वीरगञ्जका राजेशमान सिंह र प्रदीप यादवको दुस्मनीपूर्ण सम्बन्ध कसरी सुध्रियो ?

वीरगञ्जका राजेशमान सिंह र प्रदीप यादवको दुस्मनीपूर्ण सम्बन्ध कसरी सुध्रियो ?

A+ A A-

वीरगञ्ज महानगरको १५ नम्बर वडाको कार्यक्रममा ५ वैशाखमा प्रदीप यादवले भनेका थिए, ‘अघिल्लोपटक विजय सरावगीलाई जिताएर गल्ती गरेँ ।’

व्यापारिक पृष्ठभूमिका सरावगीलाई तत्कालीन संघीय समाजवादी फोरमले मेयरको टिकट दियो । त्यसबेलाको चुनावमा मधेस आन्दोलनको रापताप, प्रदीप यादवको लोकप्रियता त्यसमाथि व्यापारी सरावगीको व्यक्तिगत लोकप्रियता निकै थियो । यी सबैको योग थियो, सरावगीको विजयी ।

०७४ मा विजय सरावगीको चुनावी कमाण्डर थिए, प्रदीप यादव । उता प्रतिस्पर्धी दल तत्कालीन राजपाबाट मेयरका उम्मेदवार थिए- राजेशमान सिंह । वीरगञ्ज बजारमा सिंह र यादवको दबदबा उस्तै थियो । एकले अर्कोको अस्तित्व स्वीकार्न सक्ने अवस्थामा थिएन । वीरगञ्जमा यादव र सिंहको दुस्मनीपूर्ण सम्बन्ध थियो ।

सिंह र यादव दुस्मनीपूर्ण सम्बन्धको उत्कर्षचाहिँ ०७२ सालको मधेस आन्दोलनका क्रममा देखिएको थियो । एकसाथ राप्रपाको राजनीतिमा लागेका उनीहरूबीच ०५६ सालदेखि नै तिक्ततापूर्ण सम्बन्ध थियो । जुन कुरा सिंह र यादव दुवै स्वीकार गर्छन् ।

०७२ को मधेस आन्दोलनमा सिंह शरतसिंह भण्डारीले नेतृत्व गरेको राष्ट्रिय मधेस समाजवादी पार्टीबाट आन्दोलनको कमाण्डर थिए भने यादव संघीय समाजवादी फोरमका तर्फबाट । त्यतिबेला नै उनीहरूबीच मिलाप छैन भन्ने वीरगञ्जमा आन्दोलन दुई समूहले छुट्टाछुट्टै स्थानमा गर्नुले पुष्टि गर्छ ।

मधेस आन्दोलनका क्रममा एकले अर्कोलाई आरोप-प्रत्यारोप पनि गर्ने गरेका थिए । खासगरी नाकाबन्दीका बेलामा सीमाबाट रातारात सामान भित्र्याउन लागेको भनेर एकले अर्कोलाई आरोपित गर्ने गरेका थिए । नाकाबन्दीका बेलामा राजेशनमान सिंहले जिल्लाका तत्कालीन प्रहरी प्रमुख एसपी र प्रदीप यादवको कल रेकर्ड सार्वजनिक गरेको भनेर वीरगञ्जमा खुबै चर्चाको विषय बनेको थियो । उक्त घटनापछि यादव सिंहसँग झनै रुष्ट भएका थिए ।

त्यही तिक्ततापूर्ण सम्बन्धका कारण ०७४ को संघीय चुनावमा राजपा र संघीय समाजवादी दलबीचको गठबन्धनले वीरगञ्जमा काम नगरेको बताइन्छ । संघीय चुनावका बेलामा सिंहले गठबन्धनका नेता प्रदीप यादवभन्दा पनि कांग्रेस नेता अजय चौरसियासँग मिलेको यादव पक्षको आरोप थियो ।

०७४ सालको चुनावमा दुस्मनीपूर्ण सम्बन्धसहित चुनावमा भिडेका उनीहरूलाई परिस्थितिले ५ वर्षपछि एक ठाउँमा ल्याइपुर्‍याएको छ । जसपाबाट निर्वाचित मेयर विजय सरावगी एमाले प्रवेश गरेपछि सरावगीलाई प्रतिस्थापन गर्न सिंह जसपामा आइपुगेका हुन् ।

