गठबन्धनकाे निर्णय गाउँमा नचल्ने, '११ गतेसम्म पर्खेकै हाे, भइसकेकाे तालमेल अब ताेड्दैनाैँ'

गठबन्धनकाे निर्णय गाउँमा नचल्ने, '११ गतेसम्म पर्खेकै हाे, भइसकेकाे तालमेल अब ताेड्दैनाैँ'

A+ A A-

एमालेलगायतका पार्टीसित चुनावी तालमेल गरेको भए तत्कालै खारेज गर्ने पाँच दलीय गठबन्धनको निर्णय स्थानीय कमिटीले मान्ने सम्भावना देखिँदैन । 'गठबन्धनभन्दा बाहिर अन्य दलहरूसँग भएको तालमेल खारेज गर्ने', पाँच दलले आज सहमति गरेका छन्, 'गठबन्धनबाहिरको तालमेल खारेज नगरे सम्बन्धित दलले तत्काल कारबाही गर्ने ।'

यसबाहेक बागी उम्मेदवारी फिर्ता गराउन पहल गर्ने निर्णय पनि गठबन्धनले गरेकाे छ । तर, सम्बन्धित दलका कतिपय स्थानीय कमिटीले निकै ढिला निर्देशन आएकाे भन्दै गठबन्धनकाे निर्णय अवज्ञा गर्ने बताएका छन् ।

रोल्पाको माडी गाउँपालिकामा एमालेसँग गठबन्धन गरी चुनावमा होमिएको कांग्रेसले ढिला गरी आएको निर्देशन पालना गर्न असम्भव हुने बताएको छ । कांग्रेसका क्षेत्रीय सभापति गोपाल घर्तीले एमालेसँगको गठबन्धन भत्काउन नसकिने बताए ।

‘वैशाख १० गते राति अबेरसम्म हामीले केन्द्रको निर्देशन कुरेकै हौँ’, घर्तीले शिलापत्रसँग भने, ‘तर कुनै निर्देशन आएन अनि हामीले रातको साढे २ बजे एमालेसँग सहमति गरेका हौँ ।’

मनोनय दर्ता गरी दुवै पार्टी मिलेर भोट माग्न थालिसकेको स्थितिमा निर्देशन आएकाले त्यसको अवज्ञा गर्न आफूहरू बाध्य हुने उनले बताए । अघिल्लो चुनावमा पनि यहाँ कांग्रेस र एमालेका साझा उम्मेदवार माओवादी केन्द्रका उम्मेदवारसँग हारेका थिए । एक्लै भिडेको माओवादीले एकलौटी जित हात पारेको थियो ।

यसपालि माओवादीले एकीकृत समाजवादीसँग तालमेल गरेको छ । ‘हामी केन्द्रको गठबन्धन निर्णय मान्न तयार छौँ तर यहाँका कांग्रेसीले मानेनन्’, गाउँपालिका उपाध्यक्षसमेत रहेकी माओवादी नेतृ धनिकला घर्तीले भनिन् ।

रोल्पाकै त्रिवेणी गाउँपालिकामा कांग्रेस र एमाले तालमेलका लागि प्रयासरत छन् । कांग्रेसका स्थानीय नेता एवं गाउँपालिका उपाध्यक्ष उम्मेदवार लेखमणि डाँगीले एमालेसँग छलफल भइरहेको बताए । तर कुनै निर्णय भइनसकेकाले केन्द्रले एमालेसित गठबन्धन नगर्न पत्राचार गरे माओवादीसँग मिल्न सकिने उनले बताए ।

झापाको कचनकवल गाउँपालिकामा कांग्रेसले एमालेसित तालमेल गरेको छ । झापा कांग्रेसका सभापति देउमान थेबेले तालमेलबाट पछि हट्ने सम्भावना नरहेको बताए । ‘हामी गठबन्धनको निर्णयविरुद्ध गएका होइनौँ, गठबन्धनअन्तर्गत पनि गठबन्धन गरेका हौँ । यो कसरी खारेज हुन सक्छ र ?’, उनले शिलापत्रसित भने ।

झापाकै दमक नगरपालिकामा कांग्रेसले राप्रपालाई मेयर दिएरै गठबन्धनमा समेत भित्र्याएको छ । यसैगरी झापा गाउँपालिका र गौरीगञ्ज गाउँपालिकामा कांग्रेस र माओवादीले छुट्टाछुट्टै उम्मेदवार अघि बढाएका छन् । ‘केन्द्रमा भएको निर्णय नमान्ने भन्ने कुरा होइन । तर, स्थानीय तहको परिस्थिति बेग्लै छ । यहाँ गरिएका तलमेलबाट पछि हट्न सकिँदैन’, थेबेले भने ।

प्युठानको झिमरुक गाउँपालिकामा माओवादी केन्द्रले गठबन्धनमा रहेका राष्ट्रिय जनमोर्चा र कांग्रेसको साथ छोडेको छ । अध्यक्ष, उपाध्यक्ष पदमा आफ्नै उम्मेदवार अघि सारे पनि माओवादी केन्द्रले अघोषित रूपमा एमालेसित गठबन्धन गरेको गाउँपालिका अध्यक्षसमेत रहेका जनमोर्चा नेता तिलकबहादुर जिसीले बताए । ‘कांग्रेस र जनमोर्चा एकातिर अनि माओवादी र एमाले अर्कातिर भइएलाजस्तो छ’, उनले भने ।

सल्यानको वनगाड कुभिण्डे नगरपालिकामा गठबन्धनमा रहेकै माओवादी केन्द्र र एकीकृत समाजवादीले कांग्रेसलाई एक्ल्याएका छन् । माओवादी र एसले छुट्टै गठबन्धन गर्दा कांग्रेस मैदानमा एक्लै परेकाे हाे ।

पाँच दलीय गठबन्धनले ६ महानगरपालिका र ११ उपमहानगरपालिकाका प्रमुख र उपप्रमुख पदमा भएको सहमतिविपरीत गठबन्धन दलबाट दर्ता भएका उम्मेदवारीहरू तत्काल फिर्ता लिन पनि भनेकाे छ । तर कतिपय पालिकामा गठबन्धनमा रहेका दलहरूले प्रमुख र उपप्रमुखमा छुट्टाछुट्टै दिएकाे उम्मेदवारी फिर्ता हुने सम्भावना देखिँदैन ।

चितवनकाे भरतपुर महानगरपालिकामा कांग्रेसले माओवादीकी रेणु दाहाललाई मेयरमा सघाउने सहमति गटबन्धनमा भए पनि भिन्दै उम्मेदवारी दिएका कांग्रेसका जगन्नाथ पाैडेलले पछि नहट्ने बताइसकेका छन् । उदयपुरकाे त्रियुगा नगरपालिका र चाैदण्डगढी नगरपालिकामा कांग्रेस, एमाले र गठबन्धनमा रहेका दलहरू भिन्दाभित्रै उम्मेदवार लिएर चुनावी मैदानमा उत्रेका छन् । बेलका नगरपालिकामा उपमेयरमा माओवादी केन्द्रबाट परेको बागी उम्मेदवारी फिर्ता भएको छैन । यस्ता थुप्रै पालिका छन्, जहाँ गठबन्धनकाे निर्णय मान्न स्थानीय कमिटी तयार छैनन् ।

पाँच दलीय गठबन्धनमा कांग्रेस, माओवादी केन्द्र, एकीकृत समाजवादी, जनता समाजवादी र राष्ट्रिय जनमोर्चा आबद्ध छन् ।

प्रकाशित मिति: शुक्रबार, वैशाख १६, २०७९ १४:४९