कोहलपुरको त्रिपक्षीय भिडन्त तलमाथि पार्न सक्छन् स्वतन्त्र उम्मेदवार देवानन्दले

कोहलपुरको त्रिपक्षीय भिडन्त तलमाथि पार्न सक्छन् स्वतन्त्र उम्मेदवार देवानन्दले

A+ A A-

काठमाडौं महानगरको मेयरमा स्वतन्त्र उम्मेदवार बालेन शाहको जति चर्चा छ, बाँकेको कोहलपुर नगरपालिकामा देवानन्द अर्याल उस्तै चर्चामा छन् ।

पाँचतारे होटल सञ्चालक उनले कोहलपुरमा लोकप्रिय युवा पर्यटन व्यवसायीको परिचय बनाएका छन् । १५ वर्षअघि वैदेशिक रोजगारीबाट फर्किएपछि उनले गृहनगरमै होटल व्यवसाय सुरु गरेका थिए । त्यसलाई विस्तार गर्दै पाँचतारे बनाए । उनै देवानन्द अहिले कोहलपुरको मेयरमा स्वतन्त्र उम्मेदवारी दिएर चर्चामा छन् ।

उनी कांग्रेस राजनीतिक पृष्ठभूमिबाट आएका हुन् । अलि मिहिनेत गरेको भए उनले कांग्रेसबाटै टिकट पाउन सक्थे । तर, दुई महिनाअघि नै कांग्रेस छाडेर स्वतन्त्र उम्मेदवारी घोषणा गरे । ‘यो कांग्रेसबाट पार लाग्दैन । नगरको विकास पनि हुन्न । विपन्न समुदायले शिक्षा र स्वास्थ्य पाउन्नन् भन्ने बुझेरै कांग्रेस छाडेको हुँ,’ उनले शिलापत्रसँग भने, ‘अरु पार्टी पनि उस्तै छन् । तिनमा लागेर पनि हुनेवाला केही छैन । त्यसैले स्वतन्त्र उम्मेदवारी घोषणा गरेँ ।’

अघिल्लो चुनावको मतपरिणामलाई विश्लेषण गर्दा कोहलपुरमा एमाले, कांग्रेस र माओवादी केन्द्रबीच त्रिपक्षीय भिडन्त हुने देखिन्छ । तर, देवानन्दको स्वतन्त्र उम्मेदवारीले यी दलहरूको चुनावी गणित तलमाथि हुन सक्छ । कांग्रेस पृष्ठभूमि भए पनि उनले तीनवटै पार्टीको भोट प्रभावित पार्न सक्ने देखिन्छ । ‘म चुनाव जित्ने स्थितिमा छु,’ देवानन्दको दाबी छ, ‘पार्टीहरूले जे सोचिरहेका छन् त्यस्तो हुनेछैन । कार्यकर्ताबाहेक अरुको भोट स्वतन्त्र छ, स्वतन्त्र उम्मेदवारलाई जान्छ ।’

बितेको पाँच वर्षमा स्थानीय सरकारको अकर्मण्यता देखेर आफू मेयरको चुनाव लड्न आएको उनी बताउँछन् । ‘राज्य दलालको कब्जामा छ । राज्यविरुद्ध बोल्ने मान्छे भएन । निमुखा नागरिकको आवाज बोल्न मैले साहस गरेको छु,’ उनले भने ।

आफूले मेयर जिते एक वर्षभित्र सामुदायिक शिक्षा र निःशुल्क स्वास्थ्यको क्षेत्रमा धेरै काम गर्ने देवानन्दको प्रतिबद्धता छ । सामुदायिक विद्यालयलाई भौतिक पूर्वाधार विकास, शिक्षक दरबन्दी थप र स्कूल बस उपलब्ध गराउने उल्लेख गर्दै उनले भने, ‘गरिबका छोराछोरीले पनि निःशुल्क गुणस्तरीय शिक्षा पाउनेछन् । हरियो बसमा स्कुल जानेछन् ।’

पाँच वर्षअघिको चुनावी मतपरिणामका आधारमा यसपटक पनि एमाले, कांग्रेस र माओवादी केन्द्रबीच त्रिपक्षीय भिडन्त हुने अनुमान छ । कोहलपुरको मेयरका लागि एमालेले नगर कमिटी अध्यक्ष खिलप्रसाद भुसाललाई उठाएको छ । त्यस्तै, कांग्रेसले युवा नेता पूर्ण आचार्यलाई अघि सारेको छ भने माओवादी केन्द्रले एकीकृत समाजवादीसँगको गठबन्धनमा नरेन्द्र न्यौपानेलाई दोहोर्‍याएर उम्मेदवार बनाएको छ । १ लाख २ सय ८९ जनसंख्या रहेको कोहलपुरमा ५६ हजार ७ सय ९७ मतदाता छन् ।

