जाल्पा लघुवित्तका लगानीकर्ता मालामाल, १० कित्ताबाटै महिनामा यसरी कमाए ११ हजार रुपैयाँ

जाल्पा लघुवित्तका लगानीकर्ता मालामाल, १० कित्ताबाटै महिनामा यसरी कमाए ११ हजार रुपैयाँ

A+ A A-

छ महिनायता शेयरबजार परिसूचक नेप्सेमा भारी गिरावट आइरहेको छ । झण्डै ३२ अंकबाट ओर्लिएको नेप्सेले त्यसपछि सो रेकर्ड तोड्न नसकी २३ सय अंकको पेरिफेरीमै रहन पुग्दा लगानीकर्ताले छोटो समयमा अर्बौं घाटा बेहोर्नुपर्‍यो ।

पछिल्लो तीन महिनामा मात्रै लगानीकर्ताको ४ खर्ब रुपैयाँले सम्पत्ति गुमिसकेको छ । गत फागुन मसान्तमा ३७ खर्ब रहेको बजार पुँजीकरण अहिले ३३ खर्बमा झरेको छ । यसले पनि करिब डेढ महिनामा लगानीकर्ताले कुल ४ खर्ब रुपैयाँबराबरको सम्पत्ति गुमाउनुपरेको हो ।

सम्पत्ति दिनप्रतिदिन गुमिरहँदा आत्तिएका लगानीकर्ताहरूमा यस्ता केही कम्पनीका लगानीकर्ता पनि छन् जो नेप्सेमा नकारात्मक सर्किट लाग्दा पनि खुसी हुन्छन् । कारण नेप्सेमा नेगेटिभ सर्किट लाग्दा पनि कम्पनीको शेयरमूल्यमा भने पोजिटिभ सर्किट नै लागिरहेको हुन्छ ।

यस्तै, कम्पनीहरूमा पर्छ जाल्पा लघुवित्त वित्तीय संस्था, जसका लगानीकर्ताले अन्य कम्पनीका लगानीकर्ता शेयरमूल्य घटेर चिन्तित भइरहँदा पनि नाफा आर्जन राम्ररी गर्न सकिरहेका छन् ।

लघुवित्तको पछिल्लो एक महिनामा नै एक कित्तामा झण्डै ७ सय ९३ रुपैयाँले शेयरमूल्य बढिसकेको छ ।

गत १५ चैतमा प्रतिकित्ता ३ सय ३९ रुपैयाँ रहेको सो लघुवित्तको शेयर १५ वैशाखमा बढेर ११ सय ४२ रुपैयाँमा आइसकेको छ । यसर्थ पनि यो एक महिना जाल्पा लघुवित्तका लगानीकर्ताका लागि उत्साहित नै रहन पुग्यो । नेप्से घटे पनि यो समयमा लगानीकर्ताले मनग्य कमाउन सफल भएको देखिन्छ ।

जस्तो लगानीकर्ताहरूले आजभन्दा १ महिनाअघि १ हजार रुपैयाँ लगानी गरेर १० कित्ता शेयर किनेकोमा उनीहरूले एक महिनामै ११ हजार ४ सय २० रुपैयाँ नाफा कमाइसकेका छन् । बिहीबारको शेयरमूल्य ११४२ रुपैयाँ कायम भएअनुसार पनि लगानीकर्ताले यो समयमा ११ हजार रुपैयाँ कमाइसकेका हुन् । बजार निरन्तर घटिरहँदा यो कम्पनीको भने शेयरमूल्य निरन्तर १० प्रतिशतले मूल्यवृद्धि हुँदै शेयरमूल्यमा सकारात्मक सर्किट लागिरहेको छ ।

यस्तो छ कम्पनीको वित्तीय अवस्था

जाल्पा लघुवित्तलाई रेटिङ एजेन्सी इक्रा नेपालले मध्यम जोखिमयुक्त कम्पनीको समूहमा राखेको छ । इक्रा नेपालबाट डबल बी रेटिङ पाएको यो लघुवित्तको अधिकृत पुँजी २५ करोड रुपैयाँ छ । यस्तै, जारी पुँजी १६ करोड रुपैयाँ छ । यसमध्ये संस्थापक शेयरधनीबाट १० करोड ७८ रुपैयाँ चुक्ता भइसकेको छ । सर्वसाधारण तथा कर्मचारीलाई साधारण शेयर जारी गरेपछि लघुवित्तको चुक्ता पुँजी पनि १६ करोड रुपैयाँ पुगेको छ ।

चालु आर्थिक वर्षको अन्त्यसम्म जाल्पा लघुवित्तले ११ करोड ८९ लाख १३ हजार रुपैयाँ खुद नाफा कमाउने प्रक्षेपण गरेको छ । यस्तै, आव २०७९–८० मा १३ करोड ९७ लाख ३१ हजार रुपैयाँ र आव २०८०–८१ मा १८ करोड ५ लाख ८५ हजार रुपैयाँ नाफा कमाउने अनुमान छ । कम्पनीले तत्काल पुँजी वृद्धि गर्ने कुनै पनि योजना बनाएको छैन ।

यता, चालु आर्थिक वर्षमा प्रतिशेयर आम्दानी ८७ रुपैयाँ ३३ पैसा र आव २०८०–८१ मा १ सय १२ रुपैयाँ ८७ पैसा पुग्ने प्रक्षेपण लघुवित्तको छ । प्रतिशेयर नेटवर्थ यो वर्ष ३ सय ८३ रुपैयाँ ०१ पैसा पुग्ने अनुमान छ ।

जाल्पा सामुदायिक लघुवित्त वित्तीय संस्था लिमिटेड कम्पनी ऐन, २०६३ तथा बैंक तथा वित्तीय संस्थासम्बन्धी ऐन, २०७३ अन्तर्गत स्थापना भएको कम्पनी हो । यस कम्पनीका २४ जिल्लामा ८७ शाखा कार्यालयहरू सञ्चालमा छन ।

प्रकाशित मिति: शुक्रबार, वैशाख १६, २०७९ १४:०७