क्यान इन्फोटेक चौथो दिन : युवापुस्तामा इन्फोटेकको आकर्षण, बिदाका कारण अत्यधिक भिड

क्यान इन्फोटेक चौथो दिन : युवापुस्तामा इन्फोटेकको आकर्षण, बिदाका कारण अत्यधिक भिड

A+ A A-

आईएमई पे क्यान इन्फोटेक २०२२ इन एसोसिएसन विथ एससीटी स्मार्ट क्यूआरको चौथो दिन अन्य दिनको तुलनमा अत्यधिक भिड भयो । बुधबारदेखि सुरु भएको क्यान इन्फोटेकको २७औँ संस्करणमा शनिबार सार्वजनिक बिदा अनि मौसम पनि सफा रहेका कारण अन्य दिनको तुलनामा सरकारी तथा गैर-सरकारी क्षेत्रमा कार्यरत कर्मचारी तथा विद्यार्थीहरूको भिड रह्यो ।

शनिबार मेलामा आएकाहरूले आफूहरूले माघमा स्थगित भएको क्यान इन्फोटेक अहिले सुरु भएको ढिलो गरी थाहा पाएको तथा अवलोकन गर्न पाउँदा निकै उत्साहित भएको बताए । कोरोना महामारीका कारण प्रदर्शनी यसअघि दुई पटक स्थगित भएको थियो । कोरोना महामारीपछि सुरु भएको प्रदर्शनीमा आफूलाई उपयोगी हुने धेरै स्टलहरू रहेको र सूचना प्रविधिका बारेमा नेपालमा उपलब्ध पछिल्ला प्रविधिहरूमा जानकारी लिएको अवलोकनकर्ताहरूको भनाइ छ ।

कम्प्युटर एसोसिएसन नेपाल (क्यान महासंघ)का अध्यक्ष नवराज कुँवरका अनुसार यो वर्षको इन्फोटेक विगतको भन्दा धेरै फरक छ । आयोजकको उद्देश्यअनुसार इन्फोटेकमा प्रदर्शनीकर्ताको सहभागिता र अवलोकनकर्ताको चाहनाअनुसारका प्रविधि प्रदर्शनमा राखिएको छ । कोभिड–१९ महामारीका कारण बढेको सूचना तथा सञ्चार प्रविधिको प्रयोगलाई व्यवस्थित र थप प्रभावकारी बनाउने ज्ञान र दक्षताको खोजीमा मानिसहरू रहेको र आईसीटी एक्सेसरिजमा भन्दा ब्रान्डिङ, फिन्टेक र स्टार्टअपमा दर्शकको भिड लागेको अध्यक्ष कुँवरको भनाइ छ ।

उनका अनुसार रोबोटिक, इमर्जिङ टेक्नोलोजी, वाईफाई तथा इन्टरनेटलगायत प्रोडक्टहरूमा पनि अवलोकनकर्ताको उल्लेख्य सहभागिता छ । त्यसैगरी सफ्टवेयर, नेटवर्किङ र क्लाउडसोलुसन, इलेक्ट्रिक तथा इलेक्ट्रोनिक्स, सेक्युरेटी सोलुसन, ल्यापटप तथा डेस्कटप कम्प्युटर, प्रिन्टर, एन्टिभाइरस र बैंकिङ सोलुसनसम्बन्धी सफ्टवेयरलगायतका स्टलमा पनि अवलोककर्ताहरूको उल्लेख्य भिड लाग्यो ।

प्रविधिको प्रयोगबाटै टिकट काटेर अवलोककर्तालाई इन्फोटेक भ्रमण गराउने क्यानको योजनाअनुसार नै दर्शकहरूले इन्फोटेक भ्रमण गरिरहेको इन्फोटेकका सह–संयोजकसमेत रहेका महासंघका उपाध्यक्ष रञ्जितकुमार पोद्दारले जानकारी दिए । उनका अनुसार आईएमई–पेमार्फत दैनिक हजारौँ मानिसहरू टिकट खरिद गरेर इन्फोटेक भ्रमणमा आएका छन् । त्यस्तै, प्रविधिको प्रयोग गर्न नचाहनेहरूले सय रुपैयाँ तिरेर इन्फोटेक भ्रमण गरिरहेको उपाध्यक्ष पोद्दारको भनाइ छ ।

१ सयको टिकट काटेर भिजिट गर्नेको संख्या भने तुलनात्मक रूपमा कम रहेको उनको भनाइ छ । ‘प्रविधिको प्रयोगबाट १ रुपैयाँ मै क्यान इन्फोटेक भिजिट गर्ने अवसर छ,’ उपाध्यक्ष पोद्दारले भने, ‘यो मौकाको फाइदा उठाई सूचना तथा सञ्चार प्रविधिको प्रयोगमा पोख्त बन्ने र अथाह ज्ञान लिने अवसरलाई खेर नफाल्न सम्पूर्णमा आग्रह गर्दछु ।’

