वीरगञ्जका मेयर उम्मेदवार सिंह भन्छन्- मसँग समय छैन, वीरगञ्जको पहिचान फर्काएरै छाड्छु

वीरगञ्जका मेयर उम्मेदवार सिंह भन्छन्- मसँग समय छैन, वीरगञ्जको पहिचान फर्काएरै छाड्छु

A+ A A-

नेपालको मुख्य आर्थिक नाकासँग जोडिएको महानगर हो वीरगञ्ज । त्यसैले पनि वीरगञ्जमा चुनावी चहलपहल निकै बढेको छ । नयाँ नेतृत्वका लागि विभिन्न राजनीतिक दलका उम्मेदवारहरू चुनावी प्रचार अभियान जोडिन थालेका छन् । यही क्रममा जनता समाजवादी पार्टी (जसपा) बाट उम्मेदवार बनेका राजेशमान सिंहसँग शिलापत्रले कुराकानी गरेको छ । अघिल्लो चुनावमा राजपाबाट उम्मेदवार भएका सिंह विजय सरावगीसँग पराजित भएका थिए । सिंह त्यतिबेला तेस्रो भएका थिए । अहिले सिंह गठबन्धनका साझा उम्मेदवार पनि हुन् । सिंहसँग वीरगञ्ज बनाउने सोच के-के छन् ? भन्ने विषयमा गरिएको कुराकानीको सम्पादित अंश ।

वीरगञ्ज महानगरका लागि दोस्रो पटक प्रतिस्पर्धी बन्नु भएको छ । तपाईंको एजेण्डालाई गत निर्वाचनमा नागरिकले विश्वास गरेनन् । यसपटक चाहिँ के एजेण्डा बोकेर आउनुभएको छ ?

वीरगञ्ज महानगरपालिका सम्भावना भएको शहर हो । यहाँ नेतृत्व सही नुहँदा त्यो सम्भावनाले अवसर पैदा गर्न सकेन । त्यही सम्भावनालाई अवसरमा बदलेर भौतिक पूर्वाधार र सामाजिक पूर्वाधारको क्षेत्रमा विकास गर्ने योजनासहित मेयरमा दाबी गरेको हो । मसँग ठूलो योजना छैनन् तर नागरिकका दैन्दिन प्रभाव पार्ने र आधारभूत कुरामै जोड दिनुपर्छ भन्ने लाग्छ ।

०७४ मा पहिलोपटक स्थानीय तहको निर्वाचन भयो । त्यसयताका ५ वर्षमा नागरिकले स्थानीय सरकारको महसुस गर्न पाएका छैनन् । त्यो अभावलाई मैले पूर्ति गर्न सक्छु भन्ने विश्वास रहेको छ । आधारभूत शिक्षा स्थानीय सरकारको मातहतमा रहेको छ । तर, वीरगञ्जका विद्यालयमा सुधार हुन सकेको छैन ।

शिक्षामा गम्भीरखाले विचलन आएको छ । शिक्षा सुधार नगरी वीरगञ्जको विकास र सुधार नै हुँदैन । त्यसैगरी स्वास्थ्यको क्षेत्रमा पनि धेरै काम गर्नुपर्नेछ । केही निजी स्वास्थ्य संस्थाहरू छन् तर जनताको पहुँच र आर्थिक हैसियत नै पुग्दैन उपचारका लागि । आर्थिक रूपमा विपन्न परिवारलाई सर्वसुलभ शिक्षा र स्वास्थ्यको पहुँच पुर्‍याउनु पनि मेरो कर्तव्य हुन्छ ।

त्यसबाहेक वीरगञ्जको फोहोर व्यवस्थापन निकै ठूलो समस्या छ । प्रत्येक घरधुरीबाट मासिक १२० रुपैयाँ रकम लिने गरेको छ । तर, फोहोरको व्यवस्थापन हुन सकेको छैन, जसले गर्दा सरसफाइ नहुँदा वीरगञ्ज दुर्गन्धित शहर भएको छ । यसमा पनि मैले काम गर्छु । त्यसैगरी वीरगञ्ज औद्योगिक शहर भनिएको छ तर उद्योगधन्दा सहज रूपमा सञ्चालनमा समस्या छ र विस्तार पनि भएको छैन । त्यसैले युवाहरूले रोजगार पाएका छैनन् । वीरगञ्जका युवाहरूलाई रोगजार दिलाउन पनि काम गर्नुपर्नेछ । महिलाहरूको सशक्तिकरणको क्षेत्रमा पनि काम गर्नुपर्नेछ । उनीहरूको सशक्तिकरणमा काम गर्ने त भनिन्छ तर साक्षर छैनन् ।

