धनराजको वाचाः बोलेको पुरा गर्छौं, पोखरेलीले हाम्रो विकल्प खोज्नुपर्दैन

A+ A A-

सत्तारुढ गठबन्धनबाट पोखरा महानगरपालिकाको मेयरमा धनराज आचार्य र उपमेयरमा कोपिला रानाभाट चुनावी मैदानमा छन् ।

गठबन्धनबाट मेयरमा एकीकृत समाजवादीका नेता आचार्य र उपमेयरमा कांग्रेस नेतृ कोपिला रानाभाटले सोमबार दिउँसो मुख्य निर्वाचन अधिकृतको कार्यालय पोखरामा मनोनयन दर्ता गराएका छन् ।

धनराजले गठबन्धनका उम्मेदवारलाई नभइ एजेण्डा हेरेर भोट दिन आह्वान गरेका छन् । ‘गठबन्धनमा रहेका उम्मेदवारले जे एजेण्डा ल्याउँछन् त्यसको आधारमा भोट दिने हो । व्यक्ति धनराज आचार्य र कोपिला रानाभाटलाई दिने होइन,’ मनोनयन दर्तापछि उनले भने, ‘अबको पाँच वर्ष कस्तो बनाउँछौँ भनेर भोलिसम्म एजेण्डा प्रस्तुत गर्छौं । त्यो एजेण्डाका आधारमा भोट दिनुस् ।’

०७४ को स्थानीय चुनावमा पोखरा महानगरपालिकाका लागि एमालेको घोषणापत्र लेखनमा सक्रियमध्ये एक धनराज पनि हुन् । एमालेमा आएको फुटपछि उनी माधवकुमार नेपाललाई साथ दिएर एकीकृत समाजवादीमा लागे । यसपटक मेयरको उम्मेदवार रहेका आचार्यले ०७९ को चुनावी घोषणापत्र पनि आफैँले लेख्दैछन् ।

गठबन्धनको संयुक्त घोषणापत्र बनाउने र लेखिएका कुरा पूरा गर्ने धनराजको वाचा छ । गठबन्धनका दल एकजुट भएकाले आफूले चुनाव जित्ने उनले दाबी गरे ।

‘कति दिनमा के काम गर्ने भन्ने घोषणा गर्छौं । विश्वास दिलाउने गरी आउँछौँ । धोका दिँदैनौँ,’ धनराज भन्छन्, ‘मेयर र उपमेयरमा पाँच दलबाट मेयर–उपमेयरमा हामी दुईबाहेक अरु उम्मेदवार छैनन् । चुनाव जित्न यो नै सबैभन्दा ठूलो आधार हो । कार्यकर्ता, शुभेच्छुक, जनताले मतदान गर्ने पात्र हामी दुई जना छौँ । विकल्प खोज्नुपर्दैन ।’

घोषणापत्रमा लेखिएका कुरा कार्यान्वयन नभएको आचार्यको टिप्पणी छ । ‘अघिल्लो घोषणापत्रमा धेरै राम्रा कुरा थिए जुन कार्यान्वयनमा गएनन् । स्मार्ट सिटी नै भएन । त्यो घोषणापत्र लेख्ने मान्छेमध्येको एउटा म हो । त्यो राम्रो भएको भए मैले विद्रोह नै गर्नुपर्थेन । जे गर्छु भनियो त्यो गरिएन,’ उनले भने ।

एमालेको घोषणापत्रमा भएका राम्रा कुरा आफूहरूले समेट्ने आचार्यले बताए ।

प्रकाशित मिति: सोमबार, वैशाख १२, २०७९ १९:४५