भरतपुरमा आशावादी एमाले, कांग्रेसको असन्तुष्टि माओवादीलाई टाउको दुखाइ

A+ A A-

गठबन्धनको तर्फबाट एक मात्र महानगर पाएको माओवादी केन्द्रलाई भरतपुरमा चुनाव जित्न कांग्रेसको आस थियो । अघिल्लो स्थानीय तहको निर्वाचनमा नेकपा एमालेका उम्मेदवार देवीप्रसाद ज्ञवालीलाई २ सय ३ मतको झिनो अन्तरले हराएकी माओवादी केन्द्रकी नेतृ रेनु दाहाललाई भरतपुरमा आफ्नो विरासत मात्रै होइन, पार्टी अध्यक्ष पुष्पकमल दाहालका लागि संसदीय निर्वाचनमा माहाेल तयार पार्नुपर्ने चुनौती पनि छ ।

यही विरासत जोगाउन पनि माओवादी केन्द्रले एउटा मात्रै महानगरमा चित्त बुझाएको हो । भरतपुरमा जित्ने रेनुको आकांक्षामा कांग्रेसनेता तथा पूर्व सांसद जगन्नाथ पौडेल तगारो बनेपछि माओवादीलाई दबाब बढ्नेमा एमालेका नेता आशावादी देखिएका छन् । अघिल्लो पटकको स्थानीय निकायको निर्वाचनमा भरतपुरमा कांग्रेसका असन्तुष्ट ५ हजार ५ सय कार्यकर्ताहरूले रुख चिह्नमा भोट हालेको अवस्थामा यो पटक त्यो आँकडा बढ्ने एमालेका नेताहरू बताउँछन् ।

भरतपुरमा यो पटक स्वाभाविक रूपमा एमालेले चुनाव जित्ने नेकपा एमाले चितवनका अध्यक्ष रामप्रसाद न्यौपानेको दाबी छ ।

‘उम्मेदवारी दिँदादेखि नै हाम्रो जित सुनिश्चित थियो । जगन्नाथजीले कांग्रेसको मूल्य मान्यता जोगाउन जुन प्रकारले उम्मेदवारी दिनुभयो, त्यो उम्मेदवारीले अर्को दललाई स्वाभाविक रूपमा फाइदा हुने नै भयो,’ उनले भने ।

एमालेको चुनावको तयारीले पहिले नै भरतपुरवासीमा प्रभाव परिसकेको न्यौपानेको तर्क छ । अघिल्लो कार्यकालमा रेनु दाहालले प्रभावकारी ढंगले काम गर्न नसकेका कारण पनि यो पटक एमालेले चुनाव जित्ने उनको दाबी छ ।

‘यत्रो महानगरमा रिङरोड खै ? ल्यान्डफिल साइट खै ? यस्तो महत्त्वपूर्ण महानगरमा कुनै दीर्घकालीन योजना छैन । अनि फेरि जनताले उहाँहरूलाई नै जिताउँछन् त ?,’ उनले भने ।

अहिलेको परिस्थति हेर्दा नेकपा एमालेले कम्तीमा ८ हजार मतले मेयरमा जित्ने उनको दावी छ ।

तर, गठबन्धनको उम्मेदवारलाई जिताउनका लागि गठबन्धनसँग जोडिएका राजनीतिक दलहरूको कर्तव्य भएकाले भरतपुरकाे कांग्रेसले मेयरमा रेनु दाहाललाई नै भोट हाल्ने चितवन कांग्रेसका उपसभापति राजीव न्यौपानेको दाबी छ ।

‘यो कसैलाई मेयर/उपमेयर बनाउन बनेको गठबन्धन होइन । यो गठबन्धन केपी ओलीले गरेको बर्बर सत्ताआतंकलाई परास्त गर्ने माहाेलबाट, आन्दोलनको मैदानबाट बनेको गठबन्धन हो,’ उनले भने, ‘रिस्क जोनमा पुगेको संविधानलाई ट्र्याकमा ल्याउने र स्थानीय तहको निर्वाचनमा गठबन्धनलाई स्थापित गरेर त्यसैको जगमा सघं र प्रदेशको निर्वाचनमा विजयी गराउने योजनासहित बनेको गठबन्धन भएकाले कांग्रेसका कार्यकर्ताहरूले इमानदारीपूर्वक पार्टीको निर्णय मान्नुहुन्छ ।’

गठबन्धनको हार हुनु भनेको केपी ओली प्रवृत्ति दोहोरिनु भएकाले जनताले जानाजान दुर्घटना हुन लागेको रेल नचढ्ने न्यौपानेले स्पष्ट पारे ।

जगन्नाथ पौडेलको उम्मेदवारी अपवाद भएकाले यो अपवादले राजनीतिमा प्रभाव नपार्ने नेकपा माओवादी केन्द्र चितवनका संयोजक आरसी अधिकारी बताउँछन् । ‘नेपाली कांग्रेस गठबन्धनप्रति इमानदार छ । त्यस कारण कुनै एक जनाको उम्मेदवारीले खास अर्थ राख्दैन,’ उनले भने ।

रेनु दाहालले मेयरमा रहँदा गरेका कामका कारण पनि जित सुनिश्चत भएको अधिकारीको दाबी छ । ‘उहाँ प्रचण्डको छोरी मात्रै होइन, टेस्टेड मेयर हो । गठबन्धनको इमानदारिता र उहाँको कामको मूल्याङ्कनका कारण जित सुनिश्चित छ,’ उनले भने ।

रेनुले कति मतले जित्ने आफूहरूले हिसाव गरेर नबसेको भए पनि उनले स्पष्ट बहुमत ल्याउने अधिकारीको तर्क छ । त्यसैगरी, जगन्नाथ पौडेल नेपाली कांग्रेसको इमानदार कार्यकर्ता भएकोल एमालेसगँ मिलेर गठबन्धनको विरुद्धमा नलाग्ने उनले विश्वास व्यक्त गरे ।

प्रकाशित मिति: आइतबार, वैशाख १८, २०७९ २१:२०