चारचोटि बत्ती निभ्दा दुई भाेट गायब भएकाे त्याे मतगणना, मैदानमा फेरि रमेश राय र अरुण चौधरी

चारचोटि बत्ती निभ्दा दुई भाेट गायब भएकाे त्याे मतगणना, मैदानमा फेरि रमेश राय र अरुण चौधरी

A+ A A-

२०७४ सालमा वडाध्यक्षको चुनाव जितेर पनि महाेत्तरीकाे मनरा शिसवा नगरपालिका-१० का रमेश रायले चार वर्ष एक महिना हारेरै हिँड्नुपर्‍यो । ढिलो गरी ६ कात्तिक २०७८ मा अदालतबाट उनले न्याय पाए । त्यसको ६ महिनालगत्तै अर्को चुनाव हुँदैछ ।

रायले ५/६ महिनाका लागि वडाध्यक्षको कुर्सीमा नबस्ने निधो गरेका थिए । तर, प्रमुख जिल्ला अधिकारी बासुदेव दाहालले वडाध्यक्षविहीन हुँदा वडावासीले दुःख पाउने भन्दै पदभार सम्हाल्न आग्रह गरेपछि गत १५ कात्तिकदेखि राय वडा कार्यालय जान थाले । यद्यपि, नगरपालिकाको वेबसाइटबाट अरुण चौधरीको नाम अझै हटाइएको छैन ।

अघिल्लो चुनावमा स्वतन्त्र उम्मेदवारी दिएका उनी यसपालि जनता समाजवादी पार्टी (जसपा)बाट वडाध्यक्षमा उठेका छन् । उनका अरु १० प्रत्यासीमध्ये एकजना नेपाली कांग्रेसका अरुणकुमार चौधरी नै हुन्, जो हारेर पनि चार वर्षसम्म वडाध्यक्षको कुर्सीमा बसेका थिए ।

चारचोटि बत्ती निभ्दा दुई मत गायब

वैशाख ३१, असार १४ र असोज २ गते गरी ०७४ सालमा स्थानीय चुनाव तीन चरणमा भएको थियो । मनरा शिसवामा पनि २ असोजमा चुनाव भयो । ८ असोजमा मतपरिणाम आयो । त्यो बेला वडाध्यक्षमा स्वतन्त्रबाट राय र कांग्रेसका चौधरीसहित ९ जना उम्मेदवार थिए । ‘मतगणना अन्तिमअन्तिममा पुगेपछि तीन चारचोटि झ्यापझ्याप बत्ती निभाइयो’, राय सम्झिन्छन्, ‘पछि अरुण चौधरी र मेरो मत बराबरी भएको जनाइयो ।’

दुवै जनाले समान २ सय ६७ मत पाएको भन्दै त्यसबेलाका निर्वाचन अधिकृत आमबहादुर बानियाँले गोलाप्रथा गराउने निर्णय लिए । चिट्ठा चौधरीले ताने । रायले हारे ।

राय तत्कालीन राष्ट्रिय जनता पार्टी (राजपा) मा आबद्ध थिए । तर राजपाले उनलाई टिकट नदिएर वडाध्यक्षमा भागिरथ ठाकुरलाई उठायो । रायले बागी उम्मेदवारी दिए । राजपाका ठाकुर १ सय ९२ मतमा सीमित भए ।

गोलाप्रथामा हारेपछि राय निराश भएर फर्किए । तर, सकरी गाउँबासीले उनलाई चुप लागेर बस्न दिएनन् । रायको घर भएको गाउँ हो सकरी । ‘गाउँलेहरूले चन्दा उठाएर दिए अनि मुद्दा हाल्न जाऊ भने’, राय सम्झिन्छन् ।

रमेश राय ।

गाउँलेले आँट दिएपछि उनले २२ असोज २०७४ मा पुनः मतगणना गरिपाऊँ भनी उच्च अदालत जनकपुरमा मुद्दा हाले । अदालतले २१ असार २०७५ मा पुनः मतगणना गर्ने आदेश दियो । तर, गोलाप्रथाबाट जितेका चौधरीले उच्च अदालतको आदेशविरुद्ध सर्वोच्चमा रिट हाले । त्यसपछि कोराना महामारीका कारण अदालत बन्द भयो । महामारी मत्थर भएपछि ६ चैत २०७७ मा सर्वोच्चले उच्च अदालतको आदेशलाई सदर गरिदियो । लगत्तै कोरोनाको तेस्रो लहर सुरु भएपछि अदालतको आदेशअनुसार पुनः मतगणना गर्न ढिलाइ भयो । ०७८ सालमा पुनः भोट गन्दा रायको २ मत बढी पाइयो । गोलाप्रथाबाट हारेका उनले अदालतमा जिते ।

मुद्दाका लागि अदालत धाउँदा उनको झण्डै चार लाख रुपैयाँ सकियो । तर, जलेश्वर-१२ मा पोल्टी फार्म चलाउने राय आफ्नो पैसा खर्च नभएको बताउँछन् । ‘गाउँलेले हजार, दुई हजार गर्दै उठाएर दिएको चन्दाले नै मैले मुद्दा लडेँ र जितेँ’, उनले भने, ‘नभए मैले कहाँबाट ल्याउनु त्यत्रो पैसा ?’

