न उनीहरूले आ-आफ्ना कार्यकर्तालाई निर्देशन दिएका छन् । कतिपय स्थानमा सत्ता गठबन्धनका दलहरूले एमालेसँग समेत तालमेल गरेपछि गठबन्धनभित्र मात्रै तालमेल गरेर अघि बढ्न उनीहरूको निर्देशन छ ।

'गठबन्धनको मर्म र भावना अनुरुप आपसी एकता कायम गर्दै निर्वाचनमा सक्रियतापूर्वक जिम्मेवारी पूरा गर्ने । यो निर्णय पालना नगर्नेलाई आ-आफ्ना दलले कारबाही गर्ने निर्णय गरियो,' निर्देशनमा उल्लेख छ । गठबन्धनको व्यावहारिक कार्यान्वयन जटिल देखिएको सत्ता गठबन्धनको समीक्षा छ । केन्द्रबाट विभिन्न चरणमा निर्देशन दिए पनि त्यसको अवज्ञाले परिणाममा असर पर्न सक्ने चिन्ता सत्ता गठबन्धनका नेताहरूले गरेका छन् ।

कांग्रेस महामन्त्री विश्वप्रकाश शर्मा पाँच दलीय गठबन्धनबारे देखिएका असन्तुष्टिलाई मतदानको अघिल्लो दिनसम्म साम्य पारिने बताउँछन् । असन्तुष्टिको असर परिणाममा पर्न नदिने उनको भनाइ छ ।' असन्तुष्टिको व्यवस्थापन सन्दर्भमा गठबन्धनभित्र निरन्तर छलफल भइरहेको छ । मलाई विश्वास छ चुनावमा हामी एकढिक्का हुनेछौँ । अहिले देखिएका असन्तुष्टिहरूका असर परिणाममा पर्न दिनेछैनौँ,' शर्माले भने ।

कांग्रेसका प्रवक्ता प्रकाशशरण महतले एकाध स्थानमा देखिएका असन्तुष्टिका आधारमा तालमेल कार्यान्वयन कठिन रहेको भन्न नमिल्ने बताए । सत्ता गठबन्धनबीचको तालमेल बृहत्तर रूपमा सफल भएको उनले बताए । मतदानको दिनसम्म बागी उम्मेदवारहरू पनि पार्टीको आधिकारिक लाइनमा उभिने उनको दाबी छ । 'एकाधलाई छोड्ने हो भने सत्ता गठबन्धनबीचको तालमेल बृहत्तर रूपमा ठीक छ । बागी उठ्नुभएका साथीहरूले पनि ढिलो चाँडो बुझ्नुहुनेछ । ती साथीहरू पनि आधिकारिक गठबन्धनको पक्षमा आउनुहुनेछ,' उनले भने ।

माओवादी केन्द्रका नेता देव गुरुङ गठबन्धनको व्यावहारिक कार्यान्वयनको जटिलता मतदानअघिसम्म समाधान हुने विश्वास गर्छन् । 'निर्वाचनमा असन्तुष्टि पैदा हुनु स्वाभाविक हो । सैद्धान्तिक रूपमा प्रतिगमनविरुद्ध हामी सबै एकै ठाउँमा छौँ । अब व्यावहारिक रूपमा बलियो हुन हामीभित्र आन्तरिक एकता हुनैपर्छ । त्यही एकता कायमका लागि हामीले निर्देशन दिएका हौँ,' उनले भने ।

नेकपा एकीकृत समाजवादीका प्रवक्ता समेत रहेका उपमहासचिव जगन्नाथ खतिवडा स्थानीय चुनावमा गठबन्धनको व्यावहारिक कार्यान्वयन निकै जटिल देखिएको बताउँछन् । जटिलताको समाधान भने गरिने उनको भनाइ छ । 'अहिलेसम्मको स्थितिमा गठबन्धन कार्यान्वयनका निम्ति हामी सैद्धान्तिक रूपले सफल छौँ । व्यावहारिक जटिलता समाधान गर्न हामी सक्रिय छौँ र गर्नेछौँ,' उनले भने ।

राष्ट्रिय जनमोर्चाकी उपाध्यक्ष दुर्गा पौडेलले गठबन्धनका दलको आ-आफ्नो स्वार्थ त्यागेर परिणाम सु:खद बनाउन लाग्नुपर्ने बताइन् । 'अहिले गठबन्धन दलबीच नै आ-आफ्नो स्वार्थ हाबी भएको स्थिति छ । पाँच दलकै पक्षमा नतिजा ल्याउन हामीले अझै रणनीति बनाउनुपर्ने अवस्था छ,' उनले भने ।

१५ चैतदेखि एक महिनाको अवधिमा सत्ता गठबन्धनले तालमेल सफल बनाउन ८ पटक निर्देशन जारी गरेको छ । दलगत रूपमा छुट्टाछुट्टै र संयुक्त रूपमा उनीहरूले कार्यकर्तालाई विभिन्न सर्कुलर पठाएका हुन् । सर्कुलर र निर्देशनका बाबजुद गठबन्धनमा बागी उम्मेदवारको संख्या प्रशस्तै छन् । मतदानको अघिल्लो दिनसम्‍म गठबन्धनको आधिकारिक लाइनमा उभिए कारबाही फिर्ता हुने आश्वासन पाँच दलले आ-आफ्ना कार्यकर्तालाई दिएका छन् ।

प्रकाशित मिति: आइतबार, वैशाख १८, २०७९ १६:३८