पुनर्निर्माणपछि तोकिएकै मितिमा आयो मेलम्चीको पानी, एक दिन बिराएर धारामा पानी आउने

पुनर्निर्माणपछि तोकिएकै मितिमा आयो मेलम्चीको पानी, एक दिन बिराएर धारामा पानी आउने

A+ A A-

राजनीतिक दलहरू स्थानीय तहको चुनावको चटारोमा छन् । चुनावी प्रचारप्रसारसँगै नेताहरूबीच एकापसमा आरोप-प्रत्यारोप पनि सुरु भएको छ ।

केही दिनअघि एक सार्वजनिक कार्यक्रममा एमाले अध्यक्ष केपी ओलीले भनेका थिए, 'चैतभित्र मेलम्चीको पानी खसाल्छु भनेको होइन ? चैतभित्र मेलम्चीको पानी खस्दैन, त्यति बेलामात्रै यिनीहरूले पानी ल्याउँछन्, जति बेला बाढी पस्छ ।'

यसअघि गत असोजमा ओलीले वैशाखभित्र मेलम्चीको पानी ल्याएर देखाउन चुनौती दिएका थिए । चैत मसान्तका दिन नै सुन्दरीजल प्रशोधन केन्द्रमा पानी झारिएको थियो । तर, त्यसको एक हप्तापछि ओलीले पानी काठमाडौं ल्याउन चुनौती दिएका थिए । उनले चुनौती दिएको तीन दिनपछि उपत्यकाबासीको धारामा मेलम्चीको पानी वितरण सुरु भएको छ ।

मेलम्ची निर्माण थालिएको तीन दशकपछि आयोजना पूरा हुने र दशक लामो समयदेखि नेताहरूले प्रतिबद्धता जनाउने तर काम नहुने भए पनि पुनर्निर्माणको काम भने तोकिएको समयभन्दा पहिले नै भएको छ । यद्यपि अहिले पनि मेलम्चीको अस्थायी पुनर्निर्माण गरेर ल्याइएको हो । अस्थायी पुनर्निर्माण र पुन: पानी वितरण पनि अन्योलग्रस्त भएका बेला सरकारले विशेष चासो दिएर अघि बढेको भने देखिएको थियो ।

पुनर्निर्माणको काम

गत असार १ मा बाढीले आयोजना क्षतिग्रस्त भएसँगै मेलम्चीको पानी कहिले आउँछ भन्ने अनिश्चित बनेको थियो । कसरी अघि बढ्ने भन्‍ने सवालमा लामो समयदेखि निर्णय हुन नसकेकोमा गत पुसमा खानेपानी मन्त्रालयका तर्फबाट विशेष प्रस्ताव मन्त्रिपरिषद्‌मा लगिएको थियो ।

नियमित प्रक्रियाबाट काम गर्दा ढिला हुने भन्दै फाष्ट ट्रयाकबाट काम गर्न मन्त्रिपरिषद्‌बाट निर्णय गरिएको थियो । मन्त्रिपरिषद्‌बाट मन्त्रालयको प्रस्ताव अनुसार फाष्ट ट्रयाकबाट काम गर्ने निर्णय भएसँगै माघ महिनामा अस्थायी निर्माणका लागि ठेक्का लगाइएको थियो ।

पुरानै कम्पनी सिने हाइड्रोलाई साढे ३६ करोड रुपैयाँमा ठेक्का लगाइएको थियो । ६ महिनाभित्र काम सक्ने सर्त राखिए पनि कम्पनीले तीन महिनाभित्रै पूरा गर्ने अर्थात् चैत मसान्तभित्र काम सक्ने प्रतिबद्धता जनाएको थियो ।

तर, पहिलेको भुक्तानीको विषयलाई लिएर ६० प्रतिशत काम सकेपछि ठेकेदार कम्पनीले कामबाट हात झिक्नेसम्मको चेतावनी दिएको थियो । अन्तत : दुई दिनमै ठेकादार कम्पनीलाई सहमतिमा लिएर चैतमा अस्थायी निर्माणको काम सकियो भने आइतबारबाट पानी वितरण सुरु भएको छ ।

काठमाडौं उपत्यका खानेपानी लिमिटेडले एक दिन बिराएर पानी वितरण गर्ने जनाएको छ । यो पहिलो चरणमा काठमाडौंका ४ लाख घरमा मात्रै पानी पुग्ने केयुकेएलले जनाएको छ । एक दिन बिराएर न्यूनतम २ घण्टादेखि अधिकतम ६ घण्टासम्म पानी छोडिने केयुकेएलले जनाएको ।

खानेपानीमन्त्री उमाकान्त चौधरीले सरकारको संकल्प अनुसार काम तोकिएकै समयमा पूरा भएको दाबी गरे ।

यस्तो थियो यसअघि पानी वितरणको सूची :