०६३ सालमा तत्कालीन मधेसी जनाधिकार मञ्चबाट राजनीति थालेका राय अहिले जनता समाजवादी पार्टीबाट वडाध्यक्षका उम्मेदवार छन् । मनरा शिसवा-१० मा उनका प्रतिद्वन्द्वी उनै अरुण चौधरी हुन् । तर रमेश राय चुनाव जित्ने हिसाब गरेर बसेका छन् ।

६ हजार ४ जनसंख्या रहेको वडा नम्बर १० मा तीन गाउँ छन्, सकरी, मरुवाही र मधवा । सकरीमा १ हजार १८, मरुवाहीमा १२ सय १८ र मधवामा ७ सय २६ गरी वडा नम्बर १० मा २९ सय बढी मतदाता छन् ।

यीमध्ये रायको घर रहेको सकरीबाट मात्रै ६ जना उम्मेदवार छन् । तैपनि यहाँबाट खस्ने ६ सयमध्ये आफूले चार सय मत पाउने रायको विश्वास छ । महरुवाहीमा ८ सयजति भोट खस्दा आफूलाई २ सय चानचुन आउने उनी बताउँछन् । ‘मधुवामा ४ सयजति मत खस्छ, यसमा मलाई २ सय प्लस आउँछ’, रायले हिसाब सुनाए । २०७४ सालको चुनावमा २ हजार २ सय २६ मतदाता रहे पनि यहाँ १ हजार ४ सय ३९ भोट खसेको थियो । मनरा शिसवामा वडाध्यक्ष जित्न उम्मेदवारले पाँच सय मत कटाउनुपर्नेछ ।
‘०७४ सालमा मैले जितेर पनि चार वर्ष पराजितजस्तो बनेर बस्नुपर्‍यो’, उनले भने, ‘अदालतबाट ढिलै भए पनि न्याय पाएँ । इतिहास बन्यो, यसपालि भारी मतले जितेर अर्को इतिहास बनाउनु छ ।’

चार वर्षपछि मुद्दा जितेका उनी वडाध्यक्ष भएर जाँदा वडामा आएको बजेट सक्किइसकेको थियो । ‘नागरिकता सिफारिसमा हस्ताक्षर गर्नेबाहेक विकासका अरु काम गर्न पाइनँ’, उनले भने, ‘तर जनतालाई परेको साह्रोगाह्रोमा भने साथ दिएँ, जुन म वडाध्यक्षको कुर्सीमा नहुँदा पनि गर्थें ।’

५० वर्षे रायका दुई छोरामध्ये जेठा रोजगारीका लागि मलेसियामा छन् । कान्छो छोरा जलेश्वर नगरपालिकामा सञ्चालित प्रधानमन्त्री स्वरोजगार कार्यक्रमका सहायक इन्जिनियर हुन् । जनकपुरमा स्कुल पढाउँदै गरेकी छोरी लोकसेवा आयोगको तयारी गरिरहेकी छन् ।

'छोराछोरीलाई जागिर लगाऊँला, उनीहरूका लागि कमाऊँला भनेर म राजनीतिमा लागेको होइन’, राय भन्छन्, ’गरिबको छोरा हुँ, गरिब जनतामाझ रहेर उनीहरूका लागि काम गर्न वडाध्यक्ष बन्न खोजेको हुँ ।’

उनका प्रत्यासी अरुण चौधरी पनि यसपालि चुनाव जित्ने दाबी गर्छन् ।

मनरा शिसवा नगरपालिकामा ५२ हजार जनसंख्या छ । यहाँ २७ हजार बढी मतदाता छन् । ०७४ सालको चुनावमा नगरपालिकाकाे मेयर, उपमेयरसहित ६ वटा वडामा तत्कालीन राजपाले जित हात पारेको थियो । राजपाबाट जितेका सबै जनप्रतिनिधि अहिले लाेकतान्त्रिक समाजवादी पार्टी (लाेसपा) मा छन् । यसपालिकाे चुनावमा लाेसपाले निवर्तमान मेयर सञ्जय सिंह र उपमेयरमा रमिता प्रधानलाई नै उम्मेदवार बनाएकाे छ ।

केन्द्रमा सत्ता गठबन्धनकाे निर्णयविपरीत यहाँ तीन दलले आ-आफ्नै उम्मेदवार अघि सारेका छन् । जसपाबाट महिन्द्र यादव, कांग्रेसबाट गाेपाल पाण्डे (सुनिल), माओवादीबाट कुन्दन झाले मेयरमा उम्मेदवारी दिएका छन् । एमालेले राजेन्द्र साहलाई उम्मेदवार बनाएकाे छ ।

प्रकाशित मिति: शनिबार, वैशाख १७, २०७९ १२:४०