क्यान इन्फोटेकको पाँचौँ दिन अवलोकनकर्ताको घुइँचो

A+ A A-

आईएमई पे क्यान इन्फोटेक २०२२ इन एसोसिएसन विथ एससीटी स्मार्ट क्यूआरको पाँचौँ दिन अवलोकनकर्ताको आकर्षण बढ्दै गएको छ ।

काठमाडौंको भृकुटीमण्डपमा सुरु भएको इन्फोटेकको पाँचौँ दिन सूचना प्रविधिसम्बन्धी कलेज तथा स्टार्टअप एवं इनोभेसनमा अवलोकनकर्ताको आकर्षण देखियो ।

अन्य दिनको तुलनामा यस दिन विद्यार्थीहरूको अत्यधिक भिड रहेका कारण सन वे कलेज, सफ्टवारिका कलेज, कान्तिपुर सिटी कलेजलगायतका सूचना तथा सञ्चार प्रविधिसम्बन्धी अध्ययन हुने कलेजहरूमा विद्यार्थीहरूको भिड देखिन्थ्यो ।

इन्फोटेकको इनोभेसन पार्टनर सफ्टवेरिका कलेज र अकाडेमिक पार्टनर सनवे कलेजले आफ्नो स्टल रहेका स्थानहरूमा विद्यार्थीहरूद्वारा निर्मित सेन्सरमा आधारित उपकरणहरू, थ्रीडी प्रिन्टिङ, मान्छेको क्रियाकलापमा आधारित इलेक्ट्रोनिक्स चार्जिङ, तीनपाङ्ग्रे गाडी, ड्रोन, साइकल रहेका कारण सोही विधामा अध्ययनरत विद्यार्थीहरू तथा अवलोकनकर्ताहरूमा आकर्षण देखिन्थ्यो ।

इन्फोटेकको सिल्भर प्रायोजक टेक्मिन्ट इन्नोभेसन्सको एआईमा आधारित च्याटबोट, भिडियो केवाईसी, कन्ट्र्याक्ट म्यानेजमेन्टमा पनि अवलोकनकर्ताको आकर्षण देखिएको थियो ।

सूचना तथा सञ्चार प्रविधिसम्बन्धी चासो राख्ने सर्वसाधारणदेखि पूर्वराजदूत, पूर्वसचिव र राष्ट्रियस्तरका कलाकारहरूले इन्फोटेक भ्रमण गरिसकेको आयोजक संस्था कम्प्युटर एसोसिएसन नेपाल (क्यान महासंघ)ले जनाएको छ ।

सो क्रममा आइतबार पूर्वराजदूत भागीरथ बस्नेत, पूर्वसचिव इन्जिनियर हरिराम कोइराला, नायिका सुष्मा कार्की, चर्चित हास्य कलाकारहरू दीपाश्री निरौला, जितु नेपाल ‘मुन्द्रे’ र सागर लम्साल ‘बले’ तथा र्‍याप गायक राजेन्द्र भट्ट ‘मिस्टर आरजे’ लगायत अन्य विशिष्ट व्यक्तिहरूले पनि महोत्सव अवलोकन गरेका छन् ।

हरेक दिन कुनै न कुनै स्टलले नयाँ–नयाँ वस्तु तथा सेवा सार्वजनिक गरिरहेको प्रदर्शनी सोमबार अझ विशेष रहने महासंघका महासचिव नारायण थापाले बताए ।

उनका अनुसार फिन्टेक कम्पनी, इन्टरनेट सेवा प्रदायक तथा अन्य कम्प्युटर, ल्यापटप, मोबाइल र आईसीटी एक्सेसरिजहरूका स्टलहरूमा उल्लेख्य सहभागिता छ । इन्फोटेकमा विभिन्न खण्डमा गरी कुल १७० वटा स्टल रहेका छन् ।

प्रकाशित मिति: सोमबार, वैशाख १२, २०७९ १३:३१