'पहिला खानेपानी देऊ अनि हामी भोट दिऊँला' (भिडियाेसहित)

७४ वर्षीया पंगुमाया तामाङ ।

A+ A A-

२०७४ सालको चुनावमा ७४ वर्षीया पंगुमाया तामाङले घरैमा धारा ल्याइदिन्छौँ भन्ने उम्मेदवारलाई भोट दिएकी थिइन् । हुन पनि, सिन्धुपाल्चोकको बलेफी गाउँपालिका-४, फुल्पिङकी उनी एक घैला पानी लिन एक घण्टा ओरालो झर्नुपर्थ्यो ।

पाँच वर्ष बितेर गयो । फेरि चुनाव आयो । पानीको उही एजेण्डा लिएर उम्मेदवार आए । तर पंगुमायाको घरमा धारा आएन । त्यसैले यसपालि चुनावमा भोट नखसाल्ने सोचमा छिन् उनी । भन्छिन्, ‘परार साल पानी ल्याइदिन्छु भनेर ढाँटे । यसपालि ढाँट्दैनन् भन्ने के भरोसा ? पानी लिन कुवा नै धाउनुपर्ने हाे भने भाेट हालेर के काम ? ’

३० वर्षकै उमेरमा श्रीमान् गुमाएकी उनी घरमा एक्लै छिन् । बिमार परेका बेला पानी अभावले आफूलाई निकै आपत पर्ने गरेको उनी बताउँछिन् । ‘पानीका लागि घण्टौँ हिँड्नु नपरोस् भनेर आधा घण्टा हिँडेर भोट हालेकी थिएँ । तर म बुढीले बिरामी हुँदा पनि धर पाएकी छैन । यो उमेरमा मलाई घैला लिएर कुवातिर दौडाउनेहरूलाई भोट किन हाल्नु ?’, चुनावलाई लिएर उनी निराश छिन् ।

८४ वर्षे भवनाथ नेपालचाहिँ पानीसहितका आधारभूत सुविधामा ढिलाइ नगर्ने प्रतिबद्धता मागेर भोट हाल्ने बताउँछन् । ‘हामीले केही नसोधी भोट हालिराख्यौँ भने नेताले ढाँटिरहन्छन् । त्यसैले बाचा गराएर मात्र भोट हाल्ने हो’, उनले भने ।

बायाँ जलवीरे अनि दायाँतिर भोटेकोसी कलकल बगिरहेको छ । छेउकै बलेफी ४ का वडावासी काकाकुल छन् । गाउँपालिकाकी उपाध्यक्ष कमला श्रेष्ठ (कायस्थ) ले केही वडामा पानीको समस्या रहेको बताइन् । पानी अभावले सबैभन्दा बढी संकटमा वडा नम्बर ४ का बासिन्दा नै परेको उनको भनाइ छ । ‘डाँडागाउँ, फुल्पिङतिर पानी चढाउन हामीले पहल नै नगरेकोचाहिँ होइन । जापानी कम्पनीले खानेपानीको परियोजनामा काम गरिरहेको छ’ उनले भनिन् ।

उनका अनुसार वडा नम्बर ६ हुँदै बग्ने बल्दुङ खोलाको पानी ४ नम्बरमा पुर्‍याउनेगरी भइरहेको काम केही महिनामै पूरा हुनेछ । ‘पहिला ६ नम्बरका बासिन्दाले आफूहरूलाई नै नपुग्ने भन्दै ४ नम्बरमा पानी लग्न दिएनन् । अहिले उनीहरूलाई राजी गराइसकेका छौँ’, उनले भनिन् । खानेपानी परियाेजनाका लागि जापानी कम्पनीले डेढ कराेड अनुदान सहयाेग गरेकाे छ ।

यसपालि पनि घरघरै धारा लगिदिने बाचासहित दलहरूले आफ्ना उम्मेदवारहरूलाई मैदानमा उतारिसकेका छन् । २०७४ सालमा गाउँपालिका अध्यक्ष जितेका केदार क्षेत्री कांग्रेसमा पसेर प्रदेशसभाकाे टिकट पर्खिरहेका छन् । गाउँपालिका अहिले कमला श्रेष्ठ (कायस्थ) ले चलाइरहेकी छिन् । अघिल्लाेपल्ट एमालेबाटै चुनाव जितेकी कमलाले यसपालि अध्यक्षमा दाबी गरेकी थिइन् । तर, पाइनन् । एमालेबाट घरघरै धारा लगिदिने बाचा यसपालि अध्यक्षका उम्मेदवार नारायणकाजी श्रेष्ठले गरेका छन् । प्रतिबद्धताका धेरै सूचीमा खानेपानीलाई मुख्य बनाएर नेकपा माओवादी केन्द्र र नेकपा (एकीकृत समाजवादी) ले प्रवेश तामाङलाई मैदानमा उतारेका छन् । कांग्रेसका सुवास तिमल्सिनाले खानेपानीको समस्या सुल्झाइदिने भन्दै अध्यक्ष पदका लागि भोट मागिरहेका छन् ।

प्रकाशित मिति: बिहीबार, वैशाख १५, २०७९ १५:४०