शनिबार इन्फोटेकमा लोकप्रिय गायक सुशान्त केसी, र्‍यापर गिरिस खतिवडा, गायक स्वप्न सुमन, पब्जी खेलाडी इन्दु मल्ललगायत समाजमा चर्चित व्यक्तित्वहरूको सहभागिता थियो । इन्फोटेकमा आएका अवलोकनकर्ताहरू आफूसँगै चर्चित व्यक्तित्वहरू पाउँदा झनै उत्साहित देखिन्थे ।

शनिबार नै डिस होमले नयाँ प्रोडक्ट ‘क्याम्पस वाईफाई’ सार्वजनिक गरेको छ । साथै शनिबार नै रमाइलो गेमले ‘ब्रान्ड च्यालेन्ज’ प्रतियोगिता आयोजना गरेका कारण यी स्टलहरूमा अवलोकनकर्ताको अत्यधिक आकर्षण देखिन्थ्यो ।

प्रदर्शनीमा नेपाल विज्ञान तथा प्रविधि प्रज्ञा–प्रतिष्ठान (नास्ट)को प्रविधि संकायअन्तर्गत दक्षिण कोरियाली सरकारको औपचारिक विकास सहयोगमार्फत मुलुकमै उपलब्ध पहिलो घुम्ती सूचना पहुँच केन्द्र (Mobile Information Access Center)मा अवलोकनकर्ताहरूको आकर्षण देखिन्थ्यो ।

नास्टका प्रविधि संकाय प्रमुख डा. रवीन्द्र ढकालका अनुसार सूचना प्रविधिमा पहुँच नभएका क्षेत्र र समूहलाई लक्षित गर्दै यो सूचना प्रविधिमैत्री बस तयार गरिएको हो र प्रदर्शनीमा सर्वसाधारणको जानकारीका निम्ति यसको प्रदर्शनी गरिएको हो ।

वातानुकूलित बसभित्र विद्यार्थीका लागि आवश्यक वाईफाई, ल्यापटप, प्रोजेक्टर, स्क्रिन, इलेक्ट्रोनिक पोडियम, प्रिन्टर, भिजुअलाइजर, साउण्ड सिस्टम, स्पिकर, शौचालयलगायतका सुविधाहरू उपलब्ध छन् । यस आईसीटी मोबाइल बसमा एक पटकमा १८ जनाले तालिम लिन सक्ने गरी संरचना बनाइएको छ ।

नास्टले घुम्ती सूचना पहुँच केन्द्र नामक मोबाइल बसमार्फत मुलुकका ग्रामीण भेगमा पुगी सूचना तथा संचार प्रविधि क्षेत्रमा शिक्षित र अशिक्षितबीचको खाडल भर्न सहयोग गर्ने उद्देश्य लिएको छ र सोका निम्ति क्यान महासंघसँग सहकार्य गरेको छ । घुम्ती सूचना पहुँच केन्द्रमार्फत विद्यार्थीलाई अभिमुखीकरण गर्ने, कम्प्युटरका कक्षा सञ्चालन गर्ने र साक्षरता बढाउनेलगायतका कामहरू भइरहेको नास्टले जनाएको छ ।

उपत्यकाबाहिर ७४ जिल्लामा रहेको आफ्नो नेटवर्कमार्फत यातायात पहुँच भएका सातवटै प्रदेशका स्थानीय तहसम्म प्रशिक्षकसहितको घुम्ती सूचना पहुँच केन्द्रमार्फत शहरी सुविधाबाट वञ्चित विद्यार्थी र अन्य जिज्ञासुलाई नास्टको बसभित्रै अनुशिक्षण कार्यक्रम बढाउने गरी क्यान र नास्टको सहकार्य हुने क्यान महासंघका महासचिव नारायण थापाको भनाइ छ ।

७ वैशाखदेखि १२ सम्म सञ्चालन हुने क्यान इन्फोटेकमा सूचना तथा संचार प्रविधि क्षेत्रमा विकास भएका नयाँनयाँ प्रविधिका प्रदर्शनीमा घुम्ती सूचना पहुँच केन्द्र (Mobile Information Access Center) पनि राखिएको छ । प्रदर्शनीमा अवलोकनकर्ताले सूचना तथा सञ्चार प्रविधिको क्षेत्रमा भएका विकास तथा नवप्रवर्तनहरूसँगै 'सूचना प्रविधिमैत्री बस' का बारेमा जानकारीका साथै कम्प्युटरसम्बन्धी आधारभूत तालिम अथवा कम्प्युटरका 'टिप्स एवम् ट्रिक्स' पनि सिक्न सकिने व्यवस्था नास्टले गरेको छ ।

सूचना तथा सञ्चार प्रविधि सम्बन्धि व्यवसायी र सम्बन्धित पक्षहरूलाई सहयोग पुग्ने उद्देश्यसहित गत बुधबारदेखि काठमाडौंको भृकुटीमण्डपमाशुरू भएको प्रदर्शनी आगामी सोमबारसम्म जारी रहनेछ ।

प्रकाशित मिति: आइतबार, वैशाख ११, २०७९ १२:२५