कोखदेखि शोकसम्मका कार्यक्रम लिएर कांग्रेस चुनावमा

A+ A A-

स्थानीय तह चुनावमा कांग्रेस कोखदेखि शोकसम्मको नारा लिएर अगाडि बढ्ने भएको छ । सानेपास्थित पार्टी केन्द्रीय कार्यालयमा घोषणापत्र सार्वजनिक गर्दै कांग्रेसले नागरिकको जन्मदेखि मृत्युसम्म सघाउने प्रतिबद्धता जारी गरेको हो । सम्मुनत समाज तथा कल्याणकारी राज्यको अवधारणाअन्तर्गत यस्तो योजना अघि सारिएको कांग्रेसले जनाएको छ ।

कांग्रेसले प्रजनन् स्वास्थ्य अधिकार, सुरक्षित मातृत्व, शिक्षा, गर्भावस्था र बालविकासअन्तर्गतको कार्यक्रम सार्वजनिक गरेको हो । कांग्रेसले सुरक्षित मातृत्वअन्तर्गत ५ हजार सुत्केरी भत्ता दिने घोषणा पनि गरेको छ । घोषणापत्रमा लेखिएको छ, 'नि:शुल्क संस्थागत सुत्केरी सेवा र नवजात शिशुको घरदैलोमै स्वास्थ्य सेवा, ५ हजारको सुत्केरी भत्ता ।'

कांग्रेसले घरवारविहीन विपन्न गर्भवतीका लागि नि:शुल्क आश्रय र पोषणको व्यवस्था गर्ने प्रतिबद्धता जनाएको छ । यस्तै, कांग्रेसले शिशु स्याहार केन्द्र र दिवा खाजा दिने घोषणापत्रमा उल्लेख गरेको छ । घोषणापत्रमा सीपमूलक रोजगारीको व्यवस्था गरिने कांग्रेसले उल्लेख गरेको छ ।

श्रमिकहरूलाई सामाजिक सुरक्षाअन्तर्गत निवृत्तिभरणको व्यवस्था गर्ने प्रतिबद्धता कांग्रेसको छ । एकल महिला तथा अपांगता भएका नागरिकहरूको सवालमा घोषणापत्रमा भनिएको छ, 'एकल महिला तथा अपांगता भएका नागरिहरूद्वारा सञ्चालित स्वरोजगारको हकमा ५० प्रतिशत योगदान सरकारको तर्फबाट व्यवस्था गरिनेछ ।'

कांग्रेसले ६५ वर्ष नाघेका वृद्धलाई घरमै स्वास्थ्य सेवा उपलब्ध गराउने घोषणा गरेको छ । यस्तै, उनीहरूको नि:शुल्क स्वास्थ्य बीमा गर्ने कांग्रेसको प्रतिबद्धता छ । 'स्वास्थ्य उपचारमा खल्तीको पैसा कम गरिनेछ,' घोषणापत्रमा भनिएको छ, '६५ वर्षमाथिका सबै ज्येष्ठ नागरिकलाई घरमै स्वास्थ्य सेवा र उपचारमा खल्तीको पैसा कम लाग्ने व्यवस्था गरिनेछ ।'

कांग्रेसले मृत्यु संस्कार खर्च दिने योजना अघि सारेको छ । 'नागरिक, समुदाय र धर्मबमोजिमको बेग्लै अन्तिम संस्कारका लागि स्थान उपलब्ध गराउने र मृत्यु संस्कार खर्च दिने,' घोषणापत्रमा भनिएको छ ।

नागरिकले आत्मसम्मानका साथ जीवनयापन गर्ने वातावरण निर्माणका लागि सामाजिक सुरक्षाअन्तर्गत यो कार्यक्रम अघि सारिएको घोषणापत्र मस्यौदा समितिका संयोजक रहेका महामन्त्री गगन थापाले बताए । 'हामी सस्तो लोकप्रियताका निम्ति मात्रै होइन, नागरिकप्रति उत्तरदायी भएर नै यो कार्यक्रम अघि सारेका हौँ । स्वास्थ्यका सवालमा हाम्रो पालमा निकै राम्रा कायम भएका छन् । यो नारालाई साकार पार्न पनि कांग्रेस प्रतिबद्ध छ,' थापाले भने ।

यस्ता सामाजिक सुरक्षा कार्यक्रमको प्रभावकारी कार्यान्वनका निम्ति स्थानीय सरकारको विशिष्ट भूमिका हुने भन्दै थापाले स्थानीय सरकारको सेवालाई नागरिकमैत्री बनाउन कांग्रेस दृढतापूर्वक लाग्ने बताए । 'सरकार भनेको नागरिकको सेवक हो । केन्द्रदेखि स्थानीय तहसम्मै कांग्रेस जनताको सेवक बन्न चाहन्छ,' उनले भने ।

आफ्नो नेतृत्वमा बन्ने सम्पूर्ण स्थानीय सरकारहरूले सामाजिक सुरक्षामैत्री कार्यक्रमलाई उच्च प्राथमिकता दिँदै आवश्यकताअनुसार थप सामाजिक सुरक्षाका कार्यक्रमहरू लागू गर्ने कांग्रेसको प्रतिबद्धता छ ।

प्रकाशित मिति: आइतबार, वैशाख ११, २०७९ १५:४९