हेर्दा हेर्दै सकिएका जनकपुरका दुई ‘डन’

A+ A A-

जनकपुरमा मन्त्री, प्रधानमन्त्री र राष्ट्रपतिभन्दा दुई डनको चर्चा बढी हुन्थ्यो । एक डन कदम चोकमा बसेर र अर्को डन रामानन्द चोकमा बसेर जनकपुरमा हैकम चलाउँथे ।

ती डन हुन्, पूर्व राज्यमन्त्री सञ्जय साह र वैकुण्ठ दास वैकुण्ठ ।

खुसी हुँदा फायरिङ

कबाडीको कारोबारबाट ठेकेदार बनेका पूर्वराज्यमन्त्री साहले करोडौं रुपैयाँ आर्जन गरेका थिए । उनी सानोतिनो विवादमा पैसा लिएर एउटाको पक्षमा काम गर्थे ।

त्यतिखेर जनकपुरमा सञ्जयले आतंक फैल्याएका थिए । सञ्जयको नाउँ सुन्नासाथ मानिसहरू थुरथुर हुन्थे । सञ्जय खुसी हुँदा फायरिङ गर्थे ।

जिल्ला विकास समिति धनुषाका तत्कालीन सभापति रामचरित्र साहले सञ्जयलाई आर्थिक रूपमा सहयोग गरेका थिए । साहले सञ्जयलाई जिल्ला विकास समितिका महत्त्वपूर्ण ठेक्का मिलाइदिन्थे ।

पैसा र गुन्डागर्दीकै प्रभावमा जनकपुरधामबाट दुईपटक सञ्जय सांसद भएका थिए । उनी केही दिनका लागि भौतिक योजना तथा निर्माण राज्यमन्त्री समेत भए ।

जनकपुरधाममा सञ्जयको आदेशबिना कुनै ठूलो काम सुरु हुँदैनथ्यो । ठेक्काहरूमा पनि सञ्जयकै राज थियो । पारिवारिक विवाद पनि सञ्जयले मिलाइदिन्थे ।

जिल्ला अदालत धनुषाले पूर्वराज्यमन्त्री सञ्जय साहलाई सञ्चार उद्यमी अरुण सिंघानिया हत्याकाण्डमा दोषी ठहरी गरी आजीवन कारावासको सजाय सुनाएको छ ।

यसअघि साहलाई जनकपुरधामको रामानन्द चोकमा भएको बमकाण्डमा पनि दोषी ठहर गर्दै आजीवन कारावासकै सजाय सुनाइएको थियो ।

मन्दिरको जग्गामा व्यापारी

त्यस्तै, उच्च अदालत जनकपुरधामले रत्नसागर मठका महन्थ वैकुण्ठ दास वैष्णवलाई केही दिनअघि १२ वर्षको कारावास सुनाएको छ ।

जिल्ला शिक्षा कार्यालय महोत्तरीका शाखा अधिकृत लालकिशोर झाको हत्यामा संलग्न रहेको ठहर गर्दै वैकुण्ठलाई सो कारावास सुनाइएको छ ।

जिल्ला अदालत धनुषाले वैकुण्ठलाई सो काण्डमा साधारण तारिखमा रिहा गरेको थियो । तर, जिल्ला अदालतको निर्णयलाई पल्टाएर उच्च अदालत जनकपुरधामले वैकुण्ठविरुद्ध फैसला सुनाएको हो ।

वैकुण्ठ हाल फरार छन् । जनक हजारी विद्यापीठको जग्गा किर्ते गरी बेचबिखन गरिरहेको आरोपमा जिल्ला अदालत धनुषाले पक्राउ गर्न आदेश दिए लगत्तै वैकुण्ठ फरार भएका हुन् ।

त्यस्तै, रत्नसागर मन्दिरका महन्थ वैकुण्ठदास वैकुण्ठले पनि जनकपुरमा राज गरेका थिए । उनी साधु समाजमा दादा बनेका थिए । वैकुण्ठको मन्दिरमा ठूलो भीड नै लाग्थ्यो ।

कुनै समस्या हुँदा प्रहरी प्रशासनमा जानुको साटो मानिसहरू वैकुण्ठकहाँ जान्थे । वैकुण्ठ मन्दिरको जग्गा बिक्री गरेर आर्थिक रुपमा सम्पन्न भएका थिए । उनी आफ्नो मन्दिरका अतिरिक्त अरु मन्दिरका जग्गा पनि बिक्री गराइदिन्थे ।

वैकुण्ठका कारण केही मन्दिरका महन्थ जनकपुरधामबाट पलायन भएका थिए । प्रहरीहरू दिनभर जग्गाको लोभमा वैष्णसँग बसिरहन्थे । उनले प्रहरी उपरीक्षकसम्मलाई जग्गा बाँडेका थिए ।

जिल्ला प्रहरी कार्यालय धनुषाका घुमुवादेखि मुद्दा फाँटका सई तथा असईलाई निःशुल्क जग्गा दिएर घर निर्माण गर्न सहयोग गरेका छन् । नेता तथा सरकारी अधिकारी जग्गा पाउने लोभमा वैकुण्ठकै अगि–पछि हुन्थे ।

वैकुण्ठले साधु समाजको दशरथ मन्दिरमा बैठक चलिरहेको बेला साधुहरूमाथि आक्रमण नै गरेका थिए । साधुहरू भागाभाग गरे ।

वैकुण्ठले किर्ते गरेर नेपालको नागरिकता बनाएका थिए ।

प्रकाशित मिति: बुधबार, असार २५, २०७६ ०५:०७