महिला साक्षरताका लागि काम गरिनेछ । महिलाको क्षमता विकास, सीप विकास र उन्नतिका लागि मेरो अलग्गै सोच छ । भारतमा सहकारीमार्फत चलेको अमूल दूध सफल र प्रसिद्ध छ, त्यही मोडेलमा काम गर्ने इच्छा छ मलाई पनि । अनि ढलको व्यवस्थित निकास नहुँदा वर्षामा शहर जलमग्न हुने गरेको छ । कृषिका लागि मलखादको व्यवस्था छैन । यी साना तर नागरिकका आधारभूत जीवनसँग जोडिएका एजेण्डा हुन् । यस्तै काम गर्न मेरो उम्मेदवारी हो । खासमा वीरगञ्जको पहिचान नै गुमेको छ । त्यो पहिचान फिर्ता गर्न पनि प्रयास गर्नुपर्नेछ । सीमा सुरक्षामा पनि ध्यान दिनुपर्नेछ ।

तपाईंका कुरा सुन्दा साना लाग्ने तर महत्त्वपूर्ण नै हुन् । तर, यी काम हिजो पनि भएनन् । अझ गठबन्धनको मेयर भएपछि झन् गाह्रो होला नि काम गर्न ?

हामी हावादारी कुरा गर्दैनौँ । वीरगञ्ज महानगरपालिकामा भएको साधनस्रोत परिचालन गर्ने हो भने पनि यति काम गर्न सकिन्छ । यी काम भइहाल्छन् । यसका लागि ठूलो बजेट चाहिनेभन्दा पनि इच्छाशक्ति चाहिन्छ । त्यो इच्छाशक्ति र आत्मविश्वास मसँग छ । पहिलाको मेयरजस्तो मलाई ४ वर्ष सिक्नु छैन । किनभने म पहिला नै काम गरेर आइसकेको मान्छे हो । राजनीतिमा लागेर वीरगञ्ज नगरमा ०५६ सालदेखि नै स्थानीय तहसँग जोडिएर आएको छु । पहिलादेखि नै ग्रासरुटबाट काम गरेर आएकाले मलाई पुरानै अनुभवले काम गर्न सक्छु ।

म अरुले जस्तो कर्मचारीले काम गर्न दिएन भन्दिनँ । मलाई काम गर्न दिएन भनेर गुनासो गर्ने होइन, काम लिने गुण पनि हुनुपर्‍यो नि । वीरगञ्जको विकासका लागि जोडिन चाहने विभिन्न सामाजिक संस्था छन्, दातृ संस्थाहरू छन् । उनीहरूसँग मिलेर काम गर्न सकिन्छ । उनीहरूबाट काम लिन सकियो भने वीरगञ्जलाई झन् गुल्जार शहर बनाउन सकिन्छ ।

गठबन्धनभित्रै असन्तुष्टि छ । तपाईंको पार्टीभित्र पनि असन्तुष्टि छ । कसरी चुनाव जित्नु होला र ?

गठबन्धनभित्र असन्तुष्टि छन् । कांग्रेसभित्र पनि छ । हाम्रो पार्टीभित्र पनि असन्तुष्टि र गुनासाहरू छन् । तर, पार्टीबीच केन्द्रीय तहमा मिलाप भइसकेपछि अब गठबन्धन मिलेर जानुको विकल्प छैन । हामीले वीरगञ्जको विकासका लागि साझा मुद्दा बोकेर नै जानुपर्नेछ । हामीसँग भएका एजेण्डाहरू साझा नै हुन् । त्यसैले असन्तुष्टि अब विस्तारै कम हुन थालेको छ । गठबन्धनका नेताहरूकै साथमा घरदैलो सुरु भएको छ । अब विस्तारै असन्तुष्टि मेटिन्छ ।

हिजो जसले तपाईंलाई मेयरमा पराजित गर्‍यो, त्यही व्यक्तिसँग तर फरक दलबाट प्रतिस्पर्धा गर्दै हुनुहुन्छ । कस्तो लागिरहेछ ?

