क्यान इन्फोटेक २०२२ को उत्कृष्ट पुरस्कार वर्ल्डलिङ्क कम्युनिकेसन र बीआईसी टेक्नोलोजीलाई

क्यान इन्फोटेक २०२२ को उत्कृष्ट पुरस्कार वर्ल्डलिङ्क कम्युनिकेसन र बीआईसी टेक्नोलोजीलाई

A+ A A-

आईएमई पे क्यान इन्फोटेक २०२२ इन एसोसिएसन विथ एससीटी स्मार्ट क्यूआर सफलतापूर्वक सम्पन्न भएको छ ।

काठमाडौंको भृकुटीमण्डपमा आयोजित आईएमई पे क्यान इन्फोटेक २०२२ को उत्कृष्ट स्टलको पुरस्कार वर्ल्डलिङ्क कम्युनिकेसन तथा उत्कृष्ट स्टार्टअपको पुरस्कार बीआईसी टेक्नोलोजीले पाएका छन् ।

उत्कृष्ट स्टलको पुरस्कार मूल्य ५० हजार रुपैयाँ छ भने उत्कृष्ट स्टार्टअपलाई राष्ट्रिय सूचना प्रविधि दिवसको अवसरमा पुरस्कृत गर्ने क्यान महासंघको योजना छ ।

इन्फोटेकमा आईसीटी एक्सेसेरिज र अन्य विभिन्न स्टलहरूमा विशेष छुट तथा अफरहरूको व्यवस्था गरिएको र प्राय:जसो स्टलहरूमा आगामी १–२ महिनासम्म छुट तथा अफरहरू कायम राख्ने क्यान महासंघलाई जानकारी गराएका छन् ।

सूचना तथा सञ्चार प्रविधि र मनोरञ्जनसम्बन्धी देशको एक मात्र प्रदर्शनीको यो २७औँ संस्करण हो । क्यान इन्फोटेकको यो संस्करणमा करिब सवा २ लाख अवलोकनकर्ताले प्रदर्शनीको अवलोकन गरेका छन् ।

एसईईको परीक्षा, त्रिभुवन विश्वविद्यालयअन्तर्गत विभिन्न संकायमा भइरहेको परीक्षा, कजेलहरूको पूर्वबोर्ड परीक्षा, स्थानीय चुनाव तथा यससम्बन्धी निर्वाचन आयोगको आचारसंहिता, पछिल्लो दुई दिन स्थानीय तह निर्वाचनका लागि राष्ट्रिय सभागृहमा मनोनयन दर्ता गर्ने कार्यक्रम, अघिल्लो दुई दिन वर्षाको अवरोधका कारण अवलोकनकर्ताको संख्यामा कमी देखिए पनि यसलाई स्वाभाविक लिनुपर्ने क्यान महासंघको धारणा छ ।

प्रदर्शनीको छ दिनको अवधिमा नेपालका लोकप्रिय कलाकार, गायक, र्‍यापगायक, पब्जी खेलाडीलगायत समाजमा चर्चित व्यक्तित्वहरूले प्रदर्शनीमा उपलब्ध सूचना तथा सञ्चार प्रविधिको अवलोकन गरेका छन् ।

यसैगरी, नेपाल सरकारका उच्चपदस्थ अधिकारीहरू, विभिन्न नियोगमा कार्यरत कर्मचारीहरूले पनि प्रदर्शनीको अवलोकन गरेका छन् । क्यान इन्फोटेकको स्टार्टअप र इनोभेसन खण्डमा रहेका २६ वटा स्टलहरूमा सबै दिन नै अवलोकनकर्ताको आकर्षण देखिएको थियो ।

इनोभेसनका निम्ति क्यान महासंघले नेपाल विज्ञान तथा प्रविधि प्रज्ञाप्रतिष्ठानसँग सहकार्य गरेको थियो भने स्टार्टअपका निम्ति सार्वजनिक सूचना निकालेरै सम्बन्धित व्यक्ति वा संस्थालाई सहभागी हुन आह्वान गरेर प्राप्त आवेदनहरूबाट छनोट गरिएको थियो ।

क्यान इन्फोटेक २०२२ मा १७० स्टलहरू विभिन्न खण्डमा रहेका थिए जसमा ब्रान्डिङ, फिन्टेक, स्टार्टअप र इनोभेसन, आईसीटी एक्सेसरिज तथा प्रोडक्ट लञ्चिङ मुख्य खण्ड थिए । २७औँ क्यान इन्फोटेकको शीर्ष प्रायोजन आईएमई पेले गरेको थियो भने सह–प्रायोजक एससीटी स्मार्ट क्यूआर युनियन पे रहेको थियो ।

प्रकाशित मिति: बुधबार, वैशाख १४, २०७९ १६:३८