६ महानगरमा उम्मेदवारी नपरेका दलको चुनाव चिह्न मतपत्रमा नराख्ने तयारीमा आयोग

६ महानगरमा उम्मेदवारी नपरेका दलको चुनाव चिह्न मतपत्रमा नराख्ने तयारीमा आयोग

A+ A A-

निर्वाचन आयोगले ६ महानगरमा उम्मेदवारी नपरेका दलको चुनाव चिह्न मतपत्रमा नराख्ने तयारी गरेको छ । काठमाडौँ, ललितपुर, भरतपुर, विराटनगर, वीरञ्गज र पोखरामा उम्मेदवारको टुंगो लागेपछि मात्रै मतपत्र छाप्ने भएको हो । निर्वाचन आयोगले यो निर्णय एक महिना अगावै गरेको थियो । यद्यपी, ती स्थानका मतपत्रको डिजाइनको स्वीकृत भने हालसम्म पनि नभएको प्रमुख निर्वाचन आयुक्त दिनेश थपलियाले बताए ।

'६ महानगर र काठमाडौ‌ उपत्यकामा १७ गतेपछि मात्रै मतपत्र छाप्ने निर्णय हामीले गरेका थियौँ । अन्यत्र मतपत्रको डिजाइन स्वीकृत भएर पठाउने तयारीमा छौँ । ६ महानगरको हकमा भने मतपत्रको डिजाइन स्वीकृत हुनै बाँकी छ,' उनले भने ।

काठमाडौं उपत्यका बाहेक अन्य स्थानीय तहको मतपत्र छपाइ सकिएको उनले बताए । आयोगले हालसम्म ६८ जिल्लाको मतपत्र छाप्न काम सकेको थपलियाले बताएका छन् । 'हालसम्म हामीले ६८ जिल्लाका करिब १ करोड ७० लाख मतप छाप्ने काम गरिसकेका छौँ,' थपलियाले भने ।

चितवनको हकमा भरतपुरबाहेक अन्य स्थानीय तहको मतपत्र छपाइको काम सकिएको छ । यस्तै मोरङमा पनि विराटनगरबाहेक अन्य स्थानीय तहको मतपत्र छाप्ने काम सम्पन्न भएको उनले बताए । यता पर्सा र कास्कीको हकमा पनि वीरगंज महानगरपालिका र पोखरा महानगरपालिकाबाहेक अन्य स्थानीय तहको मतपत्र छाप्ने काम सम्पन्न भएको आयोगले जनाएको छ ।

सबै स्थानीय तहमा उम्मेदवारी टुंगो लागेपछि मात्रै मतपत्र छाप्नुपर्नेमा आयोग सकरात्मक रहे पनि व्यवहारिक कठिनाइका कारण त्यो संभव नरहेको उनले बताए । '२४ वैशाखभित्र सबै स्थानीय तहका मतदान केन्द्रमा मतपत्र पुर्‍याइसक्नुपर्छ । ६ हजार ७ सय ४३ वटै तहमा उम्मेदवारको टुंगो लागेपछि मात्रै मतपत्र छाप्ने कुरा संभव छैन,' उनले भने ।

उम्मेदवार टुंगो लागेपछि मात्रै मतपत्र बनाउनका निम्ति विद्युतीय मतदान प्रणाली अपाउनुपर्ने उनले बताए । ‘प्राविधिक र व्यवहारिक दृष्टिले उम्मेदवार फाइलन भएपछि मतपत्र छाप्न असम्भव छ । उपयुक्त र राम्रो समाधान भनेको ई–भोटिङ मा जाँदा हुन्छ ,' उनले भने ।

मतपत्र पछि छाप्ने निर्णयको आलोचनाबारे आयोग सचेत रहेको भन्दै थपलियाले कुनै पनि दलहरूमाथि आयोगले विभेदन नगर्ने थपलियाको भनाइ छ । 'दलले दिएको मनोनयन पत्रको आधारमा उम्मेदवारको पत्र दर्ता हुने उनले बताए । ‘कानुनमा गठबन्धन भन्ने छैन । हुँदै नभएको कुरा आयोगले जान्दैन । कुनै पनि दलको उम्मेदारको हकमा त्यो दलले दिएको मनोनयन पत्रकको आधारमा दर्ता हुन्छ,’ उनले भने ।

उम्मेदवारी नपरेका दलको चिह्न मतपत्रमा नहुँदा कहाँ कस्को चिह्न हुँदैन ?

आयोगले यस्तो निर्णय गरेमा काठमाडौं महानगरपालिकाको मेयरमा नेकपा माओवादी केन्द्र, नेकपा एकीकृत समाजवादी र जसपा र राष्ट्रिय जनमोर्चाको चुनाव चिह्न हुनेछैन । गठबन्धनको तर्फबाट कांग्रेसले उम्मेदवारी दिनेछ ।

यस्तै चितवनको भरतपुरको मेयरमा नेपाली कांग्रेस, नेकपा एकीकृत समाजवादी, जसपा र चुनाव चिह्न हुनेछैन । यहाँ पाँचदलीय गठबन्धनले माओवादीबाट उम्मेदवार बनाउने निर्णय गरेको छ ।

यस्तै ललितपुरमा माओवादी केन्द्र, नेकपा एकीकृत समाजवादी, जसपा र राष्ट्रिय जनमोर्चाको चुनाव चिह्न हुनेछैन । यहाँ कांग्रेसबाट उम्मेदवार हुने पाँचदलीय गठबन्धनको निर्णय छ ।

यस्तै कास्कीको पोखरा महानगरको मेयरमा कांग्रेस, माओवादी केन्द्र, जसपा र जनमोर्चाको चुनाव चिह्न हुनेछैन । यहाँ पाँचदलीय गठबन्धनबाट नेकपा एकीकृत समाजवादीले उम्मेदवार उठाउने निर्णय भइसकेको छ । उता विराटनगर महानगरमा माओवादी केन्द्र, नेकपा एकीकृत समाजवादी, जसपा र जनमोर्चाको चुनाव चिह्न हुनेछैन । यहाँ कांग्रेसले मेयरमा उम्मेदवार उठाउने गठबन्धनमा निर्णय भएको छ ।

यस्तै पर्साको वीरगञ्ज महानगरमा कांग्रेस, माओवादी केन्द्र, एकीकृत समाजवादी र जनमोर्चाको चुनाव चिह्न हुनेछैन । यहाँ जसपाबाट मेयरको उम्मेदवार बनाउने गठबन्धनको निर्णय छ ।

प्रकाशित मिति: शनिबार, वैशाख १०, २०७९ १८:४५