जसपाबाट मेयरको उम्मेदवार हुन लागेका सिंहले चाहिँ विगतमा जस्तो सम्बन्ध भए पनि त्यो पार्टीगत सम्बन्धका रूपमा व्याख्या गर्नुपर्ने बताउँछन् । शिलापत्रसँग सिंहले भने, ‘फरक पार्टीमा भएकाले त्यस्तो सम्बन्ध भयो, हाम्रो व्यक्तिगत सम्बन्ध दुस्मनीपूर्ण होइन ।’

वीरगञ्ज महानगरको मेयरका आकांक्षी सिंह कांग्रेसको राजनीतिबाट दीक्षित हुन् । सिंहको चलायमान प्रवृत्तिका कारण कांग्रेसबाट राप्रपा, राजावादी हुँदै मधेसकेन्द्रित राजनीतिमा पुगे । मधेस केन्द्रित राजनीतिबाट कम्युनिस्ट पार्टीको छाताभित्र ओतिन खोजेका सिंह ७ चैतमा लोसपाबाट जसपामा प्रवेश गरेसँगै तत्कालका लागि रोकिएको छ ।

२०४३ सालमा कांग्रेसनिकट नेविसंघबाट राजनीतिमा सक्रिय सिंहको राजनीतिक ‘लाइमलाइट’ भने ०५४ सालको स्थानीय तहको चुनावबाट सुरु भएको हो । त्यतिबेला वीरगञ्ज नगरपालिकामा वडा सदस्य निर्वाचित भएका थिए । त्यसबेला निरन्तर वीरगञ्जको राजनीतिको केन्द्रीय भूमिकामा रहेका सिंह विगत १२ वर्षदेखि मधेस केन्द्रित राजनीतिमा जोडिएका छन् । शिलापत्रसँग कुराकानी गर्दै सिंहले ०५६ सालदेखि कांग्रेस जोडेर राप्रपामा जोडिएको बताउँछन् ।

खासगरी विमल श्रीवास्तावसँगको दोस्ती गरेर सिंहले राप्रपाभित्र राजनीतिक उचाइ लिने प्रयास गरेका थिए । २०६१ साल माघमा तत्कालीन राजा ज्ञानेन्द्र शाहले गराएको नगरपालिकाको निर्वाचनमा सिंह वडाध्यक्षमा निर्वाचित भएका थिए । सरकारी जागिर छोडेर राजनीतिमा ओर्लिएका प्रदीप यादवले राप्रपाबाट राजनीतिक सुरु गरेका हुन् । संयोग चाहिँ सिंह र यादवको राप्रपा प्रवेश एकसाथ ०५६ सालमा भएको हो । र, २ वर्षपछि राप्रपाबाटै ०५८ सालमा जिल्ला विकास समितिको सदस्य भएका थिए ।

राप्रपाको राजनीतिमा झन्डै एक दशक विताएका यादव ०६४ पछि भने मधेस आन्दोलनमा जोडिएका हुन् । सिंह र यादव एकसाथ राप्रपामा प्रवेश गरे र एकसाथ मधेस आन्दोलनमा जोडिए । राप्रपामा हुँदा पनि उनीहरूबीच प्रतिस्पर्धी सम्बन्ध थियो ।

शिलापत्रसँगको कुराकानीमा प्रदीप यादवले राजनीतिमा सम्बन्ध सधैँ दुस्मनीपूर्ण नहुने दाबी गरे । यादवले भने, ‘जनताले वीरगञ्जको विकासका लागि तपाईंहरू दुई जना मिल्नुहोस् भन्ने पहिलादेखि नै भन्दै आउनुभएको थियो, अहिले त्यो समय आएको छ ।’

सिंह वीरगञ्ज नगरपालिकाको वडा सदस्य भएको समयमा प्रदीप यादव भने जिल्ला विकास समितिका सदस्य भएका थिए । यादवको ‘राजनीतिक लाइमलाइट’ भने मधेस आन्दोलन नै हो । ०७२ को नाकाबन्दीपछि यादव वीरगञ्जमा बढ्ता चर्को सुनिन थालेका हुन् ।

त्यही आन्दोलनको जगमा यादव ०७४ को संघीय चुनावमा पर्साबाट निर्वाचित पनि भए । युवा पुस्तामा सिंह र यादव दुवै लोकप्रिय छन् । तर, दुर्भाग्य उनीहरू दुवैलाई ‘राजनीतिक चरित्र कम’ भएका नेताका रूपमा वीरगञ्जमा टिप्पणी हुन्छ ।

प्रकाशित मिति: आइतबार, वैशाख ११, २०७९ २२:११