हामी हिजो परिस्थितिले फरक-फरक दलमा पुगेर फेरि प्रतिस्पर्धा गर्न आइपुगेका छौँ । अहिलेको मेयर त धेरै पर पुग्नुभयो । म त हिजो पनि र आज पनि एउटै एजेण्डामा छु । हिजो पार्टीको नाममात्रै फरक थियो । उस्तै एजेण्डा भएको पार्टीमा आएको छु अहिले पनि । हिजो जो नेताहरूले मलाई साथ दिनुभएको थियो, अहिले पनि उहाँहरू मेरै साथमा हुनुहुन्छ । त्यसैले त्यसमा खास केही लागेको छैन ।

तर, मेयर पदकै लागि दल अदलबदल गर्नुपर्ने कारण चाहिँ के हो ? जसरी पनि मेयर हुनुपर्छ भन्ने मान्यता जस्तो देखियो नि तपाईंमा ।

मेयरका लागि दल बदल गरेको होइन । हिजोको एजेण्डा र आजको एजेण्डामा म कहीँ पनि बदलिएको छैन । सुरुदेखि नै भन्दै आएको थिएँ, पार्टीले जसको योग्यता छ उसैलाई टिकट दिनुपर्छ भनेर । पार्टीले मलाई योग्य देख्यो र टिकट दियो । मेरो भाग्य पनि बलियो भइदियो, पार्टीले टिकट दिनु र गठबन्धनले वीरगञ्ज जसपालाई दिनु । त्यसैले ममाथि दल बदलको आरोप चाहिँ विपक्षीले लगाएको बेकारको आरोपमात्रै हो ।

खासमा त तपाईंलाई बाहुबली नेता भनेर चिनिन्छ नि ?

विकासभन्दा बाहुबलीवाला भनेर टिप्पणी हुनु नै गलत हो । बाहुबली भनेर के लाई भन्न खोजेको हो ? त्यो चाहिँ थाहा भएन । हामीसँग शिक्षा र स्वास्थ्य क्षेत्रमा प्रस्ट भिजन छ । शिक्षालाई हामीले दिल्लीको मोडलमा लैजाने सोचमा छौँ । भ्रष्टाचारीलाई पेलेर जानुपर्छ भन्नेमा पनि प्रस्ट छु । भ्रष्टाचारीहरूले नगरपालिकामा जे गरिरहेका छन्, उनीहरू म मेयर हुँला भन्ने डरले गुण्डागर्दी गरेको आरोप लगाउँछन् । मैले कहाँ गुण्डागर्दी गरेको छु ? पुष्टि गरुन् । भ्रष्टाचारीलाई कारबाही गर्नुपर्छ भन्नु गुण्डागर्दी, बाहुबली हुन्छ? म अख्तियारलाई बोलाएर फाइल अध्ययन गर्न लगाउँछु । अख्तियारले दोषीलाई हत्कडी लगाउँछ । त्यही डरले मलाई आरोप लगाएका हुन सक्छन् ।

तपाईंको जित्ने आधार के हो त ?

म गठबन्धनको साझा उम्मेदवार हो । त्यसै पनि वीरगञ्ज कांग्रेस र जसपाको बलियो क्षेत्रमा हो । त्यसमा माओवादी केन्द्र र एकीकृत समाजवादी पनि थपिँदा झनै बलियो भएको छु । युवाहरू माझ परिचित नै छु । वीरगञ्ज महानगरवासीले राजेशमान वीरगञ्जको मेयर भयो भने विकास गर्छ भन्ने विश्वास गर्नुभएको छ । त्यही विश्वास नै मेरो जित्ने आधार हो ।

प्रकाशित मिति: शुक्रबार, वैशाख १६, २०७९ १३:५४