भरतपुरका कांग्रेसले देलान् त माओवादीलाई भोट ?

A+ A A-

घटाना १ः
२९ चैत २०७८ मा नेपाली कांग्रेस भरतपुर महानगरपालिकाका २९ वटै वडाका सभापतिहरूले भरतपुरको मेयर कांग्रेसले नपाए गठबन्धन स्वीकार नगर्ने घोषणा गरे ।

साथै, वडा सभापतिहरूले आफूहरूले भनेअनुसार नभए गठबन्धनका सबै उम्मेदवारलाई बहिष्कार गर्ने र महानगरको मेयर, उपमेयर र सबै वडामा अध्यक्षसहितका पाँच जना उम्मेदवार खडा गर्ने चेतावनी पनि दिए ।

घटना २ः

भरतपुर महानगरको मेयर माओवादीलाई दिने गठबन्धनले गरेको निणर्यपछि असन्तुष्ट बनेका कार्यकर्ताले आइतबार कांग्रेसको तर्फबाट मेयरमा पूर्वसांसद जगन्नाथ पौडेललाई उठाउने घोषणा गरे ।

कांग्रेसनेत्री मिना खरेलले पूर्वसांसदसमेत रहेका पौडेललाई उम्मेदवार बनाउने प्रस्ताव गरेकी हुन् । गठबन्धनको निणर्यप्रति असन्तुष्ट उक्त समूहले उम्मेदवारी मनोनयन दर्ताका लागि दिउँसो १ बजे निर्वाचन अधिकृतको कार्यालय जाने निर्णय गरेको छ ।

भरतपुरको मेयरमा कांग्रेसका पाण्डेले गराए उम्मेदवारी दर्ता

०००

यो त भरतपुर कांग्रेसमा देखिएको प्रत्यक्ष असन्तुष्टि मात्रै हो । अघिल्लो पटकको स्थानीय तहको चुनावमा पनि भरतपुरमा कांग्रेस र माओवादी केन्द्रबीच गठबन्धन भएको थियो । त्यसबेला यति धेरै विरोध नभए पनि रुख चिह्नमा धेरै भोट खसेको थियो ।

भरतपुर कांग्रेसका नेता नीलकण्ठ रिजालका अनुसार अघिल्लो स्थानीय चुनावमा मेयरमा उम्मेदवारी नै नपरेको रुख चिह्नमा ५ हजार ५ सय भोट खसेको थियो ।

अघिल्लो पटकको गठबन्धनमा भन्दा बढी विरोध भइरहँदा मतदाताले गठबन्धनको उम्मेदवार अर्थात् मेयरमा माओवादी केन्द्रका उम्मेदवारलाई मत हाल्छन् त भन्ने प्रश्नलाई निकै चासोका साथ हेरिएको छ ।

कांग्रेसबाट भरतपुरको मेयरमा उम्मेदवारी घोषणा गरेका पौडेल भन्छन्– म मासिऊँला तर भ्रष्टाचारीलाई मैदान छाड्दिनँ

तर, अघिल्लो चुनावको परिस्थिति हेरेर अहिलेको चुनावलाई मूल्यांकन गर्न नमिल्ने चितवन कांग्रेसका उपसभापति राजीव न्यौपाने तर्क गर्छन् । केपी ओली नेतृत्वको सरकारको दमन, भ्रष्टाचारलगायतलाई सहन नसकेर बनेको आन्दोलनको मोर्चा गठबन्धनमा परिणत भएकाले कार्यकर्ताले इमानदारीपूर्वक गठबन्धनमै मत दिने उनको दाबी छ ।

‘पुराना नेता-कार्यकर्ताहरूलाई भावनात्मक रूपमा आफैँ लडौँ भन्ने छ । चितवन राजनीतिक सुझबुझ भएको ठाउँ हो । हरेक राजनीतिक हलचलमा चितवन अग्रपङ्क्तिमा छ । राष्ट्रिय राजनीतिले मागेको आवश्यकतालाई सबैले स्वीकार्नुपर्छ,’ न्यौपाने भन्छन् ।

राष्ट्रिय राजनीतिलाई सही बाटोमा हिँडाउन भरतपुर कांग्रेसले त्याग गरेको उनको तर्क छ ।

‘चुनाव चिह्नभन्दा पनि राजनीतिक चेतनाको कुरा आउँछ । यो अहिले मात्रैको कुरा होइन । हिजो २०४६ सालको परिवर्तनमा कांग्रेसले नेतृत्व गर्‍यो र बाममोर्चले पनि साथ दियो । त्यो पनि त एउटा गठबन्धन थियो,’ उनले भने । कांग्रेसका कार्यकर्ताले गठबन्धनका सबै उम्मेदवारलाई मत साटासाट गर्ने उनको दाबी छ ।

कांग्रेस पूर्वसांसद जगन्नाथ पौडेलले भरतपुर महानगरको मेयरमा स्वतन्त्र उम्मेदवारी दिने

नेता जगन्नाथ पौडेलले कांग्रेसको तर्फबाट मेयरमा उम्मेदवारी दिने निर्णय फिर्ता लिनेमा आफू विश्वस्त रहेको न्यौपानेले बताए । ‘उहाँको कुरालाई पनि जिल्ला, केन्द्रले मनन गरेको छ । भोलिसम्म यो समस्या हल हुन्छ,’ उनले शिलापत्रसगँ भने ।

मा‌ओवादी केन्द्र चितवनका संयोजक आरसी अधिकारी अहिलेको गठबन्धनलाई पहिलेको गठबन्धनसँग तुलना गर्न नहुने तर्क गर्छन् । अघिल्लो पटकको गठबन्धन आकस्मिकतामा भएको र यो प्रतिगमनविरुद्धको राजनीतिक गठबन्धन भएको उनको तर्क छ । सोही कारण कांग्रेसका मतदाताले माओ‌वादीलाई भोट हाल्दैनन् भन्ने कुरा जायज नभएको उनको तर्क छ ।

प्रतिगमनविरुद्धको राजनीतिक गठबन्धन भएकाले यसपटक अघिल्लो पटकको जस्तो समस्या नदोहोरिने उनको तर्क छ । ‘निर्णयपछि क्रिया–प्रतिक्रियाहरू त आइ नै हाल्छन् । तर गठबन्धनका दल इमानदार छन् । एउटाले अर्कोलाई भोट नदिने भन्ने हुँदैन,’ उनले भने ।