कांग्रेसलाई बागीकै पिरलो, कार्यकर्ता भड्किँदा वर्चस्व गुमाउने खतरा

A+ A A-

नेपाली कांग्रेसले केन्द्रीय समितिको बैठकमा पार्टीभित्र अन्तरघात मौलाएकाले चुनावमा त्यसको व्यवस्थापन गर्नुपर्ने निष्कर्ष निकाले पनि कांग्रेसभित्रको यो विकृति अझै बढ्ने खतरा देखिएको छ । उम्मेदवारी मनोनयनको अन्तिम दिन त्यसका संकेतहरू देखिएका हुन् ।

नेताहरूले पनि यो संकेत सु:खद नभएको भन्दै १६ चैतसम्म सतहमा आएका असन्तुष्टिहरूको अधिकतम व्यवस्थापन गरिने दाबी गरेका छन् ।

१५ चैतको केन्द्रीय समितिको बैठकमा कांग्रेस सभापति शेरबहादुर देउवाले पार्टीभित्र अन्तरघातको रोग मौलाएको भन्दै नियन्त्रणका निम्ति उपसभापति र महामन्त्रीलाई निर्देशन दिएका थिए । अन्तरघातको विकृति अन्त्य नभए त्यसको असर चुनावमा पर्ने भन्दै देउवाले नेता कार्यकर्तालाई अनुशासनको कडा दायरामा ल्याउन निर्देशन दिएका थिए ।

'हाम्रो पार्टीमा एउटा रोग छ । अन्तरघात रोग । यो रोग निको भइसकेको छैन । यसको असरबाट पार्टीलाई बचाउन तपाईंहरूले कार्यकर्तालाई कडा अनुशासनमा राख्नुस्,' देउवाले भनेका थिए ।

कुटपिटदेखि बागी उम्मेदवारी दर्तासम्म

उम्मेदवारीको अन्तिम दिन १२ वैशाखमा कांग्रेसभित्र अन्तरघात हुने संकेतहरूको पटाक्षेप भएको छ । कतै आकांक्षीहरूबीच कुटपिट भएको छ भने कतै दुई जनाले नै टिकट लिएर उम्मेदवारी दर्ता गराएका छन् । कहीँ बागी उम्मेदवारहरू खडा भएका छन् ।

पोखरा महानगरपालिकामा कांग्रेसका तीन जना बागी उम्मेदवार खडा भएका छन् । पोखरामा नन्दुप्रसाद तिवारी, बिमलबहादुर कार्की र ऋषि सापकोटाले स्वतन्त्र उम्मेदवारी दर्ता गराएका छन् । यता भरतपुर महानगरपालिकामा जगन्नाथ पौडेलले बागी उम्मेदवारी दिएका छन् ।

खोटाङ र गोरखामा आकांक्षीबीच नै कुटपिट भएको छ । गोरखा नगरपालिकाको प्रमुखमा नेपाली कांग्रेसले राजनराज पन्तलाई अन्तिम समयमा उम्मेदवार बनाएको छ । नेपाली कांग्रेस गण्डकी प्रदेश समितिले विश्वदेव श्रेष्ठलाई उम्मेदवार बनाउने निर्णय गरे पनि अन्तिममा पन्‍तले बाजी मारेका हुन् । पन्त समर्थित कार्यकर्ताले श्रेष्ठमाथि हातपात गरेका थिए ।

यता, खोटाङको दिक्तेलमा हेलिकोप्टर लिएर उम्मेदवारी दर्ता गराउन पुगेका धर्मराज पोखरेल कार्यकर्ताबाटै कुटिएका छन् । उनले उम्मेदवारी दर्ता गराउन पाएनन् । सुर्खेतको विरेन्द्रनगरपालिकाको मेयरमा उपेन्द्र खड्का र नारायण सापकोटा दुवैले पार्टीको टिकट पेस गरी उम्मेदवारी दिएका छन् ।

यता महोत्तरीको बर्दिबास नगरपालिकामा पनि दुई जनाको उम्मेदवारी परेको छ । कांग्रेस नेता प्रह्लाद क्षेत्री र चिरञ्जिवी हमालले जिल्लास्थित निर्वाचन कार्यालय पुगेर मेयरमा उम्मेदवारी मनोनयन गराएका हुन् ।

झापाको मेचिनगर नगरपालिकामा अन्तिम समयमा नेता कृष्णप्रसाद सिटौला समर्थित केशवराज पाण्डेको टिकट खोसिएको छ । उनको स्थानमा महामन्त्री विश्वप्रकाश शर्मा समर्थित इन्द्र बुढाथोकीलाई मेयरमा उठाउने निर्णय कांग्रेसले गरेको हो ।

यस्ता घटनाले कांग्रेसभित्र अझै अन्तरघातको रोग झाँगिन सक्ने शंका पैदा भएको छ । तर त्यस शंकालाई सत्यमा परिणत हुन नदिने कांग्रेस महामन्त्री विश्वप्रकाश शर्मा बताउँछन् । 'असन्तुष्टिको व्यवस्थापन सन्दर्भमा कांग्रेसभित्र छलफल भइरहेको छ । मलाई विश्वास छ चुनावमा हामी एकढिक्का भएर जानेछौँ । अहिले देखिएका असन्तुष्टिहरूका असर चुनावमा पर्न दिनेछैनौँ,' शर्माले भने ।

कांग्रेस प्रवक्ता प्रकाशशरण महतले पनि पार्टी कार्यकर्तालाई अनुशानमा बाँधेर चुनावमा अधिकतम नतिजा निकाल्ने प्रयास कांग्रेसले गर्ने बताए । 'हाम्रो लक्ष्य पहिलो हुने हो । त्यसका निम्ति अनुशासित भएर पार्टीको हितमा सबै नेता कार्यकर्ता अघि बढ्नुपर्छ । अन्तरघातलाई निमिट्यान्न पार्न पार्टी कठोर हुनेछ,' उनले भने ।

५ सय मतले १ सय ४२ स्थानीय तहमा पराजित थियो कांग्रेस

२०७४ को स्थानीय चुनावमा कांग्रेसले १ सय ४२ स्थानीय तह गुमाउनुपरेको स्थिति थियो । पाँच सय मतान्तरले कांग्रेस पराजित हुनुको पछि अन्तरघात प्रमुख रहेको नेताहरू बताउँछन् । महामन्त्री गगन थापा त्यसबेला आन्तरिक असन्तुष्टिहरूलाई व्यवस्थापन गर्न सकेको भए ती स्थानीय तहमा कांग्रेसले जित्ने स्थिति रहेको बताउँछन् ।

'हामीभित्रैको असन्तुष्टिको असर चुनावमा देखापर्‍यो । पाँच सय मतको व्यवस्थापन हामीले गर्न सकिने स्थिति थियो । तर पार्टीको आन्तरिक असन्तुष्टिको असर चुनावी नतिजामा देखापर्‍यो । यसपटक हामी चनाखो हुनेछौँ,' थापाले भने ।

कांग्रेस १ सय ४२ स्थानीय तहमा पाँच सय मतको अन्तरले पराजित भएको थियो । २८ स्थानीय तहमा सय मतको अन्तरले पराजय बेहोर्नुपरेको थियो भने ५० मतको अन्तरले कांग्रेस १४ स्थानीय तहमा पराजित भएको थियो ।

अघिल्लो स्थानीय चुनावमा ५ सयभन्दा कम मतान्तरले कांग्रेसले हारेका स्थानीय तहः

प्रकाशित मिति: सोमबार, वैशाख १२, २०७९ २१:२९