एमालेका मेयर उम्मेदवार भुसालले कोहलपुर एमालेको लालकिल्ला भएकाले कसैले भत्काउन नसक्ने दाबी गरे । उनले जवाफदेहिता, पारदर्शिता र सुशासनसहितको विकासप्रति प्रतिबद्धता जनाएका छन् । सामुदायिक विद्यालय सुधार र घरदैलोमा जनस्वास्थ्य सेवालाई पहिलो प्राथमिकतामा राखेको भुसालले बताएका छन् । विद्यार्थी संख्याअनुसार शिक्षक दरबन्दी उपलब्ध गराइने उल्लेख गर्दै उनले भने, ‘धेरै मोटा कुराभन्दा पनि नगरबासीका लागि सहज सेवा बिस्तारमा मेरो ध्यान जानेछ । मलाई जिताएकोमा कसैले पछुतो मान्नुपर्ने छैन ।’

कांग्रेसमा टिकट वितरणले विवाद निम्त्याएको थियो । पुराना नेता बलराम शर्माले स्थानीय प्रभावशाली नेताहरूको सहयोगमा स्वतन्त्र उम्मेदवारी दिएपछि कोहलपुरमा कांग्रेसको मत पूरै विभाजित थियो । तर, शुक्रबार शर्माले उम्मेदवारी फिर्ता लिएपछि कांग्रेस उम्मेदवार आचार्य उत्साहित छन् । ‘आन्तरिक केही असन्तुष्टि थिए । बागी उम्मेदवारी फिर्तापछि त्यो असमझदारी सकिएको छ,’ उनले भने, ‘हामी चुनाव जित्ने स्थितिमा पुगेका छौँ ।’

उनले भौतिक पूर्वाधारसँगै मानवीय विकासलाई आफूले प्राथमिकतामा राखेको बताए । शिक्षा र स्वास्थ्यलाई विपन्न समुदायको पहुँचमा पुर्‍याउने प्रतिबद्धता जनाएका आचार्य आफ्नो प्रतिस्पर्धा एमालेसँगै हुने बताउँछन् । ‘तामझाम त माओवादीको धेरै नै छ । तर, प्रतिस्पर्धा एमालेसँगै हुन्छ,’ उनले भने ।

माओवादी केन्द्रका उम्मेदवार नरेन्द्र न्यौपाने आफूले चुनाव जिते विद्युत्, खानेपानी र शिक्षा निःशुल्क उपलब्ध गराएर आधारभूत तहका नागरिकलाई गणतन्त्रको अनुभूति गराउने बताउँछन् । ‘जनताले गणतन्त्रको वास्तविक अनुभूति गर्न पाएका छैनन् । हामीले त्यो काम गर्नेछौँ,’ उनले भने ।

नगरका स्वास्थ्य संस्थाबाट दिइने सेवा निःशुल्क गर्ने, रेबिज, सर्पदंशका बिरामीको निःशुल्क उपचार गराउने र नगरमा निःशुल्क एम्बुलेन्स सेवा सञ्चालन गर्ने आफ्नो योजना रहेको उनले बताए । अघिल्लो निर्वाचनमा तेस्रो भए पनि यसपटक कोहलपुरमा माओवादी केन्द्रले संगठन विस्तार गरेर चुनाव जित्ने तहमा पुगेको दाबी गर्दै न्यौपानेले भने, ‘आजसम्मको स्थिति हेर्दा कांग्रेसको जनमत खलबलिएको छ । त्यसैले एमाले र माओवादीबीचै मुख्य प्रतिस्पर्धा हुने अवस्था छ ।’

मुख्य प्रतिस्पर्धी दाबी गरिरहेका उम्मेदवारहरू स्वतन्त्र उम्मेदवार देवानन्दले केही मत प्रभावित पार्ने भए पनि उनैले चुनाव जित्ने सम्भावना नरहेकोमा भने एकमत छन् । २०७४ को स्थानीय चुनावमा एमालेका लुटबहादुर रावत ९ हजार ७ मतसहित कोहलपुर नगरपालिकाको मेयर निर्वाचित भएका थिए । उनका निकटम् प्रतिद्वन्द्वी कांग्रेसका भानुभक्त भट्टराईले ८ हजार ९ सय २४ मत ल्याउँदा माओवादी केन्द्रका नरेन्द्र न्यौपानेले ६ हजार २ सय २१ प्राप्त गरेका थिए ।

प्रकाशित मिति: शुक्रबार, वैशाख १६, २०७९ १९:४५