११औँ पटक चुनाव जितेर गिनिजबुकमा नाम लेखाउन चाहन्छन् ८१ वर्षे 'वडाध्यक्ष बा' (भिडियाेसहित)

११औँ पटक चुनाव जितेर गिनिजबुकमा नाम लेखाउन चाहन्छन् ८१ वर्षे 'वडाध्यक्ष बा' (भिडियाेसहित)

A+ A A-

ललितपुरको हनुमानथाननजिकै एउटा किराना पसलअगाडि उभिइरहेका थिए, ८१ वर्षे नरसिंह ब्यञ्जनकार । आइतबार दिउँसो वडाअध्यक्ष पदमा उम्मेदवारी मनोनयन दर्ता गरी फर्केका उनको अघिपछि कोही देखिदैनथे । नरसिंह उभिएको ठाउँबाट १० मिटरजति दक्षिणमा कांग्रेसको चुनाव प्रचारप्रसार कार्यालयमा ठूलै भिडभाड थियाे । तर नरसिंह शिव मन्दिरअगाडि उभिएर पसलेसित आफ्नो मोबाइलमा आवाज नै सुनिन छोडेको गुनासो गर्दै थिए ।

उनले कुनै दलबाट नभई स्वतन्त्र हैसियतमा उम्मेदवारी दिएका छन् । २०२९ सालयता ललितपुर महानगरपालिका वडा नम्बर १० मा ब्यञ्जनकारले कसैलाई चुनाव जित्न दिएका छैनन् । यसपालि उनी विश्राम लिन चाहन्थे । तर, एक शुभचिन्तकले उनलाई विश्व कीर्तिमानबारे बताए । 'लगातार ३५ वर्ष चुनाव जितेर जनताकाे सेवा गर्नेकाे नाम गिनिज बुक अफ वर्ल्ड रेकर्डमा छ । यसपालि तपाईंले चुनाव जित्नुभयाे भने त्याे ताेडिने छ', नजिककाे शुभचिन्तकले भनेका कुरा सुनाउँदै ब्यञ्जनकारले भने, 'लामाे समय स्थानीय निर्वाचन हुन नसकेकाले मेराे अलि पुगेन कि भन्ने छ । यसपालि जितेँ भने विश्व रेकर्ड हुन्छ रे ।'

यसबाहेक पूर्वप्रधानन्यायाधीश कल्याण श्रेष्ठदेखि वडाकै युवाहरूले फेरि मैदानमा आउन सुझाएकाले आफू तयार भएकाे उनले बताए । भाेट माग्न उनी तामझामसहित घरदैलाे गर्ने याेजनामा छैनन् । भन्छन्, 'मैले जेजति काम गरेँ । त्याे जनतालाई थाहा छँदैछ । मैले भाेटका लागि याेग्य काम गरेकाे छु । अरूले नै मागिदिन्छन्', उनी ढुक्क सुनिए ।

२०७४ सालकाे चुनावमा स्वतन्त्र उठेका नरसिंहले कांग्रेसका कर्मलाल ब्यञ्जनकारलाई हराएका थिए । नरसिंह ६६७ मतका साथ विजयी हुँदा उनका प्रतिद्वन्द्वी कर्मलालले ६०२ मत पाए । नरसिंहकै माइला बाकाे छाेरा हुन्, कर्मलाल । यसपालिकाे चुनावमा कांग्रेसबाट नरसिंहका प्रतिस्पर्धी आफ्नै भतिज हुनेछन् ।

उनी भन्छन्, 'याे राजनीति मलाई मनै पर्दैन । जनतालाई ढाँट्ने, परिवार नै फुटाइदिने गर्छन् ।' कुनै बेला कांग्रेसबाटै टिकट पाएर जितेका उनले ललितपुर १० मा कांग्रेसलाई सधैं निराश पार्दै आएका छन् । २०२९ सालदेखिकाे अपराजित यात्रा यसपालि अन्तिम पल्टलाई कायम गर्न चाहन्छन् उनी ।

२०२९ सालअघि उनी व्यापार र ठेक्कापट्टा गर्थे । २०२६ सालतिर राजा वीरेन्द्रकाे विवाहमा क्वार्टर बनाएकाे पैसा नपाएपछि उनी बिरक्तिए । दरबारमा त्यसबेलाका हाकिमलाई उनले रकम निकासाका लागि अनुराेध गरे । तत्कालीन राजासमक्ष बिन्ती चढाए । तर पाउनुपर्ने एक लाखभन्दा बढी रकम नदिइएपछि ठेक्कापट्टाबाट हात झिके । अनि त्याे बेला वडाका हर्ताकर्ता देवेन्द्रलाल अमात्यकाे पछि लागे ।

वडाअध्यक्षमा उठ्न लागेका देवेन्द्रलाललाई सघाउन नरसिंह खटेका थिए । तर चुनाव प्रचारप्रसार गर्दै जाँदा देवेन्द्रलालले केही अपशब्द बाेले । उनले त्याे नभनाैँ भन्दा पनि मानेनन् । त्यसपछि आफैं चुनावी मैदानमा उत्रिएका नरसिंहले जिते । त्यसपछि उनले कहिल्यै पछाडि फर्केर हेर्नुपरेन । भन्छन्, 'म राजनीति हाेइन, जनताकाे सेवा गर्छु । त्यसैले मलाई जनताले जिताउँछन् ।'

उनी पढेलेखेका छैनन् । तर प्रगतिशील विचारमा विश्वास राख्छन् । २०३६ सालमा बहुदललाई साथ दिन उनले वडाध्यक्ष पद त्यागेका थिए । 'मैले कसैकाे गुलामी गरिनँ । जनताकाे पक्षमा हुने निर्णय र फैसलाकाे पक्षमा उभिएँ । कसैसित सम्झाैता पनि गरिनँ', उनले सुनाए ।

हेर्नुहाेस्, उनीसँग गरिएकाे भिडियाे वार्ताः

प्रकाशित मिति: आइतबार, वैशाख ११, २०७९ १७:०३