पुरानो भुक्तानी विवादले मेलम्चीको काममा अवरोध, फेरि अत्तो थाप्दै चिनियाँ कम्पनी

पुरानो भुक्तानी विवादले मेलम्चीको काममा अवरोध, फेरि अत्तो थाप्दै चिनियाँ कम्पनी

A+ A A-

आगामी स्थानीय तहको चुनावअघि नै काठमाडौं बासीलाई मेलम्चीको पानी खुवाउने सरकारकाे लक्ष्यमा धक्का लागेकाे छ । अहिले मेलम्ची आयोजना पुन:निर्माणको काममा अवरोध सिर्जना भएको छ ।

मेलम्ची खानेपानी विकास समिति स्रोतले अहिले पुन:निर्माण गरिरहेको चिनियाँ ठेकेदार कम्पनीले काम रोकेको जानकारी दिएको छ ।

गत माघ दोस्रो साता चिनियाँ कम्पनी सिने हाइड्रोले दिन गन्तीमा काम गरेर चैत मसान्तभित्र सक्ने योजनासहित काम सुरू गरेको थियो ।

फागुन २५ सम्म ६० प्रतिशत काम सकेको दाबी गरेको सिनोले अब रकम उपलब्ध नगराए काम रोक्ने भन्दै बखेडा झिकेकाे हो । 'रकम उपलब्ध नगराएसम्म काम अघि नबढाउने भन्नु भएको छ', विकास समितिका एक अधिकारीले भने, 'अहिलेको ठेक्का प्रकियामा कुनै समस्या छैन । पुरानो विषयको कारणले गर्दा समस्या सिर्जना भएको छ ।'

सरकारले गत पुस अन्तिमसाता मेलम्चीको पुन:निर्माणको काम फाष्ट ट्रयाकमा निर्माण गर्ने निर्णय गरेको थियो । साढे ३६ कराेड रुपैयाँमा सिने हाइड्रोले गत माघ दोस्रो साता काम सुरू गरेको थियो ।

के- हो लफडा

सिने हाइड्रोले पेश्की रकम नपाएको भन्दै काममा अवरोध गरेको छ । तर, मेलम्ची खानेपानी विकास समितिले भने पछिल्लो पुन:निर्माणको नभई पुरानै समस्या भएको दाबी गरेको छ ।

गत असार एकमा विकास समितिका तत्कालीन कार्यकारी निर्देशक त्रिरेस खत्रीको निर्देशनअनुसार आयाेजनाकाे सुरुङमा पानी हाल्दा मुख्य ढोका भत्किएको थियो ।

परीक्षणका लागि समेत समय नदिएर असारमा एकमा हताहतार सुरूङभित्र छिर्ने ढोका बनाउँदा उल्टो ढोका लगाइएको थियो । प्राविधिकहरूका अनुसार पानी भएको साइड तिर ढोका खुल्ने गराउनुपर्नेमा उल्टो ढोका हालेर पानी छोडिएको थियो । विकास समितिका पदाधिकारीको गल्तीको कारण क्षति पुगेको भन्दै सिने हाइड्रोले क्षतिपूर्ति माग गरेकोमा मूल्याङ्कन नै नगराई ३० प्रतिशत क्षतिपूर्ति दिने निर्णय गरिएको थियो । तर, पछि मूल्याङ्कन समितिले अधिकतम २४ प्रशतिभन्दा बढी रकम दिन नमिल्ने बताएपछि यो विषय अहिले अख्तियार दुरूपयोग अनुसन्धान आयोगले समेत हेरेको छ ।

६ प्रतिशत रकम (१ करोड ५२ लाख रुपैयाँ) गैरकानुनी भएको भन्दै भुक्तानी गर्न समितिले नमानेपछि अहिले समस्या सिर्जना भएको हो । तत्कालीन कार्यकारी निर्देशक सरूवा भएर मन्त्रालय पुगेका छन् भने अहिले आएका कार्यकारी निर्देशक बासुदेव पौडेलले पुरानो यस्तो पैसा उपलब्ध गराउन नसकिने बताएका छन् ।

पैसा उपलब्ध गराउन दूतावासमार्फत लविङ

चिनियाँ ठेकेदार कम्पनीले यस्तो रकम उपलब्ध गराउनका लागि चिनियाँ दूतावासमार्फत लविङ गरेको छ । परराष्ट्र मन्त्रालय स्रोतका अनुसार पहिला दिने भनिएकाे अनुसार भुक्तानी मिलाइदिनका लागि नेपालस्थित चिनियाँ दूतावासले गत कात्तिकमा नै पत्र काटेको थियो ।

दूतावासले काटेको पत्र परराष्ट्रले खानेपानी मन्त्रालयमा पठाए पनि यसउपर उसले कुनै निर्णय लिन सकेको छैन । खानेपानी मन्त्रालयले भने यस्तो भुक्तानी दिनका लागि कि मन्त्रिपरिषद्बाट निर्णय हुनुपर्ने कि अख्तियारमा परेको उजुरीलाई निश्कर्षमा पुर्‍याउनुपर्ने बताएकाे छ ।

यता खानेपानीमन्त्री उमकान्त चाैधरीले भने मेलम्चीको काम नरोक्न निर्देशन दिएका छन् ।

प्रकाशित मिति: शनिबार, फागुन २८, २०७८ १८:४९